Diaranson ultimo, Centro Famia di Criansa Arubano a recorda cu 16 aña pasa nan a wordo funda como un stichting. E ta un fundacion cu masha poco ta sali den publicidad. Pero nan ta realisa un labor importante den comunidad, specialmente cu nos muchanan mas vulnerabel

Trahado social Nathalie Tromp tin 12 aña na servicio di e fundacion aki. For di tempo cu el a cuminsa nobo den e bunita trabao y profesion aki, mucha ta keda central p’e y logicamente pa e fundacion aki. P’esey e trabao aki ta den su curason y tambe di tur esnan cu tin un laso cu e Centro Famia di Criansa Arubano. Specialmente nan coleganan di fundacion Guia Mi, cu conhuntamente nan ta traha pa bienestar di muchanan cu a sufri algun sorto di abuso of cu nan ta wordo saca for di un famia disfuncional. Pero cada un di e fundacion aki tin su tarea specifico.

E meta di Centro di Famia di Criansa Arubano ta pa busca nucleo familiar den comunidad cu kier bira famia di criansa. Famia cu kier ofrece e muchanan cu a pasa den abuso of maltrato un hogar pa e temporada cu nan tin mester, ya sea temporal of duradero. Muchanan cu te hasta a pasa den un situacion peligroso. Of ambiente cu no ta yuda pa nan desaroyo.

Pa e motibo ey nan ta wordo saca temporalmente di nan cas pa asina e mucha por haya loke tin mester pa su desaroyo sano. E opcion ta cu nan ta bay internado pa algun tempo. Of nan ta haya famia di criansa pa un tempo. Mientras cu nan mayor ta traha riba nan situacion. Pero e no ta un tarea facil. E aña aki nan a logra ubica tres mucha den famia di criansa, y e averahe pa aña ta entre 8 pa 14 mucha. E ta varia cada aña.

Tin muchanan entre cero te cu 18 aña cu mester di un famia di criansa, pero no por haya nan. Nan ta muchanan di Imeldahof, Casa Cuna, Centro Ortopedagogico (antes Cas pa Hubentud) y tambe muchanan di Stichting Voor Verstandelijk Gehandicapten Aruba . Pa nan e fundacion aki ta busca famia di criansa. Pero e ta complica pasobra e ta kere cu cada hende tin nan propio pensamento. Tin biaha nan ta crea nan propio pensamento a base di informacion of experiencia cu nan a yega di tende den comunidad di otro hende. Por ta e hende aki por a pasa den un experiencia negativo; pero no tur ta asina.

Otro factornan

Otro factor cu ta influencia nan decision pa bira famia di criansa ta e pensamento cu un dia e mucha tin cu bay cerca su mayor bek. Tin mucha cu ta keda den famia di criansa pa algun tempo, y nan ta pega cu e mucha. Esaki ta bira deseo cu algun famia di criansa pa e mucha keda cerca nan. Pero ora un mucha ta bay cerca un famia di criansa, e no ta un adopcion. For di un principio nan ta wordo informa cu nan permanencia ta temporal. Tromp semper ta conscientisa e famia di criansa riba e bunita obra cu nan a realisa cerca e mucha pa yud’e den su desaroyo, te ora cu nan tin mester. Y despues e mucha por bay cerca e mayornan cu nan ta stima.

Un situacion cu tin biaha ta impedi pa un famia bira un famia di criansa ta miedo pa problema. Ya sea cu e mucha ta bin cu hopi problema of cu nan mayornan eventualmente por bin busca problema. “E tipo di pensamento aki ta pone cu ta stroba cu un famia di criansa ta bini dilanti.” Nathalie Tromp a splica cu e famia di criansa mester percura un bon contacto cu e mayor di e mucha. Asina nan por crea un ambiente sano y di harmonia entre nan mes; y tambe cerca e mucha.

E bon relacion aki lo por permiti cu dia di mañan, si e mucha mester bay bek cerca nan mayor, e miembronan di e famia di criansa ta keda den bida y curason di e muchanan. Igualmente den caso cu e mucha no por bay cerca su mayor bek, no mester lubida cu e mayor lo keda den e bida di e mucha. P’esey nan ta pidi cu e famia di criansa por ta habri pa tin un contacto cu e mayor biologico di e mucha. Entre otro, hiba e mucha pa nan por wak nan mayor, y esaki por sucede por ehempel den un caminda neutral.

Pero e parti financiero ta hunga un rol tambe. Costo di bida ta bira caro y hendenan awendia nan famia ta bira mas chikito. No tin e sosten mas cu hopi tabatin antes. “Famianan toch a bira individualista. Nan ta pensa riba: Mi famia, y no ta wak ken otro por tin mester di algo…”

Tromp a bisa cu cada momento cu nan tin mester di un famia di criansa nan tin cu sak’e for di nos mesun comunidad cu no ta cambia. Pero e fundacion aki constantemente mester di famia di criansa. Di un manera e trahado social aki semper ta purba di convence hende pa yuda un mucha cu no a pidi pa locual nan a pasa.

Den cuadro di su hubileo 16, Centro Famia di Criansa Arubano kier gradici tur e famianan di criansa existente. Pero tur esnan cu ta haci nan trabao posibel di yuda muchanan den comunidad cu tin mester di un hogar,sea temporal of duradero.