E crimen cometi pa polis contra George Floyd a pone den evidencia e problema racial cu pa añanan ta existi den henter mundo.

 

Un Arubiano naci den e districto di San Nicolas, tabata un pionero di e lucha anti discriminacion na final di decada di aña 60 na Canada. Ta trata di Jose Garcia.

 

Infancia y influencia

Garcia su pensamento anti-segregacion a nace den e mesun districto unda el a biba cu su famia tempo di su infancia. E ta haya cu San Nicolas su comunidad a biba e regimen di segregacion di e colonia Mericano na Colony. E ta corda cu como mucha nan tabata drenta pa baña na Baby Beach, no pasobra nan tabata gusta baña eyden. Pero nan intencion tabata mas tanto pa desafia e blokeo of prohibicion aki.

 

E ta recorda cu hopi cariño y nostalgia cu su mama a pone den un crèche bao e cariño y proteccion di e famia Clark di Isla Ariba di papia Ingles. E ta reconoce cu e rumannan muhe Clark a crea cerca dje un formacion hopi disciplina na un edad hopi tempran. “E tabata un influencia grandi di e hendenan di habla Ingles den mi personalidad.” Mientras den su cas e tabata papia cu su mayornan di origen Dominicano riba presencia di dictador Rafael Leonidas Trujillo den nan pais natal. Jose su mama tabatin un mescla racial entre indjan Taino y Africano. Mientras Jose su tata tabata un meneer di color cla di descendencia Spaño.

 

Jose Garcia su mayornan semper a sembra den dje e simia balora y defende su herencia etnico cultural. “E tabata un formacion pa mi grandi.” Pero tambe nan mayornan tabata anti dictador Trujillo. Jose su welo banda di su tata tabata un general cu mester bandona su pais via Haiti y exilia su mes na Cuba pa scapa su bida for di e dictador aki.

 

“Mi tata semper tabata pro anti Trujillo. Mi a wordo lanta den e ambiente aki cu e concepto di loke e Mericanonan a haci for di 1917, caminda nan a invadi e pais, y nunca nan a sali di dje, tampoco di Haiti,” el a bisa.

 

Algo cu a marca Jose su bida tabata tempo cu a cuminsa studia loke e ta tilda di sistema di enseñansa colonial. Segun e tabata resulta traumatico, pasobra mayoria di e docentenan a bin for di Hulandes, y hopi di nan a bini cu nan problema racial. “Nan tabata hopi racista, y tin biaha nan tabata maltrata nos cu nan palabranan.”

 

Un palabra cu sigur a bira uno traumatico pe tabata ‘kaffer’ (originalmente Cafri). Un palabra cu tabata uza den South Africa, unda apartheid a haya suela fertil, caminda Hulanda tabatin presencia tambe.

 

P’esey e ta afirma cu nos no ta Hulandes. “Nos ta di e pais Caribense aki.” E ta haya cu ta existi un sclavitud mental cu ta bin di e sistema di enseñansa cu ta wordo fomenta na Aruba y na Hulanda, y cu nos mester scapa di dje. “Nos mester scapa di e sclavitud mental aki cu nan a cuminsa ora cu nan a yega akinan,” el a declara.

 

AAPA

Jose tabata un nomada. El a yega di biba y traha den diferente pais di Latino America. Finalmente el a establece na Canada pa atende un oferta di trabao. E tempo aya e tabata traha den libreria De Wit y un cliente cu a yega a cambia su destino. Di biaha Jose, kende ta un persona abierto y espontaneo a puntr’e: Bo mester un trahado?

 

E cliente interesa riba e hoben dinamico aki a bis’e pa bay Garage Ecury pa un afspraak. Ora el a bay di biaha Jose a haya trabao, unda el a wordo manda dos aña na Colombia pa traha den e mega proyecto di construccion di un dam di Rio Nare leu for di Medellin. Despues nan a mand’e pa Canada.

 

Na Canada el a dicidi di bay traha cu e compania Canadian General Electric, unda el a forma parti di nan sindicato como dirigente sindical pa un periodo cortico, pero si suficiente pa e cuminsa organisa e comunidad Latino Americano y comunidad di color scur tempo “Fair Play For Cuba.” Pero tambe e comunidad indjan na Canada.

 

E tempo aya un influencia grandi pa Jose Garcia tabata Prof. Ian Carew di Guyana kende tabata un consehero di e estadista y poeta Africano, Kwame Krumah, kende tabata un lidernan politico cu a logra independencia di Ghana.

 

Ta asina cu Jose Garcia hunto cu otro simpatisantenan di e lucha anti racial y anti-disriminacion na Canada a a yega di organisa Afro American Progressive Association (AAPA) caminda el a fungi como presidente di dje. Nan a ripara cu entre mas hende tabata bini for di Latino America y Caribe, e ambiente di racismo cuminsa crece na Canada.

E asociacion aki a wordo crea cu e meta di duna proteccion di e comunidad vulnerabel aki. Pero tambe cu un proposito educativo nan pa asina e migrantenan nobo por adapta bon na e sistema di bida aki. Tambe entre nan miembronan tabatin hobennan Mericano, mayoria di nan di colo scur. Tabata e tempo di final di decada turbulento di añanan 60 di Guera na Vietnam. E hobennan Mericano aki a busca refugio na Canada debi cu nan no tabata kier bay Vietnam.

 

(AAPA) lidera pa un Arubiano a marca un historia na Canada. Pero e tempo a pasa y mayoria di nan miembronan a bira hende grandi of nan no t’ey mas. Mientras cu cerca e generacion nobo no tabatin mucho compromiso. “Nos a kibra. Hopi di nan ta den otro sorto di actividad,” el a bisa.

 

Garcia a bay na Universidad di Toronto unda el a gradua den e facultad di Estudio Latino Americano, Economia y Literatura. E estudio aki a duna e posibilidad di duna charla na diferente pais, tanto den nos region como na Europa, rond di e topico di racismo y discriminacion.

 

A pesar cu Aruba ta un isla di migrante cu a habri su brasa pa hendenan di tur nacionalidad, rasa, cultura y religion, e ta haya cu toch mester pone atencion na e asunto di discriminacion. E ta haya cu algun comunidad cu ta bini di otro paisnan ta trece nan prehuicio racial cu nan.

 

Pero prome cu esaki tabata existi y e ta haya cu ainda e ta existi un sorto di discriminacion. El a trece por ehempel cu masha poco nos ta mira hende di color scur riba publicidad cu ta promove Aruba. Tampoco hendenan cu rasgonan indjan cu nos tin na Aruba. E ta haya cu e racismo semper a existi na Aruba.