Organisacion Stampia Aruba a yega di organisa un bunita y interesante exposicion di stampia den cuadro di Dia di Himno y Bandera den sala chikito di exposicion na Biblioteca nacional Aruba (BNA) su sede principal na George Madurostraat.
Lamentablemente e exposicion aki cu un grupo amante di stampia of filatelia a traha cu tanto dedicacion, a wordo afecta pa e crisis di coronavirus/Covid-19. Apesar di esaki Bon Dia Aruba a bin cu e entrevista aki pa nos lesado por disfruta di e exposicion aki a distancia. Pero tambe pa duna oxigeno na nos mente contra tanto noticia relaciona cu e Covid-19.
Stampia Aruba.
Presidente y cofundado di Stampia Aruba, Ruben Abath, a declara na Bon Dia Aruba cu e organisacion aki a lanta na 2007, y e aña aki nan ta celebrando 13 aña di existencia. Den e contexto aki nan a dicidi di organisa un exposicion pa duna mas contenido na nos celebracion nacional di 18 di maart.
Ora cu e organisacion aki a wordo lanta, nan a yega di tene 40 miembro. Pero poco poco nan a cuminsa bay, pasobra di un banda interes a caba, pero tambe uzo di E-mail tabatin su impacto. Actualmente a keda un grupo nucleo di 10 persona cu tin un gran amor pa e hobby di colecciona stampia.
Ruben Abath ta hopi optimista y positivo riba e futuro di e hobby aki. E ta reconoce cu uzo di E-mail tin su impacto. Pero el a trece como ehempel cu na Merca e generacion nobo, hobennan entre 25 pa 40 aña, ta esun cu ta maneha e Sociedad di Stampianan di Merca.
“Con cu bay stampia ta keda existi pasobra hende ta biaha y ta manda un post card cu stampia riba dje,” el a bisa. Igualmente ora cu ta trata cos mas personal y special, bo no ta manda un E-mail of WhatsApp. Sino cu bo ta manda, sea un carchi of carta cu stampia riba dje di e servicio postal.
Stampia tin un historia.
El a relata cu stampia tin un historia. Hopi biaha un stampia ta wordo saca pa un motibo pa recorda un acontecimento of tambe pa conmemora un fecha importante. Bo por colecciona stampia di pais y tambe bo por hacie tematico.
E exposicion cu nan a organisa ta uno varia, ya cu tin coleccion di paisnan, specialmente di Aruba. Pero tambe tin tematico relaciona cu famia Real, flora, fauna, etc… Nan tin stampia bieu di tempo di colonia di añanan 1800. Nan tin e tema di Reino Hulandes cu a cambia hopi, ya cu antes nos tabatin Surnam, New Guinea y Indonesia cu a cay afo. Tambe tin stampia relata na Antia Hulandes su metamorfosis estatal.
Presidente di Stampia Aruba a haci un apelacion specialmente na nos hubentud, pero henter comunidad tambe, pa bira miembro di nan organisacion. El a bisa cu eventualmente nos generacion jong no a lanta den e mundo di stampia, pero nan por probecha e oportunidad aki pa haya conocemento riba kico stampia ta nifica.
Igualmente Abath a bisa cu tin pensionadonan cu por ta no tin mucho cos pa haci na nan cas pa bin join e organisacion aki. Den temporada normal nan ta reuni na BNA su sede principal e di dos diasabra di cada luna di 1’or merdia pa 4’or atardi. Durante nan reunion tambe nan ta intercambia stampia, pero tambe nan ta pasa un rato ameno cu otro.
