Enseñansa digital a bira un alternativa, pero tambe un reto pa nos cuerpo di docente, meymey di e crisis cu Covid-19 a produci na Aruba y den mundo henter.

Mirando e situacion cu enseñansa ta pasando aden, Instituto Pedagogico Arubano (IPA) como un instituto cu ta prepara y duna formacion pa nos maestronan, a dicidi di bin cu un programa intensivo pa introduci nos docente den mundo di dunamento di les online. Pero principalmente pa nan por haya e confiansa riba nan mes di explora e alternativa aki di duna educacion a distancia.

Bon Dia Aruba tabatin un entrevista cu Marisol Croes kende ta un investigado riba tereno di enseñansa (onderwijskundige) y actualmente e ta director professionalisering na IPA. E hoben profesional aki ta haya cu e profiel di nos cuerpo di docente ta consisti di maestronan di tur tipo di edad den enseñansa.

Den e generacion actual di docentenan nos por haya hendenan cu ta hopi habil cu duna les online. Pero tambe algun di nan cu tin hopi dificultad cune. Pa yuda nos docente cu un recapacitacion riba tereno di enseñansa digital, IPA a dicidi di introduci e programa di Experience Online Week cu a inicia e siman aki.

Den nan programa IPA ta pone atencion riba e parti tecnologico, pero Marisol Croes ta haya cu esaki ta e parti menos interesante. Pasobra cada aña tin herment nobo, y esaki ta depende di e plataforma digital cu e scol kier haci uzo di dje. Croes ta kere cu e clave di henter asunto aki ta cu si abo como docente por siña pensa diferente y trata bo contenido diferente, esaki ta e caracteristica pa bo ta un maestro cu por duna les online.

P’esey e ta bisa cu edad no ta hunga un rol pa un docente por duna les online. Di un banda tur scol tin un afdeling cu por duna sosten tecnologico y mustra bo con bo por traha tecnicamente cu un aplicacion digital. Pero e reto como maestro ta con bo ta hinca e les den otro. Con bo ta haci un tarea diferente cu antes. Esaki ta e parti cu e docentenan ta wordo recapacita riba dje. “Nan ta bay wak nan mesun rol como maestro diferente,” el a bisa.

Experience Online Week

El a splica cu durante e Experience Online Week, e docentenan ta bay wak un video riba YouTube. Tambe nan ta haya cierto tarea pa nan traha riba dje. No mester di mucho cos: Un schrift, pen y iPad. Pa bay den dje ta facil. El a haci e comparacion ora cu bo ta bay Netflix of riba YouTube pa ilustra bo con facil e ta. Pues e no ta nada complica. Cu esey nan kier demostra nos docentenan cu “duna les online no ta un cos di otro mundo.” E docentenan ta conoce caba tur e diferente programanan cu IPA ta uza pa duna les online. E parti mas importante ta pa e mesun docente por reconoce cu nan tin cierto habilidad sin cu nan ta consciente di dje.

Encuanto e metodo, Marisol Croes a bisa cu tin diferente manera pa duna les online. E scol mes ta kies ki sorto di plataforma nan ta uza. A base di esaki nan ta duna e maestronan tips tocante con nan por haci nan les online mas interesante ainda pa e alumnonan.

“Eigenlijk nos ta bay pensa mas con bo ta siña diferente, ora bo ta siña online.” Enbes di siña un maestro papiando cu bo den klas. Un factor lo ta pa uza e curiosidad y interes di e alumno mas hopi posibel. Por ta e pensamento aki ta diferente pa algun maestronan cu ta mag di pensa cu loke ta para den e buki, esey ta loke gewoon e tin cu traspasa. Mientras cu e mundo di enseñansa virtual ta diferente. “E mundo aki ta full otro. Eigenlijk mas den bo mente,” el a bisa. Den e caso aki e maestro ta bay haci mas pregunta di loke bo ta bay duna contesta.

Innovacion

Croes a declara cu e docentenan den nan proceso di formacion, nan ta haya e concepto di innovacion den nan manera di duna les. Semper e lo keda cambia y semper e docente ta keda recapacita nan mes den nan metodo pedagogico.

Den e contexto aki e ta haya cu e desafio di enseñansa digital no ta algo nobo pa nan. Pero loke nan ta pidiendo aworaki, y cu no tabata algo bisto den nos historia ta, con lihe nan mester siña habilidad nobo. P’esey nan a dicidi cu bin cu e experiencia cu a cuminsa e siman aki di Experience Online Week, caminda IPA ta desaroya recapacitacion riba tereno di enseñansa digital pa nos docentenan.

IPA como instituto cu ta prepara y duna formacion pa nos maestronan den su curriculum lo incorpora e parti di enseñansa digital. Marisol Croes a declara na Bon Dia Aruba cu e no a wordo incorpora antes, debi cu semper ta wordo duna loke ta wordo considera como necesario e momento ey, y te hasta un tiki mas leu. Pero niun hende a pensa cu e parti di enseñansa digital a bay asina lihe.

Como IPA nan ta pensando hopi pa laga e maestronan finalisa nan ultimo aña. Pues nan pensamento ta pa laga nan siña diferente manera con pa duna les den un klas, television y online. E intencion tras di e pensamento aki ta pa nos docentenan tin diferente manera di duna les. Ya cu cada alternativa aki tin nan mesun forma.

El a bisa cu tur pais ora cu bo ta formando maestro tin un instituto cu ta percura pa nan docentenan ta wordo recapacita constantemente. “E ta un necesidad. Ora cu nos mundo cambia, nos enseñansa ta cambia.”

Esaki ta e forma pa nos por sigui prepara e generacion nobo pa e futuro di mañan. E no ta kere cu esaki ta algo straño den e mundo di maestro, pero e por imagina cu ora bo no conoce e mundo di enseñansa a distancia, e ta mustra manera bo mester pusha nan pa e reto aki.

E ta kere cu e docentenan ta wordo forma segun e necesidad di e realidad cu nos ta bibando aden. Prome cu Covid-19 a mustra su efecto debastador pa salud di hende y pa economia mundial, nos no por pensa cu educacion digital lo haya un protagonismo asina grandi den e pandemia aki, Marisol Croes a laga sa.