Recientemente Stichting Monumenten Fonds Aruba a recorda cu dia 17 di juni nan a cumpli 24 aña di existencia den nan tarea di renoba y conserva nos monumentonan.

Durante casi cinco lustro, e fundacion aki a asumi e responsabilidad grandi di bira doño di 16 monumento cu nan a renoba, pero cu nan mester cuida y conserva. Algun di nan ainda ta pendiente di nan restauracion. Un di nan ta e tanki di awa na Rancho.

Durante un entrevista cu Sra. Anne Witsenburg, kende ta directora di e fundacion aki for di 9 aña pasa, a declara cu ya caba nan ta preparando pa nan hubileo di plata. Nan ta cuminsa pensa riba nan logronan durante e ultimo casi cinco lustro. Pero tambe con nan a logra esey, y kico ta nan deseo pa futuro.

Inicio

E fundacion aki a cambia hopi compara cu su inicio. 24 aña pasa nan a wordo lanta door di gobierno pa cuida nos joyas arkitectonico, conhuntamente cu Conseho di Monumento y Monumenten Bureau.

Na inicio tur cos tabata limita. Sinembargo ya caba den e prome añanan proyectonan bunita a wordo realisa, manera Stad Huis y Censo cu awendia tur hende ta admira e proyecto aki. Otro proyecto historico y sin precedente tabata e casita di Aruba Bank of casita geel.

E idea inicial tabata pa bash’e abao. Tabatin henter un discusion rond di e casita aki cu a para den corte, y finalmente a dicidi di muda e monumento aki na su adres actual na Weststraat 15. Awendia nos por admira e monumento aki banda di parada di bus na Oranjestad. Cada monumento aki cu ainda ta na bida, despues di basta aña, nan ta añadi un historia nobo cada bes cu nan ta haya un huurdo pa nan.

E tempo aya, Aruba como un pais jong y den pleno desaroyo tabata enfoca mas tanto riba turismo y cosnan moderno. Pero masha poco riba su historia y parti cultural. Pero e ta reconoce un grupo chikito pa nan esfuerso cu nan hacie tempo aya pa nos monumentonan, entre nan Sra. Yvonne Webb-Kock di Monumenten Bureau. Nan a lucha pa hala atencion riba e aspecto aki di conservacion di nos historia y cultura relaciona cu nos monumentonan.

Na inicio como fundacion nan tabata haya subsidio di gobierno cu tabata limita pa atende cu nan retonan. Te hasta nan a yega di traha un bunita kalender pa recauda fondo. No tabata facil pa mantene, organisa y haci bon uzo di nos monumentonan. Na 2009 e fundacion a cuminsa pasa den un metamorfosis. Nan a haya un directiva nobo, mientras cu nan subsidio no tabata disponibel mas. A presenta un reto nan dilanti: Con e fundacion aki por logra su meta pa preserva nos historia monumental pa futuro. Pero e punto tabata di ki forma?

E directiva a cuminsa cambia su maneho y papia cu Hulanda pa wak con nan por yuda facilita fiansa. Nan a ripara cu e edificionan cu e fundacion tabata doño di dje, nan tin un balor locual tabata facilita e acceso na hipoteca. Na 2012 ora cu Sra. Witsenburg a fungi como director hunto cu dos colega part-time, nan a cuminsa pensa con nan por haci mas di loke a wordo haci te na e momento ey.

Independisacion financiero

Ora cu Stichting Monumenten Fonds Aruba a independisa financieramente for di gobierno, kiermen e fundacion aki no a sigui haya mas subsidio for di nan, nan a cuminsa otro proceso cu a yuda pa tur cos por cana mas lihe.

Nan a haci uso di e balor financiero di nan monumentonan pa ehecuta mas proyecto. E fundacion a haya hopi yudansa di Hulanda. 12 aña pasa nan a logra e prome pakete di sosten financiero y aworaki nan ta bezig cu e di cuater. E ta refleha cu Hulanda ta aprecia loke e stichting aki ta haciendo. Pero e no tabata facil. Nan ta proceso cu ta tuma su tempo pa prepara bon, y busca full solucion pa un monumento.

Entre otro proyectonan den e fase nobo aki, na 2012 nan a cuminsa cu e proyecto di E Faro cu ta un icono di Aruba. Pa logra esaki a tuma un par di aña pa prepara tur cos bon, y te hasta pa busca informacion historico di E Faro, caminda hopi hende a contribui. Hasta a sali publica un buki di Sr. Romulo Fingal relaciona cu historia di e joya aki cu awor nos hendenan local como bishitantenan por disfruta di dje.

Sra. Witsenburg a menciona algun di e proyectonan tambe cu e fundacion aki a logra finalisa recientemente y cu nan ta sinti masha orguyoso di dje. E proyectonan aki a demostra cu e fundacion aki no ta enfoca riba Oranjestad so. Nan a drecha e water toren na San Nicolas cu aworaki ta Museo di Industria. Despues nan a cumpra di famia Nicolaas e edificio monumental di Nicolaas Store cu awor ta sede di Community Museum. E di tres ta Uncle Louis Store cu nan a cumpr’e for di gobierno y aworaki ta e sede di departamento di Medio Naturalesa y Medio Ambiente.

Igualmente el a laga cu no solamente e fundacion ta interesa den proyectonan grandi, sino cu nan a yega di ehecuta proyectonan masha chikito mes cu nan ta hopi orguyoso di nan. Un di nan ta e Cas Tan Tin cu nan a cumpra aña pasa. E ta haya cu den nan coleccion monumental tabatin falta di un cas di cunucu unda fundacion Mi Cutisa ta den dje. Segun Sra. Witsenburg, nan intencion no ta pa pone atencion na edificio monumental grandi di hendenan considera como rico, sino tambe di e hendenan humilde di nos comunidad.

Otro proyecto tabata e forno di calki di Rancho cu aunke e no ta un monumento arkitectonico di un gran beyesa, e tin un historia di gran balor y beyesa su tras dje relaciona cu nos historia economico. Otro proyecto cu nan kier realisa na Rancho ta esun di e tanki di awa.

E parti di Aruba su historia economico ta un topico cu Sra. Witsenburg ta reconoce cu e fundacion aki no a pone mucho atencion durante nan añanan di existencia. Pero den nan plan ta pa bin cu mas di e tipo di proyecto aki. Un di nan ta e takinan di awa di Kibaima. Un structura cu t’ey, pero no mucho hende sa kico e ta. Pero nan ta tankinan cu ta data for di 90 aña pasa y nan a wordo traha na estilo di Art Deco.

Falta apenas un aña pa nan hubileo 25 di plata. Stichting Monumenten Fonds Aruba tin varios proyecto den proceso cu a cay den e lista di e proyectonan di fast track cu ta yuda activa nos economia den e crisis actual.

Tambe nan tin proyectonan futuro manera esun di ex Botica Aruba. Nan ta proyectonan cu ta mustra cu Stichting Monumenten Fonds Aruba ta sigui den nan lucha pa rescata y salvaguardia nos monumento historico y patrimonial.