Entrevista cu Monseñor, Luis Secco: Preparacion di Confirmacion lo bira mas profundo y largo

Segun datonan di e ultimo Censo realisa na 2010, ainda mayoria di nos comunidad ta practica Fe Catolico. Sinembargo durante e ultimo añanan e creyentenan di religion Catolico a cuminsa mengua.

Tur aña durante luna di october, Monseñor Luis Secco ta bin establece su mes na Aruba, durante temporada di Confirmacion, cu e firme proposito di confirma religion Catolico cerca nos futuro generacion. E ta un di e tres sacramentonan di iniciacion Cristian, cu manera e mesun palabra ta bisa, e ta nifica afirma of consolida nos Fe Catolico pa asina completa e obra realisa cu e sacramento di Bautismo.

Temporada di Confirmacion.
Durante un entrevista cu Bon Dia Aruba, Monseñor Secco a expresa su gran alegria y satisfaccion cu alrededor di 400 mucha di 6e klas a wordo confirma. Pero pareu a expresa su preocupacion, ya cu e muchanan aki no ta hayando e ehempel adecua pa sigui cultiva nan Fe Catolico, manera mester ta.

Tur aña, Monseñor Secco ta dedica su mes pa administra e sacramento aki den e nuebe parokia cu clero Catolico tin na Aruba. Plus un grupo di adulto cu ta prepara e ceremonia aki hunto cu e hobencitonan cu a confirma. Nan ta muchanan entre 12 aña pariba cu a caba 6e klas pa bay scol secundario of avansa.

Ya caba nan a cuminsa inscribi caba pa otro aña. Pero e biaha aki, Monseñor kende ta na cabes di nos Diocesis na Willemstad, a pidi pa prepara e hobencitonan aki di un manera mas profundo y largo. For di januari 2020 te cu november venidero lo ta un temporada di preparacion exhaustivo. E candidatonan pa ricibi sacramento di Confirmacion, mester sigui e celebracionnan y fiestanan di e aña liturgico, entre nan Cuaresma, Pasco, Pentecoste, etc…pa nan por yega cu mas formacion. “Pero esey nos ta mira cu no ta suficiente,” asina cu preocupacion Monseñor Secco a expresa.

E por mira for di e cantidad cu a Confirma e aña aki, si un 10% ta sigui bini Santa Sacrificio di Misa ta hopi. E ta haya cu ta algo similar di loke ta sosode despues di Prome Santa Comunion. “E por ta un bon estadistica,” el a expresa. Pero nan ta confronta e situacion cu despues di Confirmacion, ya parce como cu tur cos a caba, y nan no ta bin mas hunto pa sigui fortalece nan Fe.

“Mayornan mes ta bisa: Ya bo a confirma. Y e muchanan mes ta bisa: Mi a confirma. Kico mas…” Monseñor ta haya cu nan no ta compronde cu pa medio di Confirmacion, nan ta cuminsa un etapa. Esey ta e etapa di confirma na creencia Catolico. Kiermen nan mes como hoben Catolico bin misa minimo tur diadomingo.

Fortalece Fe Catolico.
Algo cu Monseñor ta haya bunita ta cu tin muchanan cu a pone den e carta cu nan kier bira lector, misdienaar, collectant of forma parti di un coro infantil. E ta haya cu tur esaki ta posibel, pero ta depende di e creatividad di cada parokia. Igualmente e catecista tin biaha ta busca e manera pa sigui congrega nan pa sigui cu nan practica di fe. El a trece como ehempel e grupo di Amigonan di Hesus y Maria, cu e religioso ta haya ta bin haciendo un trabou fantastico. “Ami ta kere cu esey ta e manera pa e hobennan sigui,” el a bisa.

Moseñor Secco ta considera cu esakinan ta un punto di evaluacion di su presencia den e luna di november na Aruba. Ademas durante su estadia el a probecha pa bishita algun scol secundario. El a papia cu e hobennan, caminda el a duna nan un mensahe como scol Catolico y tambe como hobencitonan cu algun di nan a caba di confirma. “Como scol Catolico mi ta insisti riba e balornan di Fe y di comparti tambe nan bida Cristian cu nan participacion den misa diadomingo, etc…”

E ta haya cu como Iglesia na final nan mester sigui insisti. Den esaki Monseñor a referi na e triangulo cu ta consisti di: scol, famia y parokia (Iglesia). Si den e tres ambientenan aki nos por yuda nos hobennan, e por premira cu eventualmente e contesta por ta mas fuerte y nos futuro generacion por sinti mas animo.

Un tarea cu Monseñor ta considera importante ta cu nos mester yuda e muchanan compronde pa kico mester bay misa, kico ta nifica Santa Eucaristia diadomingo. Tambe e momento di por scucha palabra di Dios y ricibi Santa Comunion. E ta lamenta cu tur e elementonan spiritual aki a bira un manera cu no ta wordo aprecia mas. Te hasta a bira un reto dificil pa sa con por transmiti cerca e muchanan e balor di Santo Sacrificio di Misa.

E ta conclui cu si ‘mayornan mes no ta haci’e. Si mayornan ta ocupa henter siman, y despues diadomingo no tin tempo pa bay misa, lubida cu e mucha tampoco ta bay. Esey ta mi conclusion’.

Sinembargo e ta considera importante pa laga nos sigui purba y sigui anima e hubentud, pasobra e futuro ta den man di nan. Si nos hubentud ta perde e balor di fe, balor di Dios y di principionan Cristian, nan ta perde tur cos. Esaki ta un punto -segun Monseñor Secco- cu nos tin cu pensa y realisa keto bay.