Creativo y emprendedor social Paula Nahr ta usa su conocemento den estudio di economia y estudio internacional pa crea strategia general y specialisa den mercadeo social. Tambe fundador di Switch Foundation, Nahr media y awo su proyecto nobo Podcast, ‘Mi tin alg’i conta bo’.

Paula Nahr ta expresa cu e ta den busca di persona cu den nan arte y emprendemento tin un impacto riba mundo. “Nos ta busca esnan bon y lo trece e parti aki di nan, un mensahe di amor, inclusividad y creatividad.”

Naci na Cali, Colombia, cria na Aruba y studia na New York, e ta bisa e tin ‘hopi cultura den mi criansa’. E ta sinti un ciudadano di mundo, pero cu un profundo amor pa Aruba ‘mi dushi isla’.

Pa su podcast cu ta den desaroyo, e ta bisa cu a crea esaki pa comparti e conocemento ‘cu mi a adkiri te awo’ y con hopi e proceso a dura pa cuminsa e proyecto. Pero a logra y ‘nos lo siña tocante e magia di intuicion’.

Despues di hopi meditacion pa cuminsa e podcast ‘tengo algo que contarte’ (mi tin alg’i conta bo) a bira e oportunidad pa Nahr por reinventa, y unda e lo papia di cosnan cu pa miedo di husga otro ta evita di papia. Tambe lo ta un espacio pa duna impulso na causa social y siña e poder di arte; tambe conscientisa di e importancia di biba un bida sostenibel.

Segun Nahr, e podcast ta un regalo pa Caribe y Latinoamerica. Cu e movemento aki ta duna oportunidad pa conoce emprendedor social y creativo, manera conecta su mes cu movmentonan cu hende muhe ta lidera.

E ta comparti for di su experiencia personal, specialmente e ‘foutnan cu mi comete pa falta di guia y informacion’, for di tur persona cu el a conoce na Switch Foundation y Nahr Media ‘mi tres baby’. “Mi ta wak atras y ta parce increibel locual mi a logra, tur a ta un fruto di un conviccion cu a hiba mi na caminda loco y pasiona, mi ta sigui mi instinto cu cada proyecto.”

Pa es motibo, el a dicidi pa funda Switch Foundation ‘mi prome amor’, cu for di aña 2011 a realisa documental y material audiovisual pa papia di tema educativo, pa yuda preveni reto social y duna un voz na esnan mas vulnerabel.

E ta comparti cu tin hopi trabou tras di cada proyecto, oranan largo di investigacion, entrevista, strategia y relacionnan publico. E ta bisa cu tin cantidad grandi di talento inverti na un causa poderoso manera filantropia, tur cos pa crea campaña social cu contenido digital y pa medionan social.

Segun Nahr, el a siña masha hopi cu cada proyecto. “Cada historia tin su propio sentimento y su reto pa conkista, su mesun enseñanza. Aki mi ta comparti mi bida cu bo, locual a keda di cada proyecto realisa y cada persona cu a crusa den mi bida. Ban crece hunto.”

Hopi di e storianan cu Nahr a yega di tende – y otro cu e mes a yega di biba como persona – e kier comparti via e podcast aki. E ta bolbe menciona cu cada storia tabata un les, un persona maraviyoso, testimonio di balentia y perseverancia. Nan ta experiencia cu ta duna caracter y ta siña pa mira e banda positivo di cada situacion.

Pa medio di podcast ta creando un comunidad pa duna sosten na otro mutuamente. “Bo no ta bo so akinan, aki nos lo conta anecdota y problema cu ta comparti cu nos amigo mas cercano, of cu ta biba na otro pais pa medio di voicenote.”

Nahr ademas ta conta nos cu Switch Foundation ta pa duna sosten pa medio di educacion na causa social di ONG y tur institucion social y educativo. Nan ta enfoca riba producto documental educativo y riba trece dilanti temanan manera violencia domestico, embaraso hubenil, abuso di mucha, bullying y traficacion di persona.

Tur cu e unico obhetivo pa movecion di comunidad y lanta esunnan cu ta siendo victima y no sa, pero tambe esunnan cu ta normalisa e conducta aki. E proposito di Switch Foundation ta pa duna un voz na esunnan vulnerabel y stimula un comunidad mas compasivo y cu menos prehuicio pa falta di informacion.

Pa medio di su pasion y yamado na su trabou, Nahr ta expresa cu por a yega na persona cu ta conecta cu amor y corda ‘e bunitesa pa soña’. Su meta ta pa sigui yuda mas victima, manera nan ultimo documental ‘Promesa Falso’ cu ta toca e tema di traficacion di persona.

Nahr ta invita tur cu kier yuda nan crece pa subi riba nan canal di YouTube. “Union ta haci forsa. Nos mester pa persona uni na e iniciativa pa duna sosten y crece hunto. Nos tin varios pakete cu beneficio unico, informacion relevante tocante nos investigacion y documental. Nos ta stima crea contenido y comparti.”

Cu Nahr Media, Paula a specialisa den mercadeo social; ‘e tendencia nobo y e generacion nobo ta locual ta exigi’ y eynan nan mester ta. Segun e ta splica, ta traha cu compania sostenibel of pa duna e balor na nan cliente y nan comunidad.

Pa e motibo aki, e ta bisa cu e ta ‘completamente namora’ di mercadeo social y documental. Nahr Media ta un idea cu a nace despues di a lanta cu Switch Foundation, a resulta cu e produccion di documental educativo ‘cual ta rekeri presupuesto’ a interesa pa colectivo.

Pa añas e tabata na buskeda di un ‘super team’ cu habilidad, conocemento y curason yena cu amor y humildad; pa tur cu kere den su vision social uni na su locura di kier mehora mundo. E ta duna di conoce cu e no tin trahado, pero ta traha como freelancer pasobra nan mes kier y ta gusta.

“Nos ta kere den amor liber y boluntario. Depende di proyecto, mi sa ken pa eligi pa trece dilanti na su pasion y conocemento y duna e miho na cliente cu ta confia den Nahr Media of participa den Switch Foundation. Por check ki ambos tin pa ofrece”, el a splica.

Pa finalisa Paula a duna di conoce cu e podcast lo ta na Papiamento y Spaño, pasobra e kier mustra mundo un Aruba diferente. Di entrepreneurnan creativo y social haciendo nan trabou riba e isla y cu ta ‘sigui pusha contra coriente’, pasobra tin falta di oportunidad y infrastructura pa pusha entrepreneur.

“Mi mision pa podcast ta pa crece y yuda sostene e industria creativo”, el a bisa. Pa tin mas informacion tocante Nahr su proyecto por sigui riba Facebook y Instagram @paulanahr.