Piscamento ta un recurso esencial pa miyones di hende den henter mundo cu ta biba di e actividad aki. No solamente e ta provee recurso economico domestico pa nan, pero tambe pan riba nan mesa. Nos ta papiando di esunnan cu ta realisa piscamento artesanal, manera e piscado Rosendo ‘Chen’ Henriquez, y no piscamento industrial na gran escala.

Na Aruba ta calcula cu tin alrededor di 600 pa 1,300 piscado artesanal. Algun di nan ta biba directamente di piscamento y otronan no. Of nan ta complementa piscamento cu otro sorto di trabao cu por genera un entrada safe pa nan.

Chen ta un Santacrucero di pura sepa. El a lanta den seno di un famia di piscado. For di mucha, hunto cu su demas rumannan y nan mayor, piscamento a bira un bendicion y te hasta un forma di biba di nan famia. Cu 6 aña so ya Chen tabata den boto caba pa yuda su tata den e ofishi aki cu el a hereda di dje.

Actualmente y pa varios aña caba, Chen su trabao basicamente ta piscamento of drecha motor di boto. Tin biaha dos of tres biaha pa siman e ta subi lama. “Lama mester ta bon pa mi bay.” Tur cos ta depende con condicion di tempo ta pa Chen bay lama den su boto crioyo cu e mes a traha: “Rybik.” Mas tanto e nomber di boto ta femenino, pero como cu Chen no tin yiu muhe, el a traha e nomber Rybik inspira den e nombernan di su dos yiunan homber.

Abordo di su boto di 16 pia, e ta bay pisca 5 pa 6 miya leu di nos costa. Mas tanto e ta bay pa zuid unda e ta haci piscamento di fondo entre 70 pa 100 brasa pa pisca especienan manera pisca cora, brazil y djampou. Chen a bisa cu como piscado tambe nan ta consciente di e tempo moderno di awendia. Nan ta wak via Google con por scapa cierto piscanan. A pesar cu nan ta piscanan di fondo, si nan ta bora e pisca na banda y nan ta saca e aire for di nan blaas, nan por scapa. Esaki ta e procedura normalmente nan ta haci por ehemplo, ora cu nan ta coy piscanan chikito.

Restriccion

Cierto restriccionnan ta bin tumando luga den henter mundo buscado proteccion di especienan di pisca den peliger di disparce, debi na e overfishing (piscamento di mas), locual ta haci cu e actividad di piscamento a cuminsa collapse tambe.

Organisacionnan internacional a bin cu tratadonan di proteccion riba flora y fauna marino pa evita por ehemplo cualkier menasa riba biodiversidad di e rifnan di coral. Na Aruba nan kier protege entre otro e especienan di Gutu (Parrot fish), Lora, Pisca Sierra of sawfish, djukfes y yacupeper.

Chen cu casi 60 aña di existencia ta considera su mes como un piscado cu ta nabega entre e parti bieu y e parti nobo di piscamento. Como piscado profesional e ta haya cu henter controversia rond di proteccion di Gutu, no ta necesario. El a bisa cu como piscado ‘nos ta siña cu e Parrot fish ta esun cu ta trece santo blanco pa nos. E ta cleaning e coral tambe… Parrot fish pa nos ta sagrado’. Igualmente el a laga sa cu e Pisca Sierra, masha poco bo ta haya nan den nos lama.

E idea di Parke Marino y zona protegi tanto paden como pafo di lama, e ta haya cu mester protege nan. Pero e proteccion aki mester bin pa esunnan cu tin negoshi grandi of industria di piscamento cu ta daña e coral. Pero tambe esun cu ta kap e wanglonan, basha piedra den lama y te hasta traha nan propio beach. Chen ta haya cu e trabao di proteccion mester cuminsa eynan.

Si mester bin cu proteccion e ta algo berdad, pero e ta haya cu no semper e mester cuminsa cu e piscadonan. Pasobra si nan ta bin cu piscanan di afo pa bin bende cu nos restaurantnan na Aruba, e no ta haya cu e cos aki ta bon. No por midi cu dos midi. Pasobra tur tempo e sector primario di nos propio piscado artesanal a sa di provee nos comunidad di pisca.

Tambe tin biaha nan sa haya tribon den cierto temporada. Tin sorto di pisca cu nan presencia den nos lama teritorial ta depende di e temporada. Ora cu temporada di tribon ta yega, nan ta los esunnan chikito bay. Nan no ta haci nada cu nan, el a bisa. Un tribon protegi ta esun tribon martiu. Chen a bisa cu e tribon aki ta bin ocasionalmente ora cu tin kreeft. Pero e ta un espectaculo pa weita nan den lama, mas no pa pisca nan. Ademas e no ta un sorto di pisca comercial. “Masha poco hende ta gusta tribon. Tin hende cu ta us’e pa kerikeri.”

E lista di proteccion a wordo haci mas grandi incluyendo kreeft y calco. Chen – kende ta papia pa su mes, no pa otro piscadonan – pa loke ta kreeft y calco, e no ta mishi cu nan, pisca so e ta coy.

