E pastoor Arubiano, Jairo Maduro ta un miembro di clero Catolico no convencional y te hasta tin biaha, controversial.

E ta un pastoor sirbido di Dios cu ta alegre, cherchado y musico. E ta gusta innovacion y tecnologia audiovisual den su trabou di pastoor. E ta gusta social media, y te hasta e ta gusta deporte extremo.

Misa na Spaño.
Bon Dia Aruba a entrevista pastoor Jairo, kende ta encarga cu e parokia Inmaculada Concepcion na Santa Cruz, unda recientemente el a inicia un proyecto religioso nobo. Esaki ta e celebracion di Santo Sacrificio di Misa na Spaño, tur diadomingo pa 10or di mainta.

-Pastoor Jairo, kico ta nifica pa Iglesia Catolico na Aruba y pa comunidad di Sta. Cruz celebra misa na Spaño?

El a bisa cu Iglesia ta mama y maestro, y esaki kiermen cu nan mester ta habri. E ta considera cu tur hende cu ta biba riba e isla aki tin un alma. Nan tur tin derecho di scucha palabra di Dios.

Nos tin presencia di hopi hende di afo, specialmente di comunidad Latino na Aruba. El a aplaudi cu misa Birgen di Fatima a bin cu e iniciativa aki, cu ta algo di aplaudi. Y awor Misa Inmaculada Concepcion a cuminsa habri su porta pa e tipo di celebracion Eucaristico aki na Spaño, y el a cuminsa bay bon.

E ta mira cada siman cu e ta crece. Ya caba e tin dos siman y basta hende ta biniendo. “Si nos tin e potencial y capacidad di maneha e idioma aki, anto cu mucho gusto nos ta uza e talento aki cu Dios a duna nos…”

Encuanto con e parokianonan di Sta. Cruz a tuma e proyecto aki, e ta haya cu tin sentimento mixto, ya cu pa prome biaha ta wordo celebra misa na Spaño den e districto aki. Pero asina mes e Iglesia tin cu sigui cana y sigui su trabou. E ta un yamado mes di Iglesia pa cada pastoor cu por maneha idiomanan por haci’e pa tur hende sinti cu nan ta yiu di Dios y rumannan di otro.

“Iglesia tin un mision so door di hiba e palabra di Dios y tambe trece almanan pa Cristo.” Considerando e mision aki, nan no ta papia ni di nacionalidad y tampoco nan no mag di pone frontera, ni obstaculo.

E no ta kere cu esaki ta bira un competencia pa otro parokia cu ta bin celebrando misa na Spaño pa basta aña. Ora cu el a dicidi bin cu e idea aki, el a yega di papia cu pastoor Daniel cu ta esun cu a bini cu e iniciativa aki mas cu un decada pasa na Dakota. “Pastoor Daniel a duna mi su bisto bueno y pastoor Jozeph tambe.”

Un motibo ta cu e concurencia di parokianonan cu ta bay Misa di Dakota ta grandi y e misa aki ta resulta chikito hopi biaha. Entre coleganan religioso, pastoor Jairo a haya un reaccion positivo. “Pa kico no! Nos ta iglesia y nos ta ruman den sacerdocio y nos no ta competi.”

Evolucion y social media.
Iglesia ta evoluciona cu tempo tambe. Awendia e ta uno di mas participacion, apertura y inclusion. Sinembargo e ta haya cu na Aruba nos ta conoce hopi manera di pensa ainda cu ta di antes.

“Iglesia tin cu sigui avansa uzando metodonan nobo cu modernidad ta tira den nos direccion.” P’esey e ta hopi involucra den tecnologia y social media. E ta haci uzo di e instrumento aki pa plama palabra di Dios no solamente na Aruba, sino den henter mundo.

Actualmente for di Misa Inmaculada Concepcion nan ta transmitiendo en bibo na Papiamento. Pero tambe esunnan cu ta biba afo por wak e misa na Spaño. Pastoor Jairo tin otro proyecto na caminda, e misa na Spaño lo wordo transmiti via Tele Jesus na New Jersey.

“Nos tin e capacidad di haci esey. Nos ta uzando tur medio pa hiba palabra di Dios. Kiermen Iglesia ta bay cu tempo” cu masha orguyo el a bisa. Recientemente el a haci e transmision historico di e ordenacion di e Diaconal nan na Aruba.

Hobby.
E ta un di e poco pastoornan na Aruba cu tin su pagina di Facebook tambe. Den dje el a publica su potret unda e ta aparece den aire despues cu el a lansa su curpa for di avioneta pa haci sky dive.

El a bisa cu ta e hende humano ta esun cu ta bira sacerdote, ya cu Dios ta yam’e pa bira sacerdote. “For di Testament Bieu te Testament Nobo, bo ta mira Dios a bay den direccion di hende.” Y esaki ta inclui tambe e hendenan cu su hobbynan.

E ta un musico trompetista. Igualmente tempo cu el a sigui su vocacion sacerdotal na Venezuela, e tabata haci sky dive y bula for di avioneta.

E ta kere cu como sacerdote tambe nan tin derecho riba recreacion. Ademas e ta haya cu nan bida di oracion ta hopi accentua den nan. Tur e combinacion aki di su bida como religioso combina cu su hobbynan ta haci cu como pastoor e ta sinti su mes contento. E ta un forma evidente pa reconoce e grandesa di Dios cu a dun’e asina tanto talento. “Cu no ta pa mi, pero cu humildad mi ta sirbi otro cu nan,” el a bisa.

 

Riba Facebook e ta accesibel pa tur hendenan. Sinembargo tin algun di nan sin prudencia tin biaha ta tira palabra den su direccion. P’esey den su pagina di Facebook el a bin cu un frase cu ta hala basta atencion, principalmente si e ta bini for di un pastoor: “No falta mi respet. Mi tambe tin boca!” Cu esaki e kiermen cu nos tur tin dignidad y niun di nos ta yama pa tira dignidad di un hende abou. “Nos sa cu diabel ta existi y e ta uza tur su medionan, incluso hendenan.”

E ta haya cu sacerdote ta un figura cu satanas no ta gusta, specialmente ora e ta na altar y den confesionario. Tur manera e ta mira cu Iglesia ta haya su problemanan.

E ta lamenta cu na Aruba, e ta exigi respet pasobra no ta posibel cu un hende ta falta bo respet. E ta corda e parti den Bijbel cu ta mustra cu Hesus dilanti di Ponsio Pilato. El a bisa: “Ya Hesus a manifesta cu e ta yiu di Dios, y cu e ta Rey. Un soldad a dal’e un cant’i man. Anto Hesus a puntr’e: Si mi no a bisa nada malo pakico bo ta dal mi, anto!”