Entrevista cu Minister Otmar Oduber: ‘Hopi hende no ta mira un politico como un ser humano comun y coriente’

Mañan, Minister Otmar Oduber ta pone punto final na mas cu 22 aña di carera politico. Bon Dia Aruba a tene un entrevista cu a bira mas bien un combersacion espontaneo, natural y habri cu e mandatario.

-Cual ta minister Otmar su sentimento na bispo di entrega su cartera y retira for di politica?
“Un par di siman pasa mi tabata anhela e cambionan. Logicamente ora e dianan ta yega mas cerca, e sentimento ta manera un matrimonio. Ora bo bay casa e dia prome toch ta yena bo cu un sentimento mixto di kico ta bay pasa despues…”

E mandatario tabata mustra trankil den su oficina ministerial nechi drecha y organisa den edificio Cocolishi na Bestuurskantoor. El a haci referencia cu practicamente su kantoor ta su laptop, caminda haciendo uzo di tecnologia e ta ricibi tur sorto di informacion y documento di e departamentonan cu ta resorta den su Ministerio di Infrastructura, Desaroyo Teritorial y Medio Ambiente. “Mi caracteristica ta uno semper di tin innovacion. Di ta moderno y di trece cambionan positivo pa gobernacion di Pais Aruba.”

E mandatario a laga sa cu su preocupacion aworaki no tin di haci cu e no ta minister mas, y cu despues di 22 aña no lo ta den politica activo mas. “E ta e pregunta continuo den seno familiar riba kico despues di diahuebs awor.”

Pa Oduber, esaki ainda ta un incertidumbre. Aunke el a laga sa cu su intencion ta pa bay den sector priva, eherciendo su profesion y experiencia den tereno di turismo y hospitalidad pa medio di un oficina di consulta. E no tin intencion di bay afo, sino cu e lo keda biba na Aruba. “Mi lo dedica completamente na e aspecto di turismo cual ta semper loke mi tin un pasion grandi p’e.”

Retiro.
Dia 17 di september ultimo, Minister Otmar Oduber a anuncia oficialmente su retiro como minister y como politico. E anuncio aki a sorprende un gran parti di nos comunidad, te hasta su hendenan mas cerca di dje. Hopi rumor a wordo haci rond di e decision aki. Apenas cu 48 aña di edad, unda el a fungi 8 aña como parlamentario y casi 10 aña como minister, ainda e lo por tin un futuro mas largo como politico.

Segun e mandatario, el a planifica un salida for di politica diferente na cualkier otro circunstancia y politiconan den pasado. E ta convenci cu e ta retira for di politica den su miho momentonan, mirando e trabou cu a wordo haci y e aceptacion den comunidad. No tin un duda cu minister Otmar Oduber ta un di e politiconan mas mediatico y popular durante e delaster decada.

Oduber a cuminsa politica cu 23 aña. No solamente el a dedica 22 aña so den politica, pero 18 aña di nan el a yega di haci’e den un posicion ehecutivo of legislativo. “Cu ta consumi bo y absorbe bo hopi pisa,” e ta admiti.

Igualmente e ta corda cu tempo el a drenta politica e tabata yama e politiconan veterano como ‘dinosaurio’ den politica. Despues di 22 aña, los di edad cu e mandatario tin, e ta kere cu cierto momento si e ta keda un poco mas, e mes lo bira un dinosaurio den politica.

“A pesar cu mi tin hopi idea ainda, e ta momento pa duna oportunidad pa pensamentonan fresco y nobo.” E ta considera esaki den cuadro cu otro aña nos ta drentando na un decada nobo 2020.

–Minister a visualisa un despedida asina for di politica?
E ‘si’ cu a sali for di Oduber su boca tabata uno firme. “Cierto momento mi no a pensa nunca cu e lo bay sosode. Pero mi tin cu bisa cu mas of menos 6 luna pasa, mi a papia cu prome minister. E tabata e prome hende cu mi a papia cune. Mi a bis’e kico tabata intencion y kico tabata e rason tras di esaki.”

–Kico a pusha minister pa tuma e decision aki?
“Mi a bisa hopi biaha cu tin hopi di haci cu mi salud. Mi salud a pone mi pensa hopi riba mi famia y riba mi mes tambe.” Pero e decision aki no solamente tin di haci cu Oduber su salud, sino combina cu aspecto di famia y cu un reto nobo.

Unabes cu el a tuma e decision di su renuncia, e tabata categorico den dje. Esaki a pesar di cualkier pronostico positivo pa un siguiente eleccion. Pero el a reitera cu: “E biaha aki e decision di Otmar ta pa Otmar y su famia.”

–Cual tabata minister su aporte mas grandi?
E ta haya cu durante 18 aña di carera como miembro di parlamento y como minister hopi decision y logro importante a yega di sosode. “Pero mi ta keda kere cu esunnan cu mas ta resalta y mi ta kere cu tin un influencia te dia di awe hopi grandi pa pais Aruba, ta e momento cu nos a dicidi di independisa e Oficina di Turismo di Aruba (ATA).”

E ta considera e proceso aki un logro grandi, ya cu durante 28 aña a haci intento cu a haya contratiempo. Sinembargo como minister di Turismo, el a determina su mes pa convence tur hende di e beneficio cu e cambio aki por nifica pa nos pais.