Negoshi

Si piscamento artesanal ta un negoshi, Chen no ta mir’e tanto asina. Aunke tin mas hende cu a cuminsa drenta den e actividad aki cu un vision mas comercial.

El a bisa cu bo por gana cu piscamento. Pero nos ta papiando akinan di piscamento na gran escala. Mientras cu si e ta bay pisca, y e ta perde tur su ‘armacion’ ta algo ariba 100 florin el a perde.

E tin linea pa haci fondo cu mester inverti casi 2 mil florin pa un rol cu e posibilidad di perde nan, ora cu nan ta bay pisca. Den un actividad di piscamento dificilmente bo ta produci 2 mil florin den un dia so. Mientras cu e inversion ta hopi. No solo den material, sino mantencion di boto, motor, y logicamente combustibel.

Cada bes cu e ta bay pisca por lo menos mester gasta 60 florin di gasolin. Tin biaha nan ta bay y no ta coy niun pisca, ni sikiera un pisca di consuelo. Pero como piscado bakia e sa cu piscamento ta asina. “Tin dia cu ta sali bon y tin dia no.”

Pero mayoria di biaha nan ta bin practicamente bashi. Tin biaha djis pa come. Tin dia cu nan ta coy apenas algun par di pisca pa hasa na cas of regala na esunnan den necesidad. Awor cu e pandemia y e crisis economico a dal nos, esey ta loke regularmente Chen ta haci cu e piscanan, regala nan pa yuda algun conoci di dje.

Si piscamento artesanal ta duna espacio pa paga belasting? Chen ta haya cu si nan kier bin cu belasting pa e piscadonan, cuanto nan mester cobra pa pisca: “30 of 40 florin pa kilo?,” e ta puntra su mes.

El a haci un calculacion gewoon di su gastonan. Si nan ta hinca tur cos aden, manera e comerciantenan ta hinca den su productonan, si nan ta haci’e, niun hende ta bay paga pa pisca. Sin inclui e dianan cu nan tin perdida, sin sa si esey tambe ta wordo kita for di belasting.

Mas union

El a yega di participa den e poco reunionnan cu a wordo organisa cu e piscadonan pa trata e topico riba tratado y proteccion di cierto especienan di pisca. E no ta pertenece na niun grupo of club di piscado. E ta riba su mes, pasobra e ta haya cu tin hopi division entre e piscadonan mes.

E ta lamenta cu masha poco informacion ta wordo duna riba e asunto aki cu ta concerni na e piscadonan, muy specialmente e piscadonan cu ta depende directamente di piscamento.

“Ami ta haya cu nan mester tene reunion cu e piscadonan. Y e piscadonan mester ta mas uni.” E no ta importa si e piscado ta pisca cu canaster, liña, waya, reda of taray. Pa Chen esaki no ta e problema, pasobra cada un di nan ta provee pisca na famia pa sobrevivi cu piscamento. Asina humildemente e ta defini un piscado.

E no ta kere cu introduccion di cualkier ley ta bay traha, si no tin colaboracion di e mesun piscadonan. No ta trata di dos of tres piscadonan cu ta bay sinta cu gobierno, sino cu gobierno mester bay cerca e piscadonan mes.

Uso di harpun

Otro punto cu el a trece dilanti ta cu hopi hende ta fout contra e tiradonan di pisca. Antes e tabata tira pisca, pero e tin tempo cu no ta bay mas. E ta haya absurdo cu nan di cu e hendenan ta bay tira den coral, pasobra un bon scopet ta den carera di mil dollar. “Bo ta bay tira un scopet den un coral…. no!”

Pero e ta haya cu si nan kier bin restringi mas piscamento cu harpun, mester tene cuenta cu diferente aspecto cu e mesun actividad aki ta regula su mes. Si e ta un competencia internacional, un sorto di pisca so bo mester tira: “Esun mas grandi ta esun cu bo ta trece. Esey so ta conta.”

E ta haya cu e tipo di actividad deportivo aki por yuda pa trece nos economia bek, ya cu e ta un actividad masha gusta internacionalmente. Pero bo mester bin cu regla, y hopi parti di mundo tin e.

Mas bien e ta kere cu mester protege nos hendenan cu ta realisa e actividad aki, ya cu nan ta hendenan cu ta conoce lama bruto. Algun tempo pasa su rumannan tabata gusta tira pisca y polis a yega di busca nan pa bay yuda turistanan cu a cay awa na baranca. “Ta e hendenan ey ta scapa hende.”

Na final, Rosendo Henriquez, conoci como Chen, e piscado di e boto “Rybik” a laga sa cu generosidad y bondad ta caracterisa nos piscadonan. E ta cosnan cu ta nace di nos bieunan. E ta recorda cu su padushi tabata pisca y otronan tabata planta, y na final nan tabata troca. “Mi ta trece pisca pa bo y bo ta duna mi bonchi… No mester di placa e tempo aya. Awor tur cos ta placa!”