Parkinson ta un malesa neuro-degenerativo cu ta afecta mas cu 200 persona na Aruba. Dia 11 di april proximo ta Dia Mundial di Parkinson, un dia cu tur organisacion y fundacion rond mundo ta realisa actividad informativo of recreativo pa conscientisa riba e malesa aki.
Dr. Roberto Weiser tin un fam Aleman, pero e ta un Venezolano naci na Caracas cu un personalidad masha amabel y cordial, kende ta un specialista neurologo. Actualmente e tin dos aña trahando na Dr. Horacio Oduber Hospital.
E ta un miembro boluntario di e fundacion Organisacion Parkinson Aruba (OPA) kende a relata cu na aña 1817, Dr. James Parkinson pa prome biaha a describi e malesa aki. P’esey e malesa aki ta carga su fam awendia. Pero tambe dia 11 di april, James Parkinson a nace y pa honra su natalicio a institui dia 11 di april como Dia Mundial di Parkinson.
E fecha aki no solamente tin como meta e parti di conscientisacion, pero tambe pa esun cu tin e malesa por sinti cu e no ta su so. “Sino cu tin mas hende cu tin e malesa, pero tambe cu tin hendenan cu ta preocupa pa nan,” el a bisa.
Malesa di Parkinson.
Weiser a declara cu e malesa aki ta uno neuro-degenerativo di e sistema nervioso central. E ta di e mesun famia cu Alzheimer cu a bira e prome malesa mas frecuente di e categoria aki.
Nan ta malesanan pa cual no tin un cura definitivo, pues e ta un malesa cronico. Ademas e causa of motibo ta desconoci ainda. “E ta bin di su mes sin motibo ni rason.” Pero si tin remedi y te hasta cierto operacion cu por yuda mehora e calidad di bida di e pashentnan victima di Parkinson.
–Con nos ta para na Aruba pa atende e tipo di pashentnan asina?
“Mi ta pensa cu hopi bon”, el a contesta. Nos tin un clinica neurologico y nos tin cuater specialista riba e tereno aki. Tur di nan tin bon preparacion y profesionalismo pa duna un diagnostico di e malesa aki.
Na Aruba nos tin cierto remedinan cu ta yuda e pashentnan local di Parkinson. Nos no tin tur e remedinan pa alivia e malesa aki, pero si e mayoria di nan cu ta necesario pa haya den e mehoransa pa e malesa aki.
Tambe tin operacion cu ta haci na Bogota, (Colombia) via AZV. Nan ta pashentnan cu ta wordo selecta prome, ya cu no tur di nan ta candidato pa un operacion asina. E ta depende di e situacion di e pashent su caso particular. Den e operacion ta pone un aparato den e cerebro mes. Aunke e no ta stop e malesa, e ta yuda cu e calidad di bida di e pashent. Di esunnan cu a haya e tipo di operacion aki nos tin bastante na Aruba. E ta un alternativa pa e pashentnan, ya cu algun di nan no ta haya un bon resultado cu remedi.
Aworaki nan ta buscando un bon sitio pa asina e pashentnan por sigui haya mas yudansa manera ehercicio, movecion, training, logopedista, etc.
Pashentnan.
El a bisa cu malesa di Parkinson tin un patronchi di pashent cu ta mundial. E ta alrededor di 100 pa 200 pashent pa cada 100 mil habitante. Na Aruba nos tin un poblacion entre 100 mil pa 120 mil habitante, pues nos ta den e margen di e standard mundial di pashentcu Parkinson. E no ta un malesa cu ta discrimina, ya cu tur hende den cualkier pais por bira victima di dje.
Sinembargo e cifra por ta mas grandi na Aruba, ya cu nan tin entre 100 pa 150 pashent di Parkinson registra oficialmente den nan fundacion, pero sigur lo por ta mas cu esey. Weiser a haci un yamado pa e famianan di esunnan cu tin un diagnostico caba y cu no a registra ainda, of esunnan cu por pensa cu tin e malesa aki, pa tuma contact cu e fundacion. E organisacion aki su meta principal ta pa duna ayudo na e hendenan cu tin malesa di Parkinson. Nan por tuma contacto cu e fundacion via Organisacion Parkinson Aruba su pagina di Facebook.
Sintomanan.
–Dr. Weiser, cual ta e señalnan cu un malesa manera Parkinson ta manifesta su mes, y cu nos mester tene cuenta cu nan?
El a splica cu Parkinson tin tres señal of sintomanan principal. Un di nan ta temblamento cu ta manifesta su mes generalmente ora cu e man ta abou. P’esey nan ta yam’e como ‘temblamento di reposo’.
E di dos señal ta cu e persona su musculonan ta bira stijf. E di tres señal cu Weiser ta considera mas importante ta ora cu e persona ta bira slow, y e ta bay poco poco. Kiermen su canamento ta hopi slow. E no por move su brasa, tampoco su pianan. Sino cu e ta bira stijf y cu temblamento.
“Si tin e tres sintomanan, ta hopi probabel cu e pashent por haya malesa di Parkinson,” el a declara na Bon Dia Aruba. Sinembargo e ta aclaria cu no tur hende cu por ehempel tin temblamento tin malesa di Parkinson. Sino cu prome e persona mester haya un bon diagnostico.
E persona mes of nan famia cu tin sospecho cu por tin e malesa aki por bishita su dokter di cas y pidi un carta pa haya un cita cerca un neurologo. E ta un forma pa e pashent por haya un diagnostico for di e specialista aki y asina cuminsa cu un tratamento medico.
