Den fin di siman Fonds Voor Cultuur a anuncia e ganado di nan premio Gouden “C” 2019. Ta trata di e trahado social naci na Aruba y procedente di San Nicolas, Sharina Gumbs.

E dia ey miles di hende por a mira con minister Hulandes di Educacion, Cultura y Ciencia, Ingrid van Engelshoven a entrega e premio di forma virtual na Sharina durante e talkshow online Cultuur voor iedereen, diasabra ultimo.

Bon Dia Aruba a papia cu Sharina riba su proyecto ‘Re-fill your cup with authenticity’, cu a resulta ganado di e nuebe version di Gouden “C” organisa pa Fonds Voor Cultuur. E concurso aki pa proyectonan aplica pa fondo ta busca premia esun cu a experimenta riba e tema di inclusion di un forma innovativo y Sharina Gumbs a logr’e.

E team di hurado cu a vota na fabor di e proyecto aki a describi’e como uno senciyo cu un impacto grandi, y cu posibilidad di expande su mes den diferente disciplina.

Trahado Social y artista

Sharina a relata na e matutino aki cu e premio aki a resulta un absoluto sorpresa p’e. El a wordo nomina pa otro cuater proyecto, pero esaki a bira e prome proyecto pa fondo. “E tabata un sorpresa, pasobra na prome instante bo ta wordo nomina, y despues bo ta gana e premio,” el a bisa.

E ta un trahado social, pero tambe un artista cu for di edad tempran a explora e mundo di arte. El a biba y traha como trahado social mas cu 20 aña na Hulanda y awor e tin 6 aña bibando den su isla natal.

Na Hulanda el a traha entre otro riba tereno di cuido psikiatrico, cu ta demanda hopi esfuerso y produci hopi stress na e profesionalnan di e area aki. Pero tambe el a yega di traha riba tereno di desaroyo comunitario y bienestar di muchanan na Hulanda. Actualmente e ta traha riba coordinacion di cuido di mucha den un instituto na Aruba.

Na momento cu el a yega Aruba, Sharina a sigui traha riba su pasion cu ta arte, a pesar cu el a sigui traha den su profesion como trahado social. E ta haya cu trahado social ta realisa un trabou hopi pisa, caminda nan mester deal cu hopi stress.

Arte y stress

Aunke for di mucha arte a hala su atencion, pero ora cu Sharina a cumpli 20 aña, el a cuminsa pinta formalmente. E tabata resulta hopi relax p’e.

For di e situacion aki a bin Sharina su idea genial di aplica su amor pa arte pa yuda alivia stress. Pa medio di arte abstracto a construi un instrumento pa stimula creatividad y minimalisa stress pa medio di e tayer cu regularmente e ta organisa. Trahadonan riba tereno di salud y maestronan ta participa den nan tayer.

Nan ta hendenan cu ta confronta stress y presion. No solamente pa e tempo cu nan ta dedica na nan trabao, pero tambe nan mester atende cu cantidad di situacion. Igualmente ora cu ta trata cu mucha, como profesional riba e tereno aki, bo ta wak hopi cos relaciona cu nan desaroyo y tambe abuso of violencia domestico. Tur e situacionnan aki ta bira un reto pa nan como trahado social. “E idea aki a bini pa haci algo cu e grupo specifico aki,” Sharina a bisa.

Na principio no semper el a pensa cu loke e tabata haciendo tabata loke el a kier. Ora cu el a yega Aruba su intencion tabata pa haci algo cu arte. Specialmente Sharina su pensamento tabata pa haci algo pa arte social y tambe algo significante pa e trabou social. E tabata mas tanto pa su mesun experiencia personal.

Arte tabata algo cu Sharina semper a wak pa relax. Un dia Sharina a dicidi di combina su profesion como trabao social y arte pa yuda no solamente hende adulto, pero tambe muchanan pa desaroya nan ‘identidad autentico.’ El a dicidi di uza arte den e linea di trabou aki. E ta un dobel via, ya cu e ta yuda baha stress como trahado social; y tambe e ta yuda bo pa maneha miho cada situacion.

Terapia artistico

Pa medio di e tipo di terapia artistico aki, e participantenan den nan tayer ta refleha nan identidad y vulnerabilidad cu por a bira factornan cu ta afecta nan propio autenticidad y identidad profesional.

Nan ta descubri durante ehercicio mental y creativo cu nan a crea, nan ta explora nan interior pa saca afo diferente experiencia di bida, haciendo uzo di color poni riba lenso pa produci arte abstracto.

E terapia aki den forma di arte of ‘mindful art’ ta loke Sharina ta comparti den su tayer cu ta aparece riba Facebook. E ta bira un instrumento efectivo di ayudo creativo y recreativo cu ta trece bienestar y logicamente calidad di bida cerca bo.