E curator di arte y museographer Venezolano, Jimmy Yanez, tin un relacion fuerte cu Aruba tanto familiar como profesional. Di un banda e ta yama su mes como yiu di San Nicolas. “E ta e tera di mi tata y di mi famia tambe.”

Pero di otro banda, como profesional riba mundo di arte y cultura, el a yega di participa den diferente proyecto entre nan Aruba Art Fair, Nuevo Mundo Festival. Tambe el a yega di trece e maestro Victor Fuenmayor kende no solamente a yega di presenta un buki como poeta, sino cu a yega di duna workshop como maestro di educacion artistico acredita pa Unesco. Nan contribucion pa Aruba tabata completamente gratis.

Semper el a busca mantene e contacto afectivo aki cu e isla di su ancestro y promove y hisa nos nivel cultural, specialmente riba tereno di arte plastico contemporaneo cu ta Jimmy Yanez su specialidad. E ta bisa cu hopi orguyo: “Niun evento cu ma yega di realisa na Aruba, mi no a cobra niun florin pe.”

Un biaha mas Jimmy ta pone su conocemento y contactonan como representante pa Caribe insular y continental di The Miami New Media Festival 2020. Esaki ta e di 15 version di e festival aki organisa pa Arts Connection y Cas di Cultura Aruba. Arts Connection ta un fundacion cu ta propone activa diferente netwerk y comunidad artistico rond di e posibilidad y uzo di video arte y otro medionan tecnologico.

E festival aki tin e concepto artistico di “Censura” y media art como tema central y presenta riba plataforma multimedia. E presentacion aki lo tuma luga paden di Cas di Cultura mañan 26 di november pa 6’or atardi.

E ta un honor y privilegio cu e festival aki ta tuma luga na Aruba, ya cu tambe e lo presenta exhibicion aki na varios ciudad di America Latino, Merca y Europa. Desde su creacion, e festival aki a yega di presenta mas cu 210 artista di 15 pais, mas di 400 video, instalacion, obra di arte digital den 3D y performances.

Aruba Art Fair

 

Dos aña despues Yanez a expresa su sentimento riba Aruba Art Fair cu no tabata un experiencia mucho agradabel pe. No solamente riba e parti organisatorio caminda el a invita un grupo di personalidad importante den mundo di arte cu no a wordo atendi debidamente. Sino te hasta conceptualmente e no tabata mucho di acuerdo cu e mesun evento aki.

E mes no tabata di acuerdo cu un 30% di e muralnan. E ta pro di e forma di expresion artistico aki, pero den e caso aki como curator y experto di arte, e ta haya cu tabatin un relacion conceptual pober di e muralnan relaciona cu e mesun districto di San Nicolas.

E intencion tras di esaki tabata pa Aruba Art Fair por a bira un escenario ideal pa e grupo di invitadonan por tin contacto cu nos artistanan local y asina fortalece un relacion cu nan. Aunke nan ta cosnan di pasado, e ta mira cu toch e simia cu el a yuda planta a bira un evento cu a yuda trece cierto dinamica riba nivel turistico, pero no artistico.

Sinembargo e ta haya cu Aruba Art Fair a keda como un evento gewoon, ya cu e no a yega na esunnan mas interesa y cu mester a keda central cu ta San Nicolas su pueblo. El a bira un evento algo superficial of di negoshi. Esey tabata Yanez su preocupacion mas grandi. Ya cu e no tabata un art fair mas, sino un festival cu no a tene cuenta por ehempel cu e mesun pueblo di Village cu mester paga pa tin acceso na dje.

Tur esaki na su momento a dal’e duro, specialmente e falta di respet y poco atencion riba e personalidad cu por a produci un relacion valioso y te hasta habri porta pa nos artistanan local riba plataforma internacional importante. “Ma extende e brug imaginario aki y niun hende por a crusa riba dje, pasobra nan no a wordo bon atendi debidamente.” Tur esaki sin interes material.

The Miami New Media Festival 2020

Dos aña despues un biaha mas el a percura pa tur hende interesa por tin acceso gratis na e The Miami Media Festival 2020. “Pa mi ta sumamente importante di por hiba e festival aki, y cu e lo wordo mira.”

Yanez ta conta cu ora el a wordo nombra como representante di e festival aki pa Caribe insular y continental, tambe el a bin cu un exigencia fundamental. E festival tabata online, pero e no a acepta cu e festival aki den su 15 version realisa na Aruba, no lo tuma luga di forma presencial.

P’esey el a crea e formula di “outdoor y indoor.” E prome pensado riba exigencia di instancia di salubridad di cada gobierno cu tin nan protocol pa evita e contagio di e Covid. Evitando conglomeracion di hende den un sala nan a bin cu e alternativa di haci e proyeccion riba e fachada di e edificio cumpliendo cu tur protocol di bio seguridad. Y esey a wordo haci dia 22 di october ultimo, pero no tur hende por a aprecia e evento aki. Aworaki Cas di Cultura a haya e permiso pa realisa esaki paden di nan edificio y esaki lo tuma luga mañan cumpliendo cu tur protocol y regla di DVG. E ta wordo presenta online pa medio di nan canal You Tube

E ta un forma pa promove arte pa medio di exploracion di tecnologia nobo y narrativa interactivo, como video arte, animacion, arte digital y mapping interactivo.

Artistanan

E di 15 version di The Miami New Media Festival 2020 a wordo selecta 8 artistanan, caminda Jimmy Yanez kende a fungi como Curator oficial y hunto cu un grupo di hurado, nan a selecta e artistanan.

Yanez a bisa cu nan seleccion tabata uno masha bon haci, ya cu nan a dicidi pa un grupo di artista di un nivel halto. Nan ta ganadonan di premionan internacional riba tereno di video art, animacion, arte digital (3D) y mapping interactivo. Locual ta wordo presenta na Aruba y tambe den e region Caribe ta 9 video pa un total di 57 minuut di presentacion cu ta refleha e trabaonan di e artistanan selecciona: Hernando Urrutia (Portugal); José Cruzio & Isabel Pérez del Pulgar (Portugal); María Beatríz Granero (Brazil); David Anthony Sant (Australia); Challet Comellas-Baker (USA); Rina Momose (Japan); Daniela Lucato (Italy) y Andrea Leoni (Italy).

Pero e biaha aki e “Special Guest” ta un artista talentoso di Aruba, Olga Gabrielle van Bochove kende lo ta presentando un performance video art “Sotavento Memoria di e Paisahe Oranjstad/Aruba.” Tocante e trabao aki, Yanez a bisa: E ta presenta su ultimo produccion. Y mi por bisa cu Olga Gabrielle su imagennan ta expresa un gran corporalidad… e ta algo enorme y fantastico.” Inclusivo e tin un texto critico riba su obra cu ta riba e mesun nivel di su video art performance.

Na final e curator di arte y museographer a expresa su satisfaccion riba desaroyo di arte contemporaneo na Aruba. El a laga sa cu The Miami New Media Festival 2020 ta dedica pa nos artistanan local cu ta trahando duro na fabor di arte contemporaneo, y cu nan no tin e facilidad financiero di nan por genera nan proceso creativo y tambe nan obra. Pero tampoco e capacidad di benta cu arte moderno por tine.