Dia 7 di maart ultimo, Biblioteca Nacional Aruba (BNA) su departamento Arubiana-Caribiana a introduci oficialmente su plataforma digital, pa asina tur hende por tin acceso na nan archivonan valioso cu ta consisti entre otro di potretnan y publicacion di un balor historico.

Peter Scholing, kende ta traha na BNA y su funcion principal ta investigado, pero tambe e ta parti di staf di e consehonan di e institucion aki; den su dobel funcion, e tin un rol importante den e proceso cu ta tuma luga na BNA pa loke ta conservacion di nos herencia documental. Pero tambe pa e bin cu posibilidad pa e investigadonan paden y pafo di nos isla por haci nan trabou miho. Of pa publico den general por tin acceso na informacion mas facil.

Hopi hende ta interesa den potret, caminda nan a yega di pone un coleccion di potret online (http://bna.aw/digital), pero ainda falta mas. Ultimo tempo nan ta poniendo atencion riba revista y corant cu nan a yega di digitalisa hopi tempo pasa caba. E ta sintetisa e importancia di e hecho aki bisando: “Si bo no ta existi online, bo no ta existi mes…”

Por ehempel, den e temporada aki di Pasco, nan a pone e siman aki un publicacion riba nan pagina di Facebook (bnaarubiana/posts/2516266741978091), riba cual tur interesa por wak recetanan di antes. “Nos tin un buki con pa traha un bolo y cuki di 1906 na Papiamento.” Pues den esaki, interes general tambe ta hunga un rol y no por ta exclusivamente material historico y cientifico. “Tambe mester mustra un interes general y popular,” el a bisa.

Proteccion herencia documental.
Scholing ta haya cu no necesariamente tur cos mester ta online. Pero si percura cu e ta digitalisa, pa e material lo por ta safe pa futuro. E ta considera cu esey ta e prome meta di e proceso aki. Si nan ta pone online pa publico, practicamente esaki ta un meta adicional.

Nan a bin den contacto cu un organisacion na Merca, esta Internet Archive, cu ta permiti cu nan por tin capacidad pa archiva cantidad di material cu un calidad digital halto di un forma gratis. Tambe Internet Archive ta archiva tur website di henter mundo y nan meta su tras ta cu nan kier pa tur informacion cu t’ey por ta disponibel. “Esaki ta un meta cu nos tambe ta comparti”, segun Scholing.

E mes ta consciente cu esaki no ta un trabou facil, ya cu tin loke e ta yama ‘tesoro scondi’’ den nan coleccionnan. Pero tambe tin hopi material pafo di nan coleccion, ya sea na Hulanda, Inglatera, Merca, Spaña, Venezuela, Colombia, Corsou, etc… “Tur caminda cu tin informacion cu ta forma parti di historia di Aruba.”

Scholing a bisa cu pa medio di e facilidad cu mundo digital ta brinda awendia, nan por purba trece esaki na Aruba bek, aunke nos no tin acceso na e material original. Pero esaki ta un aspecto cu BNA ta desaroyando pa establece contacto cu nan partnership internacional, tur caminda unda por tin algo cu tin di haci cu Aruba. Tambe cu nos por siña algo for di nan of cu nos por contribui cu nan.

“Nos ta haci nos trabou! Nos ta un isla chikito, unda nos tin un rol nacional como biblioteca publico. Pero nos ta percura pa nos impacto no ta solamente na Aruba, pero tambe pa esunnan cu a bay studia na Hulanda of bay biba pafo di Aruba.”

Digitalisacion.
Un instrumento vital pa logra e meta aki ta nan plataforma digital. E hecho aki tabata resultado di un trabou di digitalisacion di algun par di aña. Pero locual tabata falta tabata un plataforma cu nan mes por a maneha, ora cu nan tabata digitalisa algo pa pone disponibel mas lihe y miho posibel. Igualmente nan ta den e proceso di link cu nan propio coleccion bek. Riba tur material nan tin cuenta cu e ley di proteccion di derecho di autor.

Nan ta sigui cu e trabou pisa aki, cu no ta uno facil. No solamente pa e cantidad di material cu mester digitalisa, sino cu nan no tin mucho trahado y nan presupuesto ta limita. Mientras cu di otro banda nan tin hopi trabou pa haci pa percura cu nos herencia documental ta keda digitalisa, y safe pa e siguiente generacionnan. Esaki ta demanda cu nan mester ta mas creativo. P’esey e ta haci un yamado pa esunnan interesa di realisa trabou boluntario por acerca cerca nan.

Nan a cuminsa cu e proceso di digitalisacion un par di aña pasa. Awor nan ta bezig entre otro cu pone henter nan catalog di biblioteca online tambe. Igualmente nan bukinan, caminda bo por selecta online for di bo cas e material cu bo kier consulta prome cu bo ta bishita e biblioteca mes. E ta un hecho cu ta bay sosode pa 2020.

Apelacion.
Scholing a relata cu tin algun aspectonan cu nan ta considera den e trabou di digitalisacion aki. Un di nan ta con fragil y unico un documento, potret, etc. por ta. El a splica cu por ehempel si bo ta papiando di herencia documental, un di e peligernan den Caribe ta cu un desaster natural por bira un menasa pa nan. “Si algo ta bay perdi, si ta un ehemplar so cu ta den e biblioteca, bo tin cu sigura cu bo tin un backup…”

Na final, Scholing a haci un apelacion pa nos comunidad. “Tin hopi informacion scondi den nos biblioteca. Pero tambe tin hopi informacion scondi of cu ta warda den casnan di hende.” Por ta tin hende den nos comunidad cu tin algo mas bieu ainda di loke nan tin den nan coleccion. BNA su departamento Arubiana Caribiana ta na spera di por haya nan.

E potret mas bieu cu nan tin den nan archivo ta data 1880, y e ta un barco di guera staciona dilanti di costa di Aruba. Pero tambe nan tin potretnan di diferente epoca di nos desaroyo economico, entre nan tempo di oro y fosfaat.

E aña aki nan ta celebrando 70 aña di existencia, caminda nan kier bin cu un exposicion y buki pa mustra publico con importante nos herencia documental ta. Ainda nan ta den celebracion, y dia 20 di januari awor ta Dia di Biblioteca, y nan tin plania un ‘open dag’ pa asina mas hende cera conoci cu nan coleccionnan.