Abuso ta un palabra mahos y doloroso. Un palabra cu ta describi herida cu ta dificil pa cura y si nan ta cura, e ta laga cicatriz atras.

No ta facil papia di abuso y menos riba abuso cu a yega di bati e porta di bo curason. Paula Nahr a yega di hacie. Y un biaha mas e ta purba di hacie durante e entrevista aki. E biaha aki e ta reconoce cu e situacion aki no ta facil p’e, y menos pa esunnan cu ta rond di su circulo familiar. Un dolor cu hopi famia y persona a pasando aden, ora cu un ser keri inocente a wordo abusa y te ainda nan no por a logra no solamente husticia, sino sanacion di nan dolor.

Paula ta consciente cu e unico forma pa vence cualkier sorto di abuso ta contraresta e abuso cometi pa asina bo por haya e sanacion tan anhela. Esey ta loke el a haci y e kier pa otronan cu ta pasando den e mesun experiencia di dolor cu el a pasa, por hacie. Pa asina finalmente bo por sinti e liberacion y alivio di tanto peso den bo curason.

Defensor

Paula Nahr su nomber no ta desconoci na comunidad di Aruba. E ta defini su mes como un defensor di derechonan humano cu kier enfoca riba derecho di mucha. Tambe e kier enfoca riba e comunidad gay cu ta victima di discriminacion. “Mi no tin label!,” el a bisa.

El a yega di enfoca riba violencia domestico, bullying, embaraso hubenil y prevencion di trafico sexual. Awor Paula su reto ta enfoca riba e problema di abuso sexual di mucha. E ta haci esaki pa medio di Switch Foundation, cu ta un fundacion independiente cu ta produci documentarionan pa preveni riba problemanan social. Nan ta problematica cu nos por keda husga y ataca, pero e gran pregunta ta: Con pa preveni esaki?

E ta sinti cu gewoon un yamado e kier haci pa hende bira mas consciente di nan derechonan pa asina yuda nan libera nan mes di nan miedo. Pero tambe pa duna un bos na e vulnerabel. Pa logra esaki e ta uza e plataforma cinematografico y artistico. “Esey ta mi amor. E ta manera, mi no por un, sin e otro.” E no ta djis un video, sino cu e ta gusta investiga pensando con e por hacie visualmente artistico y cu nan por haya atencion. Pero fundamentalmente cu nan por laga un enseñansa atras.

Abuso y sanacion

E ta describi su siguiente reto como un “yamado” of forsa iresistibel den dje cu semper e kier yuda pa atende un situacion cu un dimension social profundo. Nan ta situacion compleho cu ta parti di un realidad. Pero ora bo ta drenta den dje pa compronde e comportamento di ser humano. E ta un laberinto cu diferente rutanan, entre nan e psicologico.

Un proyecto di e dimension aki ta demanda un trabou di investigacion. El a hacie caba cu algun fundacion cu ta brinda ayudo riba caso di abuso sexual. Pero nunca e por imagina cu no solamente e lo keda riba tereno di investigacion, sino cu el a yega di experiencia den su mesun cuero cu un mucha masha stima p’e.

E hecho aki tabatin un impacto grandi p’e. E no por a traha y tampoco e no tabatin motivacion. E ta haya cu ora cu tin un caso di abuso di mucha ta full e famia a wordo abusa, pasobra e ta afecta tur hende.

Pa logra sali for di e situacion aki mester di hopi fortalesa spiritual y mester habri bo mente y curason na e sanacion emocional. E proceso aki a tuma mas cu un aña y finalmente el a bin cu e decision di hacie publico tambe. “Pero mi a hacie cu un proposito,” el a bisa.

Naturalmente den un situacion asina delicado tabatin miembronan di Paula su famia cu no tabata di acuerdo, pero el a prepara p’e, incluyendo esunnan mas cerca di e situacion aki. “M’a primitie cu e cos aki ta cero sensacionalismo.”

Paula kier bin cu un documentario cu testimonionan di exito di sanacion, incluyendo su mesun experiencia como tanta. Pero tambe con e ta logrando cura su famia den tempo record. E documentario ta pa yuda pa medio di entre otro tayernan di sanacion pa preveni y yuda cura e famianan y hobennan di trauma sexual.

E ta duna herment kico a yud’e pa sali for di e prizon di su dolor y rabia. Nan ta metodonan, terapia y informacion cu e por a haya digitalmente via YouTube. Durante Paula su investigacion a bin realisa cu meditacion ta un metodo hopi fuerte. Ya cu ta comproba cu emocion ta un energia cu ta genera un blokeo den nos.

El a bisa cu nos mester siña cu nos mente cu nos ta sinti loke nos ta pensa. Pero nos mester tin e poder di por transforma y libera nos curpa di emocion pisa. “Pero niun hende ta siña nos e cos ey. Un di e cosnan cu mi mester a siña ta: Paula saca bo mes for di energia di victima y empodera bo mes cu ‘si’. Y mustra un historia diferente.”

Poder di Amor

E biaha aki, Paula su proyecto The Power of Love of Poder di Amor ta uno cu ta consisti di 8 serie cu lo wordo desaroya entre 18 pa 24 luna. E nomber subhetivo aki ta pasobra den un situacion di crueldad, herida ta wordo ocasiona. E ta tuma hopi curashi pa despues di e experencia traumatico aki, bo por duna amor y pordon.

E realisacion di e proyecto aki ta depende di e factor financiero y con e ayudo aki por drenta pa bira realidad. P’esey e ta recuri pa tur hende mustra su solidaridad cu e proyecto aki pa medio di e cuenta di fondo cu el a lanta. E ta bin cu un campaña pa tur hende por yuda cu un dollar of e suma cu un hende por duna libremente. Esun interesa pa contribui cu e proyecto di dimension social aki por tuma contacto cu Paula via WhatsApp na 594-5133. Tambe via YouTube: Switch Foundation Aruba.

E prome proyecto nan kier colecta 25 mil dollar. E ta conta e historia personal y hopi inspirador di 12 persona creativo di Aruba. E ta un proyecto intuitivo pa stimula nan, ya cu no solamente nan ta bon den loke nan ta haci. Pero pa Paula e aspecto mas importante ta e ser humano y nan sensibilidad. “Nan ta haci loke nan ta haci cu proposito pa mehora e bida di esnan rond di nan.” Nan ta uza nan creatividad pa brinda e bondad y haci realidad nan soño.

Pero tambe nan kier cuminsa graba videonan cu expertonan relaciona cu informacion pa cura trauma sexual. Por ehemplo na Aruba mes nos tin hendenan dedica na terapia pa medio di arte y hendenan dedica na sanacion emocional holistico, etc… E bon intencion tras di e proyecto aki ta cu e video aki por ta accesibel pa tur hende.

Di e 8 serie di The Power of Love, cuater di nan ta bay riba e documentario, informacion y tayernan pa cura e traumanan sexual. Por ta tin hendenan cu ta skeptico cu si mirando un video nan por haya e ayudo necesario. Paula ta bisa cu informacion ta tur cos, ya sea un guia of testimonio. E ta sinti cu locual a yud’e pa haya speransa y animo bek tabata di scucha otro hende nan testimonio cu si por. “Tin biaha e miho ayudo ta un palabra… ta un motivacion… Asina poderoso palabra ta!”