Entrevista cu Jhonny Romero: “Mi curason a desaparece cu mi yiu”

E distancia di lama cortico, pero traicionero, cu ta uni y separa nos isla for di e costanan di Venezuela, a bira un lama misterioso y yen di dolor pa hopi famia Venezolano cu lo desea di sa e paradero di nan sernan keri. Un trayecto di lama cu a bira manera un Triangulo de Las Bermudas, dilanti di nos wowo.

Un lama cu ta alimenta su awanan profundo y cristalino cu e lagrimanan cu ta core como un riu cada biaha mas hancho di e tatanan, mamanan, rumannan y amigonan cu ta yora e ausencia di esunnan cu un anochi scurito a soña riba un bida miho, huyendo for di e gara di un regimen inhumano na Venezuela. Memey di e desesperacion aki, nan a tribi di aventura nan mes pa bin Aruba, Bonaire y Corsou (ABC), sin logra nan meta… pero mas tristo ainda, sin cu niun hende sa nan paradero.

E cara di La Vela.
E destino tristo di e desaparicion di nan sernan keri a haci cu Jhonny Romero a uni entre otro cu Sra. Ana Areas y Sra. Jocelyn Lopez. Nan ta lider di nan propio tragedia y dolor, pero tambe di otro cantidad di famia den nan respectivo localidad.

Awendia e tragedia aki a bira un lucha comun door di Comite Nacional di Famianan Victima di Desaparicion Forsa den e Costanan di Venezuela. Mayoria di nan ta famianan hopi humilde estableci na estado Falcon. E grupo aki ta presidi pa Jhonny Romero, kende a bira e persona cu ta representa e famia di esunnan cu a disparce abordo di e botonan cu a sali for di estado Falcon.

Jhonny ta tata di Jhonny de Jesus Romero Palacios, un hoben di apenas 27 aña kende a dicidi di realisa un biahe sin regreso pa Corsou, dia 7 di juni 2019. Ya caba a transcuri mas cu 8 luna, sin cu su tata Jhonny y demas famia sa di dje. “E tabata mi yiu mas grandi,” asina cu bos kibra el a bisa durante un entrevista cu Bon Dia Aruba.

For di e dia ey, Jhonny ta sinti cu curason a aborda y disparce den e mesun boto La Vela riba cual su yiu stima a disparce. El a reconoce cu e causa tras di e tragedia di e hendenan cu a desaparece riba lama ta debi na e situacion critico y compleho cu e pueblo Venezolano ta bibando actualmente. “Esaki ta obliga nos hendenan pa bandona nos pais di un of otro forma.”

E tentacion pa realisa e tipo di aventura aki cu por cobra bida di mas hende ta latente den e poblacionnan situa den e costanan Venezolano.

Den su entrevista cu Bon Dia Aruba, Jhonny Romero ta splica cu pa e hendenan di Falcon, lama ta nan frontera pero tambe nan horizonte pa busca un miho condicion di bida y yega na e islanan Hulandes. “Hopi Venezolano ta mira como un alternativa e islanan aki pa busca un futuro. Pero tambe pa nan busca un pan pa nan yiunan y nan famia. Pa nan por sobrevivi den poco palabra.”

Pero esaki no ta e tristo destino di Jhonny de Jesus Romero Palacios so. Tampoco e dolor di Jhonny Romero y su famia, sino cu el a bira e destino scur, misterioso y doloroso di mas cu 152 persona, mayoria di nan hendenan jong, kende aparentemente lama a guli nan. Pero hunto cu nan e dolor di cantidad di famia ainda di luto sin sa si nan ser keri a fayece of si nan a wordo gewoon desapareci.

Nan ta tres boto emblematico di e tragedia humano aki: Ana Maria, Jhon Eli Jose y La Vela. E pasaheronan a dicidi di realisa un biahe peligroso abordo di e botonan aki, sin cu nan tabata adecua pa e tipo di transporte di hende. Sino cu nan tabata boto uza den actividad di piscamento, sin ningun sorto di siguridad.

Desaparicion misterioso.
Pero pa Jhonny Romero y demas famia, e desaparicion di nan sernan keri no tin di haci exclusivamente cu e traficantenan di hende cu no tin balor ni aprecio pa bida di hende, sino cu tras di esaki tin algo scur.

Nan ta biba den un comunidad di piscadonan na Coro, caminda e nabegantenan bakia sa cu: ‘lama ta papia’. Kiermen cu den caso cu un boto ta zink, lama semper ta papia y ta mustra algun señal ya sea mancha di azeta, paña, sapato… cualkier cos.

Jhonny a cuminsa un lucha su so dilanti di e autoridadnan competente di su pais pa busca un claridad memey di scuridad cu ainda ta compaña e destino di nan ser keri. Esaki contra tur pronostico di skepticismo, te hasta di e mesun famianan di e hendenan cu a disparce riba lama. Nan no ta descarta cu ora e botonan aki a bandona e costanan di Venezuela, nan ta wordo gewoon somenta sin laga niun sorto di rasgo. Ya cu niun di e botonan, a lo menos esunnan cu nan ta raporta, no tin evidencia cu a zink.

Ademas tin hendenan cu a logra sobrevivi di e hendenan cu tin mal intencion den e negoshi di traficacion di hende. El a menciona e caso di La Vela, caminda tin hendenan cu no a logra aborda e boto aki, pasobra no tabatin mas espacio. Pero e hendenan aki a logra scucha cierto rumor cu algo a sosode cu nan. “Ya cu nan mester a bay na otro sitio pa haci algo pa e organismo di siguridad estatal of nan a bay haci un fabor na otro persona.” El a agrega cu nan tur sa cu e tipo di fabor aki tin di haci cu trafico di arma y droga, etc.

Famia di e victimanan aki ta kere cu nan ser keri a wordo secuestra riba lama, y misteriosamente nan a wordo somenta, pasobra nan tabata testigo potencial di e tipo di traficacion ilegal aki.

P’esey e siman aki nan a convoca y organisa un gran protesta nacional di e Famianan Victimanan di Desaparicion Forsa den e Costanan di Venezuela. Nan kier pa e autoridad competente por enfoca un investigacion den e direccion di loke e famianan di e victimanan sa di nan desaparicion.

Nan a investiga poniendo den peliger nan propio bida y siguridad. Tur esaki a trece menasa cerca nan. Ya cu nan ta kere cu ainda nan sernan keri ta bibo, pero nan a bira victima di gruponan criminal bon organisa cu aliansa y complicidad di organismo estatal Venezolano cu tin control den e area costero y strategico aki.