“M’a sali di panchi pa candela.” Tur hende cu ta activo pa mas di 15 aña den paintball y ta inverti den e ultimo paintball guns sa cuanto inversion e ta rekeri. Pero den e dianan aki, Hubert de Cuba (54) a dicidi pa tira riba otro obheto y su arma ta un camara.

“Mi no ta un fotografo profesional. Mi ta considera mi mes un amateur avanza.”

Hubert de Cuba a drenta e mundo di fotografia na 2010, despues di a sigui un curso basico cu Ron van Kessel. Su meta tabata pa saca potret di actividad deportivo. Pero durante e pandemia, particularmente e lockdown, tur actividad a para. “Mi kier a haci algo otro, pues mi a scoge paisahe. Asina mi a sigui un curso ‘online’ riba fotografia di paisahe, di Tim Shields di Canada. Asina mi tabata haya mi huiswerk pa haci y ta a base di e trabaonan aki, a haya mi certificado.”

Asina Hubert a desaroya su interes pa paisahe di Aruba, incluso di nos lama. Y di un ta bin e otro, pasobra parti di e paisahe ta nos animalnan, grandi y chikito, riba tera, den lama y den aire. “Y mi a namora di fotografia macro, esta unda ta saca potret di animalnan y insectonan hopi chikito, cu no ta salta na bista mesora. Asina por permiti hende wak nan detayenan.”

Diferente potret, diferente tecnica

Locual a permiti Hubert specialisa den fotografia di animal ta su experiencia den saca potret di actividad di deporte. “E tecnica ta similar. Den deporte, no ta cuestion di djis subi riba veld y saca un batiado di tur angulo. No por subi riba veld. Mester di un lens largo cu for di distancia por toch yega na hungadornan. Den ‘wildlife’ ta mescos. No por yega cerca di un parha, e ta bula bay. E bunita di un potret asina ta cu mester filter e frame, pa e potret ta ‘zuiver.’ Pa un potret asina mester un camara cu ta ‘shoot’ hopi lihe y lensnan grandi.”

No ta sin mas cu Hubert a bira un di e fotografonan cu ta resalta pa su potretnan di e mundo di animal. E no ta profesional, pero e esfuerso cu el a hinca den su habilidad, tecnica y e inversion den camara ta di nivel profesional. “Mi a sigui hopi fotografo internacional cu ta specialisa den deporte. Y na final tur ta bisa mescos. Nan ta bisa cu si kier bay den deporte, mester di maleta di placa.”

P’esey mes el a dicidi awor pa habri su website, printsofaruba.com cu tur su potretnan y esnan cu ta interesa por cumpra y laga print esakinan. Su potretnan awor caba ta bay rond mundo, particularmente pasobra e posibilidad di print, incluso riba aluminium ta duna realse na e imagennan y te hasta ta inspira otro den nan mesun arte.

Esun cu a hinca Hubert den fotografia tabata su yiu muhe, Kimberly de Cuba. “Kimberly a cuminza saca fiesta y despues di a haya un decepcion, a stop. Ami mes nunca a sinti mi pa saca potret di evento priva, sea ta casamento of batisamento. E por tin placa den dje, pero e no ta atrae mi. Mi no ta sinti mi comodo pa pidi hende para pa saca potret. Mi yiu homber Stiven di otro banda, si ta bon den e tipo di fotografia aki. E por pone un grupo di 400 hende hunto, ta pone nan hari y saca un tremendo potret. Mi ta respet’e.” Stiven ta biba na Hulanda pero ta biaha rond mundo pa saca potret di evento.

Los di ekipo caro, un fotografo di paisahe y di ‘wildlife’ mester di pasenshi. Y tin biaha un GoPro mes ta suficiente. Un turtuga net bao lama, prome cu a saca cabes pa hala rosea, un pisca spanta den aire prome cu un pelican com’e y un meeuwchi cu ta haci su tripanan limpi mientras cu ta den vuelo ta algun di e potretnan impresionante cu Hubert a saca cu su GoPro, y a yama atencion internacional. “E ta cuestion di ta ‘on the right spot, on the right time.’” Pero toch Hubert ta convenci cu su mesun camaranan y lens lo produci miho potret ainda y ta cla pa bolbe inverti den ekipo special pa saca potret bao lama.

E pasion pa saca potret di actividad deportivo t’ey bibo. E fin di siman aki mes Hubert tabata na Colombia pa saca potret. Lamentablemente na Aruba, e reto pa un bon potret ta e luznan na e facilidadnan deportivo cu ta baha calidad di e producto final. “Ta haya hopi ‘noise’ den e potretnan.” Su mentor ta Anthony Carlo, kende banda di su trabao den abogacia ta hopi dedica na potret di deporte. “Semper el a bisa mi, fotografia di deporte ta manera pisca. Sea ta catch un pisca of no. Y esey semper a keda den mi mente.” Esey ta nifica cu Hubert a bira hopi critico di su mesun potretnan y kier unicamente un potret perfecto. Esey ta nifica ‘delete’ si mester, 150 pa 170 potret te ora haya ‘esun.’

Y ta danki na su wowo, su pasenshi y autocritica cu Hubert tabata entre 100 fotografo rond mundo cu a keda scogi pa participa cu tres potret den e exposicion virtual di wildlife organisa pa Virgin Limited Edition di Sir Richard Branson.

Esey ta e rumbo cu Hubert kier bay, pa sigui participa na competencia internacional pa stimula su propio desaroyo como fotografo y tambe trece e naturalesa di Aruba riba plataforma internacional. Su potretnan ya ta cuadranan cu ta colga rond mundo y e posibilidadnan ta sin limite.

Y aunke cu de Cuba por a laga su armanan pa paintball un banda, tur hende den fotografia sa cu e inversion den lens, den otro herment y e tempo cu mester hinca den dje ta costa hopi placa. Hasta mas cu paintball. Pero, e resultado ta trece alegria pa hopi y particularmente e fotografo. “Mi ta super contento.”