Biblioteca Nacional Aruba (BNA) a percura cu temporada di shelter in place y ainda e toque de queda por a bira menos pisa pa medio di e lesamento di un buki. Of nos por coba den e bahul di nos historia nacional via departamento Arubiana Caribiana su website.

Durante un entrevista cu Bon Dia Aruba, Sra. Astrid Britten kende ta directora di BNA a bisa cu unabes cu a wordo detecta e prome casonan di Covid-19 na Aruba, dia 13 di maart ultimo, nan tabata un di e instancianan cu mester a cera su portanan pa publico. Esaki tabata parti di e medidanan di salubridad cu mester a keda aplica pa siguridad di nan clientenan y personal.

Unabes cu e situacion aki a presenta y cu medidanan manera shelter in place a drenta na vigor cu tabata exigi pa keda na cas y sali solamente pa loke tabata strictamente necesario, BNA a cuminsa cu un aceleracion di locual nan ta bin ofrece como biblioteca. Nan a bira practicamente un online biblioteca loke a resulta hopi importante durante e pandemia aki.

Nan a sigui e mesun ehempel di empresanan. BNA a haci uzo di nan servicio online pa nan clientenan pidi algo y despues bin busk’e locual a bira hopi esencial. “Mas y mas e arte di lesamento nos ta keda stimul’e. Pasobra e ta keda un parti importante, y tambe di e maneho di nos, pa e muchanan por sigui cu e actividad di lesamento.”

Britten a bisa cu lesamento di e buki a bira pa hopi hende e compania ideal durante e pandemia di coronavirus. E hendenan tin un necesidad grandi pa tin acceso na buki. E librerianan tabata cera y e aspecto di placa ta bay cuminsa hunga un rol pa cumpra un buki. Mientras cu e parti digital ta practicamente por nada.

Plataforma digital.
Ya caba BNA ta bin trahando riba su plataforma digital pa ofrece diversidad di servicio. Sinembargo e echo cu mundo henter y a confronta e pandemia aki, y Aruba no tabata un excepcion, a haci cu Covid-19 a duna un pusha pa BNA y tur nan usuarionan por a haci uzo di nan facilidad digital mucho mas.

Den e entrevista aki, directora di BNA a bisa cu despues di e pandemia e acceso di hendenan na nan plataforma digital a subi substancialmente. “E Covid-19 a acelera e proceso di implementacion di nos sistemanan digital. Y pa pone hopi mas material riba e plataforma digital…”

Nan estadistica ta mustra cu e uzo a subi considerablemente con e hendenan tabata busca informacion di un forma digital. Mirando cu e muchanan tabata den periodo di examen nan tabata consulta bukinan relaciona cu esey. Tambe e hendenan tabata consulta e website di ArubianaCaribiana pa haya informacion riba Aruba.

“Hopi mas hende tabatin mas tempo pa keda na cas. Nan a purba di busca y haya mas riba esey…” Consciente di esey BNA a purba di yega na diferente acuerdo cu personanan pa haya permiso pa pone nan buki digitalmente. Tin otro materialnan cu ta mas bieu y cu a cumpli 80 aña, y nan ta disponibel. Pero teniendo na cuenta e derecho di autor, nan mester check semper cu esun concerni, prome cu nan por haci uzo di dje digitalmente.

 

Durante e periodo di shelter in place, tur instancia considera no esencial no por habri. Pero na luna di mei, BNA a cuminsa bek internamente y desde 11 di mei a cuminsa ofrece un servicio di pickup bukinan, caminda publico por bin entrega nan buki y nan por bay cu otro buki, sin nan a pidi’e cu anticipacion.

Salud mental.
Nan a sigui provee e material pa lesa cu ta importante pa e parti di salud mental durante e periodo aki. Banda di esey nan a cuminsa no solamente facilita buki den forma tangibel, sino digital tambe. Nan ta e-book na Hulandes y Ingles, danki na un cooperacion cu BNA tin cu Koninklijke Bibliotheek na Hulanda for di aña pasa. E cooperacion aki tabata tambe cu e otro partnernan di Reino Hulandes, Corsou y St. Maarten.

“Manera bo sa den e periodo aki e parti di salud mental tambe ta hopi importante, y kico mas miho pa distrai hopi biaha ta lesamento,” el a bisa. E ta un forma cu bo por relaha bo mes den un forma bon, ya cu e temanan cu bo lesa ta hopi y varia.

E temporada aki a bira un bon oportunidad pa hopi hende por a probecha pa disfruta di e lesamento di bukinan. Pero aparte di esey, BNA su departamento di ArubianaCaribiana a continua cu nan plataforma digital, caminda nan a pone masha material cu a wordo digitalisa y nan ta disponibel pa publico.

Tur e situacion cu na principio di e crisis di Covid-19 nan a pasa aden a coincidi. BNA a implementa un sistema di automatisacion nobo. Pues tur e implementacion pareu di e servicio online cu BNA ta ofrece riba su plataforma digital a yuda pa mitiga e exigencia di shelter in place y toque di queda pa nan por a bira mas soportabel.

Apertura.
Otro siman trahado di gobierno lo ta bek na pia di trabao y esaki ta e caso tambe pa trahadonan di BNA. Dia 25 di mei, BNA ta sigui cu su servicio di pickup, y un siman despues 1 di juni, nan lo habri nan instalacion na Oranjestad y San Nicolas pa e publico tambe. Logicamente implementando tur regla di distanciamento social y higiena.

P’esey nan a dicidi di tuma un siman mas pa por cumpli cu tur e reglanan cu DVG a bin cu ne pa evita e contagio di Covid-19. Nan lo pone e reglanan aki riba BNA su website pa cumpli cu nan, ‘ya cu e parti aki ta bira hopi esencial’. Entre otro mester tene cuenta cu e cantidad di persona cu BNA por carga den e situacion actual.

For di dialuna publico lo por haci yamada na nan departamento di ArubianaCaribiana uzando nan number di telefon nobo: 528-1500 pa traha un cita pa e persona interesa por pasa consulta e material cu nan mester y pa nan wordo yuda.