Marijke Croes ta un conocido personalidad na Aruba door di su diferente trabao y programa na radio, pero tambe e tin un trayectoria largo como miembro di famia di Bon Dia Aruba. Pa celebra Dia di Mama, nos a entrevista Marijke, kende ta parti di Bon Dia Aruba desde su inicio.
“Mi a casa na un edad jong, cu 16 aña,” Marijke ta conta, y algun luna despues su prome baby, un yiu muhe, a nace. “Como mama jong, ora cu mi a haya mi baby den mi brasa, cu mi a wak dokter cune, mi a haci hopi pregunta como mama. Mi a spanta, anto mi a haci hopi pregunta cu mi mes. Mi no tabatin contesta pa e preguntanan.” El a bisa cu el a ripara cu e tabata hopi spanta pa e dudanan aki, pero danki Dios e tabatin su mama band’i dje. Door cu e tabata jong – apenas 17 aña – e tabata biba cu su mama, kende tabata yud’e, mustr’e con pa cuida su baby.
Ora Marijke a cumpli 19 aña, el a huur un cas hunto cu su casa y su yiu. Y pa ora e tabatin 20 aña, Marijke ta conta cu su ruman muhe tambe a sali na estado pero lamentablemente, e y e baby ambos a fayece. “Mi mama a bira malo – e tabatin ulcera – anto pa motibo di tur e yoramento y sufrimento cu mi ruman a fayece, mi mama tambe a fayece un aña y tres luna despues. Esey tabata algo doloroso pa mi.”
Marijke ta bisa cu el a yora hopi aña pa su mama, “pero scondi, pa niun hende wak, pasobra mi tin cu hiba mi famia dilanti.”
Despues, cu 22 aña, Marijke a haya su di dos yiu.
Despues Marijke a cuminsa traha cu Extra. “Mi trabao tabata asina flexible, asina dushi, cu mi por a sali busca mi yiu na scol, cushina, bay trabao back. Mi yiu tabata keda cas bao supervision di mi, di mi casa y di mi bisiña.” Y pa ora Marijke tabatin 34 aña, el a bin traha den sales na Bon Dia Aruba, pa yuda lanta e corant. “Ami ta esun cu semper a handle e sales. Ami a dirigie tur ora, mi gusta masha hopi mes. M’a trah’e masha dushi mes, mi a traha 30 aña den sales bo por bisa, 30 aña den prensa, y di esey mi a traha 27 aña [na Bon Dia Aruba].”
Cu 64 aña, Marijke a dicidi di retira, pero asina mes e ta keda colabora te dia di awe cu Bon Dia Aruba.
Mientras cu e tabata traha na Bon Dia Aruba, el a cuminsa su programa di radio na Radio Bo Guia. “Mimi tabata traha den prensa, anto el a haya permiso pa su radio. Mi a bay dun’e pabien y el a pidi mi pa yud’e. El a pone mi dilanti e master control, y ata mi a cuminsa diadomingo cu un programa ambiente musical, algo asina, canticanan bailable.” Despues el a cambia di orario, y despues el a tuma over e Momentonan Romantico tur diabierna, y despues el a cuminsa haci e programa tur dia di siman y a cumpra su programa.
Na su trabao el a haya hopi experiencia, e ta bisa cu na Bon Dia Aruba el a haya oportunidad pa traha noticia, haci entrevista, graba material, y skirbi algun piesa manera poesia of storia pa mucha. “Nos tabatin hopi oportunidad,” e ta conta. “Mi ta bisa Papa Dios semper danki pa motibo ora cu mi a cuminsa Papa Dios a guia mi hopi bon, hunto cu Toko, pasobra con bo ta bay habri un corant cu tin otro corant dies aña caba, anto bo tin cu bay bisa un cliente pakico pone bo aviso den mi corant? Pero Señor a guia nos hopi bon.”
Door di su experiencia den prensa y den radio, como tambe su sensibilidad innato, Marijke ta un persona cu un afinidad pa psicologia y con pa trata hende. A traves di su programa di radio el a bira un amiga y confidante pa hopi oyente. E ta recorda un storia cu tabatin un fuerte impacto, unda un oyente a yama den desesperacion pensando di comete suicidio, pa motibo cu su casa a lag’e sin placa y a comete adulterio. “Mi a lag’e papia y mi a puntr’e, ‘dushi, bo ta kere den Dios’ el a bisa si, mi a puntr’e si e tin yiu, y el a bisa si. “Mi a bis’e, wel, bo yiunan mester di bo, y aworakinan bo ta bay mustra cu bo ta un palo di muhe, y bo por!” Y asina el a conoce hopi storia di bida di su oyentenan.
