No ta facil pa siña un hende analfabeto pa siña tur regla di trafico. Tampoco pa siña un hende cu algun limitacion fisico core un auto. E ta un tarea cu no solamente ta demanda un sistema pedagogico, sino hopi pasenshi y comprension.

“Pa mi no tin cos miho cu un cliente asina, pasobra mi por siña hopi di nan,” asina ex polis Thomas Ruiz kende ta fungi como secretario di Vereniging Rijscholen Aruba a declara durante un entrevista cu Bon Dia Aruba. E ta haya cu nan ta dos elemento basico: Trankilidad y bon comunicacion, pa trata un alumno asina.

Reto

Ruiz tin su propio scol di conduci (rijscholen) y e ta haya cu un alumno asina ta trece reto cerca dje. Cada bes cu e ta haya chens di haya cu alumno asina, Ruiz ta bisa su mes: Net bon pasobra aworaki mi ta bay challenge mi mes.” E reto ta, con leu e por yega, y si en berdad e por yuda e persona aki, te unda cu e por.

Un reto tin di haci cu persona analfabeto, mirando cu tin tanto regla cu mester siña di nos ley di trafico. Aunke e persona aki no por lesa ni skirbi, pero pa sorpresa di hopi hende, e persona aki su sinti di scucha ta bon desaroya. Nan ta persona cu ta absorba informacion hopi lihe. Den e caso aki loke Ruiz ta haci ta graba tur cos. E ta manda e audio di cada les via nan smart phone pa laga nan scucha.

El a trece e caso di un meneer cu ta traha den construccion y kende tabata compaña su yiu muhe pa haya les cerca dje. Ruiz a mira cu e persona Dominicano tabata pone hopi atencion durante e dunamento di les. El a puntr’e si e mes tabatin rijbewijs. E contesta tabata no y cu berguensa el a admiti cu e tabata analfabeto.

Thomas a encurash’e cu esey no ta un limite, ya cu e por scucha. Tur dos a asumi e reto aki, cada un di nan parti, y seis luna despues e meneer aki a haya su rijbewijs. El a tarda mas cu normal, pero el a logr’e. Y no solamente esey, sino cu e tabatin un segundo efecto, ya cu e persona aki a haya curashi y el a dicidi siña lesa y skirbi.

Tin otro caso di un persona cu tabatin problema di dyslexia y memoria cortico. Thomas no tabata sa, pero si e por ripara cu e alumno aki nan capacidad di siña tabata hopi cortico. Un dia e alumno a presenta pia sunu, y el a puntr’e: Unda bo sapato ta?. E mucha homber a kibra su dilanti y cuminsa yora. El a confesa cu e tin memoria cortico, ya cu tempo cu e tabata chikito a haya accidente. Eynan el a bin cu otro strategia pedagogico cune.

Mirando cu Thomas su señora ta docente, e tambe ta dun’e hopi tips y sugerencianan. Pero tambe e ta haya conseho for di personanan cu tin experiencia riba e tereno di autismo y cu tin yiu asina. Otro caso tin di haci cu un persona cu tabatin un tiki di limitacion cu mobilidad, pero esaki no ta kita cu e por core auto normal, el a laga sa.

E ta haya cu hopi hende tin un prehuicio riba e personanan aki, pero nan ta mescos cu cada un di nos. No mas cu nan tin un manera otro pa siña. Thomas Ruiz como instructor ta purba di yuda nan pa nan ta keda funciona normal den sociedad.

Comunicacion y pasenshi

For di 1997, tempo cu el a drenta polis te aworaki e ta dunando les pa e hendenan interesa pa logra nan rijbewijs. E ta admiti cu pa realisa e trabao aki bo mester tin un vocacion como docente, pero principalmente un pasenshi grandisimo, pero specialmente pasion pa bo trabao.

E vocacion aki a nace cerca dje, ya cu e ta un persona cu ta gusta anda cu hende. E ta un persona cu por habri un combersacion facilmente cu cualkier persona, sin mira niun limitacion, prehuicio of impedimento, kico e lo por ta.

E hecho cu e tin un manera pa papia cu hende, y splica un hende pa comprende algo a yuda pa e hende aki kibra e barera te hasta di analfabetismo. Tambe yuda hende cu autismo. Logicamente tin diferente nivel di autismo caminda bo mester tene cuenta cu bo tono y speed di bos. Pero tambe postura, kiermen bo body language. E parti di comunicacion ta un instrumento importante pa por yuda nan.

E hecho cu el a biba na Hulanda unda el a yega di traha den diferente corporacion, a haci cu Thomas Ruiz por a siña hopi riba comunicacion, specialmente pa trata cu clientenan un “tiki fastioso.” Esaki a yud’e pa e logra cultiva e grado di pasenshi cu e tin actualmente. Tur experiencia acumula e ta incorpora diariamente den su trabao di dunamento di les pa conduci auto.

Ademas di e parti teoretico, e parti di practica, ta demanda como docente pa keda calmo. Sinembargo tin situacion cu por bay cu adrenalina. Mas tanto ora cu ta wordo presenta situacion cu ta crea peligro. Pero –manera e mes ta bisa- bo no por cay den panico. Si bo ta cay den panico e por refleha cerca e alumno y e por ocasiona un situacion pio di loke e ta. Un regla importante ta mantene e alumno rooster.

Pa logra esaki e ta uza algun tecnica, un di nan ta musica cu un volumen abao. Por ehempel un persona di cierto edad, e ta pone boleronan den e auto. E canticanan ta yuda nan pa mantene trankilo. Otro tecnica tin di haci cu halamento di rosea, specialmente cu e alumnonan masha nervioso of esun cu ta sufri di fobia.