E pandemia actual di e coronavirus/Covid-19 su efecto social y economico a revela cerca nos, loke algun biaha a wordo bisa: “Na Aruba ta existi un pobresa disfrasa.” E tempo aya e frase aki a herida nos orguyo, pero lamentablemente awe e ta mustra nos otro realidad.

E solidarismo di instancianan di sector publico y priva, hunto cu e iniciativanan di clubnan social, asociacionnan, parokianan, fundacionnan, iglesianan, etc.. pa yuda alivia e necesidad cu cantidad di famia ta pasando aden, ta uno grandi, tambe di aplaudi y elogia. No solamente nan ta yuda personanan cu a perde nan trabao debi na e crisis actual, sino di hopi mas hende cu a perde nan trabao for di hopi tempo caba, pero tambe di esunnan cu a wordo explota laboralmente.

Solidaridad.
Un fundacion cu a dicidi di uni nan esfuerso cu e accion di solidaridad humanitario aki ta Asociacion Amigos de Colombia (ASOCOL). E ta un asociacion mas cu 30 aña di existencia. Apesar di su nomber, nan no ta haci diferencia riba nacionalidad, ya cu e necesidad no ta conoce nacionalidad. E biaha aki ASOCOL hunto cu fundacion Dominicano Juan Pablo Duarte, y emisoranan a dicidi di organisa un campaña di donacion di alimento yama: Uni Contra Covid-19.

Durante un entrevista cu Bon Dia Aruba, presidente di ASOCOL, Moises Fernandez a bisa: “Nos campaña ta pa full e comunidad di Aruba. Nos no ta discrimina cu nacionalidad. Nos no ta discrimina cu status social. Nos ta clasificando pa via di e necesidad di e personanan y e famianan cu necesidad.”

Fernandez a declara cu nan a dicidi di uni esfuerso den e situacion abnormal aki, caminda e parti social y economico di un gran parti di nos comunidad a wordo afecta. Nan ta purba di yega cu ayudo na un grupo di famianan ‘menos faboreci.’

Nan a clasifica e gruponan, entre nan: cabes di famia, mama y tata. Pues nucleo familiar grandi cu tin varios yiu. Tambe famianan cu tin hende handicap of cu limitacion fisico y tambe personanan di tercera edad of anciano.

E ta reconoce cu actualmente ta bira hopi complica pa nan bay verifica si e personanan of famianan cu ta bati nan porta, berdaderamente ta den necesidad. Nan si tin contacto cu otro organisacionnan cu ta brinda e tipo di ayudo aki pa evita cu e mesun hende ta bin dos of tres biaha, ya cu esey a yega di pasa.

Durante e fin di siman pasa, nan a logra di reparti ayudo alimenticio pa 65 famia. E tabata nan prome accion di reparticion di alimento y e weekend aki, nan lo bin cu nan di dos accion di pakete di alimento. Actualmente riba nan lista nan tin un cantidad di casi 40 famia cu nan kier yuda cu e pakete di alimento aki. Nan tin algun pakete cla y nan lo wordo entrega na e grupo cu tin mas prioridad debi na nan necesidad.

Mas ayudo.
Awe diasabra nan ta haci entrega di e pakete aki teniendo na cuenta e medidanan di higiena y distanciamento social. Nan ta tuma contacto cu e hendenan cu nan tin riba lista pa nan bin busk’e na un ora specifico y evita un rij largo of congestionamento.

Esun cu no por bin busk’e pa algun motibo, nan mes ta entrega pa nan. Eynan nan por mira e grado di necesidad cu e famia tin. “Definitivamente bo no por imagina e panorama cu nos a yega di mira, ora cu nos ta entregando e ayudo aki. Sinceramente bo ta haya bo geshock pa e situacion ey,” segun presidente di ASOCOL.

P’esey ASOCOL ta sigui bati porta cerca e companianan y personanan di bon curason pa duna nan un ayudo, pa asina nan por yuda otronan den necesidad. Fernandez a mustra su positivismo y esun di su team pa logra beneficia casi 100 famia cu e pakete di alimento aki. E ta gradici e miembronan di e team aki pa nan ayudo y sacrificio, nan ta: E tres ruman muhe Yurani Garcia, Jhojana Garcia, Yuly Garcia, Karen Reyes y Jimmy Garcia.

Fernandez a bisa cu si ASOCOL por logra ricibi mas ayudo y si e hendenan ta sigui colabora cu e asociacion aki, nan lo keda mantene e campaña di ayudo aki y bin cu e di tres accion of rond di entrega di ayudo.

“Nos intencion ta di por yega na un cantidad hopi mas grandi, pero e recursonan ta limita. Te unda nos por, nos ta yega,” el a bisa.