Entrevista directora SKOA, Anuesca Baly: SKOA a conoce hopi acontecimento den tempo di pandemia

A pesar di e pandemia di Covid, 2020 tabata un aña di hopi actividad y cambio den SKOA. Directora di SKOA, Anuesca Baly a duna un panorama general di e acontecimento cu nan a pasa aden durante e aña aki. Nan ta varios cu el a menciona caminda nos lo haci enfasis riba esun mas relevante.

Nan ta: 1. Expo 2020 2. Candela na Macuarima 3. Covis-19 su consecuencianan pa enseñansa. 4. Problema cu pago di e trahadonan di limpiesa di SKOA 5. Renobacion di scolnan Imelda Kleuterschool y Scol Macuarima cu a habri. 6. IKD-Aruba bou guia di Pastoor Wuilder 7. Ainda falta Aloysius y Frère Bonifacius pa bin cla 8. i-Padklas di MAVO dependance 9. Prima klassen 10. Havo kansklas na La Salle y San Antonio 10. Inscripcion online 11. Scol piloto di kleuter 12. Congreso Nacional 13. Celebracion 50 aña di SKOA. Mirando tur e puntonan anterior, aña 2020 aunke e tabata un aña di pandemia, directora di SKOA ta haya cu e tabata un aña exitoso pa e fundacion aki, si nos ta mira tur e puntonan anterior.

Caso di candela

Nan a habri 2020 cu nan expo dia 18 di januari cu participacion di tur nan scolnan na Renaissance Conference Center. E lema di e expo aki tabata “Bin Conoce Nos.” E intencion di e expo aki cu pa prome biaha SKOA a yega di organisa tabata – segun Sra. Baly – pa laga tur hende mira kico SKOA ta. Pero principalmente pa duna un bista di nan scol con nan ta, caminda cada scol a duna di nan parti pa mustra kico nan tin paden. El a resulta tabata un exito rotundo.

E ta haya cu generalmente ora algo feliz ta sosode, algo menos feliz ta sosode tambe, y esey nan a confronta den e mesun periodo ey cu e caso intencional di candela cu a sosode na Scol Cacique Macuarima. E tabata algo insolito pa SKOA cu a crea un impacto den henter comunidad, ya cu bo nunca ta kere cu lo por tin hende cu lo kier ataca un scol, caminda bo ta duna enseñansa. Te dia di awe niun hende responsabel di e acto criminal aki a cay cera. E parti positivo tin di haci cu e comunidad a reacciona solidariamente di un bon manera yudando scol, y tambe dunado tur apoyo na esnan afecta. E scol a keda renoba y nan a logra bin cla tempran cu e trabao aki, a pesar cu nos ta den tempo di Covid.

Covid su impacto

Na luna di maart, Covid a dal Aruba cu su cos menos bon, pero tambe cu su cos bon. Como un hende positivo, Sra. Baly a ripiti cu den cada cos cu ta bin malo, semper tin cos bon na otro banda. Un parti bon tabata ta cu nan cuerpo di docente a uni forsa pa busca e forma con nan lo sigui duna nos muchanan enseñansa.

E ta admiti cu tabata un periodo hopi duro no solo pa e cabesantenan, docentenan y SKOA mes, pero tambe pa nos muchanan. E forma di duna enseñansa virtual for di distancia no tabata facil. Na comienso SKOA mester a traha hopi duro dunando tur mucha un e-mail adres.

Nan a wordo incorpora den nan sistema di SAS cu ta un sistema unico traha y diseña specialmente pa SKOA por traha cune. Tur nan alumnonan ta den e SAS registra y tambe nan lo registra tur nan empleadonan. E ta un plataforma integral unda te hasta e mayor por tin cierto acceso na SAS. Eynan e maestro por ehempel ta yena tur mucha su cifranan y tambe nan ta haya tur informacion cu ta relevante pa e alumno, etc.