“Awe nos ta orguyoso di e oficina di turismo cu nos tin!” ATA tabata un instancia publico cu tabata costa pueblo di Aruba miyones anualmente, alrededor di 37 miyon adicional. Awe e ta un institucion independiente y exitoso cu a permiti cu nos turismo a crece. Pero tambe ATA ta paga gobierno bek ariba 20 miyon florin tur aña na dividend. El a bisa cu esaki tambe tabata su vision cu Serlimar.

–Cual tabata minister su desapunto of pegamento di barco mas grandi?.
“Por ta e proyecto cu lamentablemente no a bay door. Of no a continua, of ainda no a continua, ta e Ley di Serlimar.” E ta considera e ley aki ta importante pa aspecto di salud y di medio ambiente. Pero e ta haya cu e ley a wordo hinca den un discusion politico cu a bira hopi grandi rond di dje. Esaki a haci cu tur hende a perde enfoke ariba e meta cu e ley aki tin. “Mi ta spera cu e ley t’ey. Cu e reunion mester continua y mi ta spera cu e minister cu ta continua por pick esaki up.”

–Cual tabata bo decision mas dificil como politico?
E ta haya cu e decision mas dificil tabata bandona un partido cu el a forma parti di dje y sostene pa 27 aña. “E tabata esun mas dificil pero… mi ta kere esun mas corecto tambe.” El a bisa cu e decision aki tabata inspira riba integridad y conviccion personal cu bo mester para pa bo principionan.

El a agrega cu durante e gobierno anterior, su persona a yega di duna espacio necesario na varios ocasion pa coregi cierto cos cu e no tabata di acuerdo cu nan, pero lamentablemente no a wordo coregi.

“Por ta bon pa mi of lamentabel pa e partido ta cu tur e cosnan ey cu mi a papia riba nan, awe ta bin na luz di dia y ta bira un realidad.” El a bisa cu ocho di e puntonan cu el a bay Gobernador cu nan, cinco di nan a bira obvio. “Hopi hende ta realisa aworaki cu no tabata un mala criansa di Otmar of un rebeldia di Otmar.”

A pesar di tur cos, e ta considera cu e tabata un decision ‘hopi duro y dificil’. Principalmente siendo cu e tabata e di dos politico cu mas voto na momento cu el a tuma e decision aki. “Pero hopi lihe mi a sinti mi hopi satisfecho pa e decision cu mi a tuma.”

–E decision aki a afecta bo hopi?
“No! E no a crea hopi enemistad. Mi a keda cu hopi amigo den e partido ey. Claro, tin rasguñonan pasobra na final e kiebro a significa un caida hopi grandi pa e partido cu mi tabata forma parti di dje.”” Aunke e no tin un amistad manera antes cu su coleganan mas cercano di partido, entre nan e lider di partido mes, e ta salud’e.

“Mi ta saluda nan manera mi ta saluda cualkier ser humano, pasobra ami no ta tene niun hende na curason. Trabou ta trabou y politica ta politica.” E ta kere cu hopi hende ta falta di siña for di dje ainda. “Pa educa cu cierto momento dolor cu bo por tin y diferencia cu bo por tin den trabou y den politica, mester keda pa loke nan ta. Y no mester touch e relacion humano cu nos tin den nos bida cotidiano.”

E mandatario ta consciente di su habilidad. “Dios a duna mi un vocabulario cu hopi biaha mi por a defende mi mes elocuentemente.” Esaki a bira un instrumento fundamental den su bida politico. Ademas e ta reconoce cu e parti mas duro di politica ta e parti humano.

“Hopi hende no ta mira un politico como un ser humano comun y coriente. Y nos ta un ser humano comun y coriente!” A pesar cu e ta considera su mes como un persona hopi fuerte, e ta sinti cu politica na Aruba a degenera den e ultimo añanan hopi na un nivel personal. En bes di mantene su mes na un discusion di bienestar general di e pais.

E no ta nenga cu como politico, y specialmente como parlamentario, e tabatin un caracter fuerte. Sinembargo e ta sinti cu ora el a bira minister, el a cambia substancialmente. El a bira mas ehecutivo y el a adapta su mes den e rol aki.

–Con Otmar Oduber lo desea cu pueblo di Aruba lo recorda bo?
Prome cu el a contesta e pregunta aki, Oduber a bebe un shot di koffie hopi skerpi. “Pa loke mi ta! Pa un hende simpel. Hopi biaha cu un boca grandi. Pero hopi biaha e boca grandi ta pa tapa e curason chikito cu mi tin.” Un silencio breve a yena un espacio den e combersacion aki. El a sigui, pero su bos tabata zona mas fragil. “Den politica nunca mi no por a demostra cu mi tin un curason chikito. Pasobra si bo ta demostra cu bo tin un curason chikito, nan ta come bo bibo.”

E kier pa comunidad recorda Otmar como un persona cu ta stima e pais aki masha hopi mes. “Mi no ta un politico so. Mi a inculca amor den tur hende cu mi tabata traha cune. Pasobra nos ta traha pa pais Aruba.”