Bon Dia Aruba a tene un entrevista cu fotografo freelance, Michael Fowler, ken a conta nos tocante e retonan cu e pandemia di COVID-19 a trece pa industria di boda y fotografia en general na Aruba.

Fowler ta traha principalmente cu fotografia di boda di turista. El a cuminsa bisando cu ya caba prome cu Aruba a cera su frontera, na februari a cuminsa ricibi cancelacion. Esaki a crea un situacion hopi dificil, ya cu, maske e tin un ‘cancellation fee’, toch e mester duna e placa di deposito bek. “Desde cu bo haci un reserva y bo ricibi e deposito, bo ta conta cu e placa ey”, el a bisa, agregando cu awo mester a busca un otro manera pa cubri su gastonan mensual.

E industria di boda na Aruba ta enorme. Fowler a bisa cu maske ta dificil pa bisa un cifra exacto, mirando cu tin cantidad di diferente negoshi y persona cu ta dedica na boda na Aruba, por bisa cu pa luna tin centenares y pa aña miles di boda ta tuma luga na Aruba. E temporada den cual mas boda ta tuma lugar ta precisamente entre maart y augustus, net e periodo cu a keda cancela pa pandemia.

“Mas tanto mi ta purba di ofrece un rescheduling na luga di un cancelacion”, Fowler a bisa, pero mas largo e pandemia ta dura, mas rescheduling ta bira cancelacion. Tambe pa motibo cu e clientenan mes ta ser afecta pa e pandemia, locual ta haci cu e decision di duna reembolso ta bira mas uno moral cu uno legal. “Algun di nan a perde nan trabou y tin mester di nan placa bek. Mi ta purba pa cada caso considerando nan situacion di yega na un acuerdo husto pa un rescheduling of un cancelacion.” Pero hasta cu rescheduling por bira un problema, ya cu e entrada proyecta pa un luna ta keda posponi pa varios luna. Durante e tempo aki, Fowler ta biba solamente di placa cu e tabatin spaar. “Esey ta nifica cu mester haci ahuste na bo bida”, buscando manera pa baha gasto.

Ademas di cada luna mester cumpra algun ekipo pa eherce su trabou, tin otro gastonan encera, manera pago mensual di website, database, programa di editing, gasto administrativo, y aki mester a cancela algun di nan pa por cumpli cu otro pagonan. Ademas tin su pagonan regular, manera huur, gasolin, cuminda, etc. “E situacion a bira hopi serio. Algun colega hasta mester a bende nan ekipo”, el a bisa.

Bon Dia Aruba a puntra Fowler tocante reapertura di frontera, mirando cu esaki a keda anuncia pa cuminsa dia 15 di juni. Sinembargo, esaki no lo trece un alivio mesora pa e fotografonan, pa motibo cu hasta si Aruba permiti pa turista bin, tin cierto luga cu no ta permiti hende pa bandona nan pais ainda. “Un cliente di mi na Merca, su ciudad no ta permiti e sali si e no por demostra anticuerpo di COVID-19”, el a bisa. Ademas, mirando e situacion economico dificil na henter mundo, no ta e mesun cantidad di hende ta dispuesto pa paga pa un boda di e forma tradicional.

Y esunnan cu si ta bay door cu nan boda, ta solicitando mas y mas pa un ‘micro wedding’, cual Fowler ta bisa: “Esey ta un boda cortico di apenas un ora, mientras cu normal ta 4 pa 6 ora. E micro wedding ta mas manera un ‘eloping’, cu dos of tres invitado.” Cual pa fotografo, ta representa cu e margen di ganashi ta bira hopi chikito.

Fuera di esey, algun turista hasta ta cancelando nan reservacion pa october. “Mi ta traha cu algun par hotel, y nan ta puntra disponibilidad pa lo mas trempan, october. Pero hasta den esey tin cancelacion, ya cu estadonan Mericano mes ta pone cu nan ta cancela.” Esey a pesar cu interes di turista pa casa na Aruba ta keda grandi.

Apart di potret di boda, fotografonan na Aruba ta ofrece diferente pakete di sesion di potret familiar, pa famianan crea bunita recuerdo di nan vakantie. Esakinan tambe tabata un bon fuente di ingreso. “Averahe, mi lo bisa tin alrededor di 50 sesion asina pa siman.” Cual ta representa un gran caida den ingreso na momento cu no tin turista ta haci uso di nan servicio.

Ademas, tin e aspecto cu na momento cu por cuminsa traha bek, tin un atraso den cierto pago, por ehemplo, manera ariba menciona, mester bolbe paga pa programanan cu a cancela, of cumpra cierto ekipo, of otro gastonan pa por cuminsa traha bek. “Cada luna cu ta pasa, debe ta keda acumula.”

Mientras tanto, e ta bezig expandiendo su area di trabou cu otro sorto di fotografia, manera cuminda pa negoshinan di take-out. Mester a pasa di traha potret pa traha video. Mester ‘adapta of warda placa caba’. Ademas e ta purba di busca trabounan chikito cerca clientenan local. Pero esey tambe ta bin cu reto. “Hende tin miedo pa gasta. Mi trabou ta bay liga na marketing, y varios proyecto programa ta posponi of cancela. Hasta local ta pospone nan boda pa december.”

Esaki ta haci cu hopi hende den industria di fotografia y di boda ta pasando momentonan sumamente duro. “Bo ta cuminsa considera di busca otro trabou, pero niun hende ta contratando. Es mas, tin cantidad di retiro tumando luga.” Constantemente ta puntra si ta duna ‘corona discount’, pero Fowler ta destaca, ‘gasto no tin descuento’.