Den e proceso di enseñansa virtual e problema principal tabata con pa e mucha por beneficia di dje. Ya cu no tur tabatin acceso na internet, pero tampoco nan no tabatin e device adecuado. A base di un encuesta cu nan a realisa entre nan alumnonan, SKOA por a haya un bista di e situacion aki pa wak con nan lo por hinca nan den e proceso di enseñansa na distancia aki.

SKOA tin casi 10 mil alumno locual ta dificil pa facilita cada un di nan un device of tambe acceso na Internet. Sra. Baly a laga sa cu den nan grupo di comunidad cu SKOA ta facilita enseñansa “si bo kier duna enseñansa igual pa tur, e no ta factibel,” el a bisa. Pasobra no tur mayor di e alumnonan tin e facilidad aki. Esaki tabata un di e motibonan cu ora a yega e momento ideal, nan a tuma e decision pa bay scol bek shen porciento. Pero tambe pa mira kico ta pasando cu nan muchanan na cas.

Disputa y innovacion

Pa locual ta e problema relaciona cu pago di nan trahadonan di limpiesa di SKOA, ainda nan ta den un disputa.

Sra. Baly a bisa cu nan ta yegando na final di un aña y ainda no a bin un resolucion riba e problema aki. E ta spera cu pa januari awor lo por bini un solucion pronto. E ta kere cu un les cu e pandemia di Covid ta laga atras ta, cu tur hende ta mesun importante den enseñansa pa un scol por funciona.

Otro bon noticia tabata cu tanto Imelda kleuterschool como Cacique Macuarima a habri bek. E Covid a mustra caminda cu nan tabata ubica den un shopping mall, no tabata adecuado pa tin alumno, locual nan tabata sa caba adelanta. Pero nan mester sali for di edificio 4 aña pasa, pero finalmente nan edificionan a keda renoba.

Sra. Baly a remarca cu pa motibo financiero nos infrastructura escolar no ta haya atencion, y e no ta referi solamente na esunnan di SKOA, sino general. Esaki ta haci cu nan ta wordo realoca den edificio temporario y no adecuado pa tin un scol den dje.

Un logro positivo di 2020 ta cu SKOA a lansa e aña akinan IKD-Aruba. Esaki ta e Instituto Katekesico Diocesano cu ta e parti cu ta reenforsa e parti di catolicismo den nan scolnan. E parti aki ta cay bou e guia di pastoor Wuilder kende a yega di bishita e 46 scolnan di SKOA.

E cabesantenan a sera conoci cu e religioso aki, y tambe cu e team di IKD cu ta bay yuda reenforsa e maestronan pa locual ta e parti di enseñansa di Catolicismo. “Cu ta hopi importante pasobra esey ta locual ta haci nos diferente cu otro tipo di scol na Aruba. Aunke nos ta tuma tur alumno,” el a bisa.

Na 2020 SKOA a habri otro klas di i-Pad na MAVO cu ta algo completamente nobo. E muchanan cu ta den Frère Bonifacius cu pa shete aña caba ta un i-Padklas, aworaki ora cu nan ta caba na zesde klas y nan ta bay MAVO. Nan por drenta via e mesun sistema di i-Pad na un MAVO scol, sin cu nan mester bay bek na e parti di uzo di papel. Esaki ta un manera innovativo di traha. Sinembargo directora di SKOA ta lamenta cu nan no por haci tur scol i-Pad pareu, ya cu e ta un inversion basta substancial.

Prisma

Aña pasa SKOA a habri dos Prisma klassen y e aña escolar 2020-2021 nan a habri cinco. Nan ta klasnan specificamente pa muchanan migrante cu no a bay scol Hulandes. Sra. Baly a declara cu tin un necesidad pa e muchanan aki mayoria di nan di origen Venezolano bay scol. Nan a bay entre otro cu tur acuerdo di Unesco, caminda e mucha tin derecho di enseñansa, aunke su mayor ta un refugiado. Asina nan por drenta despues na scol regular pa nan por haya e mesun oportunidad di educacion na Hulandes y asina nan por haya e mesun oportunidad cu cualkier otro mucha cu ta di Aruba.