Pa hopi tempo e tabata un ehecutivo den turismo di Aruba, pero Sue Ann Lee tin seis (6) aña caba ta duna les na Facultad di Hospitalidad y Estudio di Maneho di Turismo, FHTMS na Universidad di Aruba. Y awor, e ta e Decano di e facultad.

Lee, mama di tres yiu muhe y un baby na caminda a dicidi pa tuma e siguiente reto den su carera profesional y ta cla pa e reto.

“Despues di traha asina hopi den e industria, mi a solicita pa traha na FHTMS como ‘lecturer,’ pero a base part-time. Pero pa casualidad, nan a habri un posicion pa un full-time y mi a haya e funcion.” Segun Sue Ann Lee, despues di a traha varios aña den turismo e tabata interesa pa comparti no solamente su propio educacion superior pero sigur su conocemento cu studiantenan di e facultad. “Mi kier a transferi esaki den educacion. Y e momento ey mi no a pensa nunca pa bira Decano.”

E experiencia di traha como un ehecutivo den turismo pa para dilanti un grupo di hoben, mas tanto, personanan cu a caba EPI Horeca of Colegio Arubano tabata algo totalmente diferente. “E experiencia ta bunita, pasobra aki ta trata di un generacion diferente. Mi por a mustra ehempelnan na Aruba mes. Pa turismo, no mester bay leu di cas. No mester bay un Disney pa compronde e problemanan, e ehempelnan cu por usa pa por trece dilanti situacionnan cu ta topa den bukinan. E experiencia a yuda hopi pa splica e literatura.” Lee por a usa realidadnan na Aruba pa ilustra e materia. “E experiencia den e ramo ta hopi valioso y ta us’e pa e studiantenan por reflexiona mas cerca di cas. Nan ta hopi critico, y nos ta brinda nan e oportunidad pa por cuminza pensa mas critico riba diferente parti di nos turismo y conect’e back na e literatura cu nan mester domina.”

“Mi por reconoce mi mes den e studiantenan. Ami a caba Colegio y bay studia na Hulanda, pero na mesun momento nos por wak nan crece y desaroya.” FHTMS ta brinda e grado di Bachelor of Science, un estudio di tres aña y ta mira con nan ta crece y ta desaroya nan habilidad. E ta hopi impresionante.” E Decano nobo ta ilustra con fascinante e ta pa mira hobennan drenta e prome aña, cu hopi reserva, cu berguensa pa bisa algo, y ora di haci presentacion, nan ta haya miedo. “Y e ora ey mi por bisa nan cu mi tambe a pasa den un experiencia asina, anto awor mi ta para dilanti klas. Bo ta desaroya bo habilidadnan y nos kier pa nan desaroya nan habilidadnan, entre otro di comunicacion, pero tambe social. Esey ta e parti ‘great.’” Sue Ann Lee, cu su 6 añanan na Universidad di Aruba a mira dos grupo di studiante gradua, y ta momentonan cu ta yene cu hopi alegria. “E ta asina impresionante pa mira con un studiante a drenta pa finalisa su estudio cu presentacion di su tesis, con nan a crece y nan mes ta trece dilanti e area cu nan a descubri cu nan a gusta pa haci investigacion.”

Decano

E funcion di Decano no uno fiho. Un Decano ta e persona cu ta guia e facultad, pero normalmente ta scoge e persona pa medio di eleccion unda e propio staff y representante di studiante den cada aña di nan estudio, a participa. Tin tres aña, “pues nos tin freshmen, juniors y seniors, y tur luna tin reunion di henter e facultad. John Wardlaw tabata na encargo di e facultad pa casi 12 aña y a laga sa cu no ta sigui mas. Pero John tin algun tempo caba ta bisa cu e no kier sigui, pero asina mes nos a sigui vota p’e.” Sinembargo, Wardlaw e aña aki a bisa bon cla cu no kier nomin’e ni pa vota p’e. E tabata kier otro hende pa tuma su luga. “Esaki ta como di tres biaha cu el a bisa esaki. Pues patras den mi cabez cu e dia ta bay yega y mi coleganan no tabata reacciona. Y dia cu el a (Wardlaw) bisa cu esey, ma dicidi pa postula mi mes, pero dunando mi coleganan tambe e espacio pa bisa cu nan kier e funcion. Pero ningun hende a postula nan mes, pues ami tabata e unico nomina,” Sue Ann a bisa na harimento. Pero asina mes e mester a pasa den e proceso. “E ta un posicion di dos aña, pues aki dos aña lo mi mester bolbe pasa den un proceso di votacion si otro colega kier e funcion.” E votacion ta sosode durante e ‘faculty meeting,’ unda tur e staff ta presente pa pasa riba programanan di estudio, con e lesnan ta bayendo. Studiantenan tambe ta oportunidad pa duna nan contribucion den locual nan ta considera importante den e lesnan mes, di e docentenan, operacion di Universidad. Tur por trece punto dilanti y e Decano ta esun cu ta guia e proceso.”

E trabao pues lo bira uno mas administrativo, Lee a splica. E ta maneha e programa, ta tene reunion cu maneho, y trata cu tur locual studiantenan ta confronta. “Mi lo sigui duna les, pero menos ora. Mi tabata duna tres les pa semester, pero awor e ta bay ta un les.”

E forma con Sue Ann Lee lo maneha ta bay ta diferente cu di Wardlaw, den sentido cu e kier pa tur hende carga mas responsabilidad. “Mi ta bay sigui duna les, pues mi no por bay carga tur cos.” Den otro palabra, su forma di maneha lo ta delega.

Famia y baby

Su pareha tabata sa cu Sue Ann tabata interesa den e funcion di Decano, cu tin mucho mas responsabilidad, por ehempel di traha mercadeo, procedura, cu ta nifica mas ora di trabao. “Como lecturer, mi tabata duna les mainta y tin mas flexibilidad merdia y anochi. Pero awor ta bay tin otro actividad como parti di trabao, manera eventonan di Universidad di Aruba mes. “E orarionan lo cambia, ma bisa mi yiunan. ‘Por ta boso lo wak Mami menos,’” Lee a agrega. “Pero awor nan sa cu e baby ta biniendo.”

E decision pa bira Decano a bin prome cu e baby, pero pa Sue Ann Lee, e ta djis otro reto mas pa organisa, pa por maneha FHTMS banda di su responsabilidadnan como Mama di cuater yiu. No tin motibo pa duda cu Sue Ann Lee lo logra esaki tambe.