Entrevista cu Jhonny Romero: Piratanan ta trafica cu hendenan den nos lama

E costanan Venezolano cerca di nos isla a bira escenario di e negoshi ilegal y condenabel di e trafico di hende cu ta wordo hiba pa otro luganan, unda nan ta bira victima di explotacion sexual. Of nan ta wordo bendi como catibo sexual den e red internacional di prostitucion.

E ta un realidad latente cu no ta leu for di nos, y cu a haci cu nos pais mester a reforsa nos ley penal pa castiga e tipo di negoshi inhumano aki.

Dia 30 di juli a wordo conmemora Dia Internacional Contra Trafico di Hende Of “Trata di Persona” cu a wordo poni den e kalender di Nacionnan Uni. E aña aki precisamente nan kier destaca e esfuerso di personanan cu ta lucha den prome line contra e delito aki. E Venezolano, Jhonny Romero, hunto cu otro miembronan mas di Comite Nacional di Famianan Victima di Desaparicion Forsa den e Costanan di Venezuela, ta un di nan.

Na februari ultimo el a revela na Bon Dia Aruba cu 152 persona, mayoria di nan hendenan jong, cu a sali for di costa Venezolano durante e ultimo dos aña pa otro destino den Caribe, entre nan e islanan ABC. Nan a disparce manera lama a guli nan. Un di nan ta Jhonny su yiu homber mas grandi cu ta carga e mesun nomber di dje, esta Jhonny de Jesus Romero Palacios. E ta un hoben di apenas 27 aña kende a dicidi di realisa un biahe sin regreso pa Corsou, dia 7 di juni 2019, abordo di un boto La Vela. E caso aki a keda conoci como La Vela tambe. A transcuri mas cu un aña y ainda su tata no sa nada di su paradero, pero tampoco e otro famianan cu a perde nan sernan keri tambe.

Islanan ABC

Romero a yega di denuncia cu tras di e trafico y comercio di hende tin un organisacion di delincuentenan cu ta probecha di e situacion dificil cu Venezuela su poblacion ta pasando aden.

Segun informacion divulga recientemente, durante e ultimo lunanan, Policia Nacional Bolivariano (Dip-PNB) y Armada di Venezuela, y tambe e coast guard di Trinidad & Tobago a rescata mas cu 125 persona cu tabata den poder di organisacion criminal dedica na e traficacion di hende y prostitucion.

E hendenan aki a wordo rescata for di campamentonan descubri den e Delta di Orinoco y Tucupita. E 125 persona aki nan destino clandestino -segun nan a informa- tabata Trinidad & Tobago. Entre e grupo tabatin alrededor di 75 mucha y adolescentenan. Segun data di Nacionnan Uni, mayoria di e victimanan di e delito aki ta hende muhe ta representa un 49%. Mientras cu un 23% ta mucha muhe.

Den combersacion cu Bon Dia Aruba, Jhonny Romero a declara cu Trinidad & Tobago ta manera un pais sin ley. Mientras cu for di islanan ABC, Comite Nacional di Famianan Victima di Desaparicion Forsa den e Costanan di Venezuela, ta hayando tur informacion y colaboracion pa realisa nan investigacion.

Na momento cu nan pidi informacion cerca nos autoridad competente, nan comite ta hayando tur informacion debidamente. Tambe nan ta dispuesto pa yuda. Segun Romero, incluso tin oferta di e partnernan di Reino Hulandes den Caribe mes, pa nan por bini hunto cu un comision nacional pa investiga. Pero nan no ta hayando e mesun trato y resultado na Trinidad & Tobago.

Fenomeno

Asamblea Nacional di Venezuela a divulga cifra espantoso cu ta mustra e magnitud di e problema di traficacion di hende desde Venezuela pa otro region di Caribe. Haciendo mencion na e caso di La Vela, y uniendo esaki cu otro casonan cu a yega di sosode for di e costa Venezolano entre nan Sucre y Margarita, nan ta mira cu esaki ta un problema cu ta den aumento keto bay.

E ta reconoce cu e fenomeno aki ta debi na e mesun migracion sin control. E hendenan ta asina desespera cu ta subi den botonan pa busca un miho bienestar den e islanan di Caribe. Den lama nan ta topa cu “pirata” cu te hasta nan ta graba nan mes, ora cu ta secuestra e hendenan cu ta abordo for di e botonan aki. E grabacion aki ta bira un evidencia cu e cosnan aki ta tumando luga. Tambe autoridad Venezolano a cuminsa actua y nan a cuminsa haya botonan y campamentonan, manera esunnan na Orinoco y Tucupita.

Pero a base di nan propio investigacion, Romero a afirma cu e fenomeno delictivo aki ta wordo presenta mas tanto den e sitionan manera Anzuategui, Sucre y Falcon, caminda tin mas facilidad pa nabega pa e islanan. El a declara cu mayoria di e hendenan cu e piratanan ta trafica cu nan, ta wordo hiba pa Trinidad & Tobago. E isla aki a bira manera un centro di operacion di e delincuentenan cu ta den e negoshi ilicito di traficacion di hendenan. Eynan nan ta wordo distribui pa diferente sitionan, segun Romero.

El a splica cu e hendenan homber ta wordo poni pa traha pa e delincuentenan y tambe den e minanan den forma di sclavitud moderno. Of nan ta wordo bendi cu e organisacion guerrillero. Mientras cu e hendenan muhe ta wordo prostitui y e muchanan ta wordo poni den findishi. Y esunnan cu ta cuminsa “hecha mucha vaina,” nan ta wordo mata cruelmente, y despues nan ta berde nan organonan. “Den e traficacion aki ta sosode cosnan hopi horibel,” el a laga sa na Bon Dia Aruba.

Den cuadro di Dia Internacional contra Trafico of Negoshi di Hende, Jhonny Romero di Comite Nacional di Famianan Victima di Desaparicion Forsa di e Costanan di Venezuela su mensahe ta dirigi pa e gobiernonan di nos region. E ta haya cu algun di nan no ta tumando na serio e realidad aki, relaciona cu trafico di hende.

El a reitera cu e fenomeno aki ta un realidad cu ta sosode keto bay. Segun Romero, hopi famia ta perdiendo nan ser keri no solamente den lama, sino riba den tera firme tambe. E ta denuncia cu na Colombia, Venezolanonan cu ta purba di regresa na nan pais, ora cu nan ta yega den e frontera, nan ta wordo somenta of asesina. Pero loke ta tumando luga riba lama ta mustra cu tin pirata cu ta dedica nan mes pa aborda e barconan cu ta sali clandestino for di e costa di Venezuela cu hendenan cu ta purba busca un miho futuro. E ta algo cu ta sosode cu ayudo di e mesun capitan di e botonan y nan tripulacion.

P’esey e ta haci un yamado pa tur gobierno di nos region por traha den union y den forma coordina, pa lucha y combati trafico ilegal di hende. Na final, Romero a laga sa cu e problema aki ta causa un dolor inmenso. “Pasobra si un persona ta muri, bo ta yor’e… Pero un famia disparce, e ta un dolor cu no tin fin. E ta produci un dobel victima.” No solamente e sufrimento di e persona cu no sa su paradero y cu kisas ta sufriendo den man di hendenan criminal. Pero tambe di e famianan cu ta keda sufri e dolor di no sa kico a sosode cu nan ser keri.