Durante e pandemia cu ta afecta mundo henter y Aruba tambe, Benita Maduro, kende ta un cosedo profesional, a dicidi di pone su talento na servicio di nos comunidad y tambe di su economia domestico. Apesar di e situacion cu ta obliga nos pa keda na cas, Benita a dicidi di no crusa man y mas bien el cuminsa produci mask traha den diferente style di tela. Nan ta mask made in Aruba.

Den e dianan aki di shelter in place, Benita ta promoviendo y bendiendo su producto haciendo uzo di su Facebook-page. Den entrevista cu Bon Dia Aruba, el a conta nos cu mirando cu su trabou ta cosemento, e ta gusta haci algo cu ta bin na moda of cu por yuda tambe.

“Ma bisa mi mes. Conchale, tin asina tanto problema, wel laga mi purba haci algo toch den un model cu mi por traha pa e clientenan pa wak si mi por satisface nan tambe,” el a bisa.

Benita su fuente di entrada ta dunamento di les di cosemento. Sinembargo debi na e situacion di shelter in place y distanciamento social, e no por haci e actividad aki. P’esey el a dicidi pone su creatividad traha. Benita a pone riba Facebook varios potret, unda e mes ta aparece bistiendo e mask cu e mes a cose den varios color y sorto di tela.

E ta bisa orguyosamente cu e tela ta uno di calidad cumpra na Dowco. E ta mas durabel y mas facil pa cose, y nan tin diferente sorto di tela. Mirando cu e ta wordo traha di tela e ta mas durabel, pero tur hende mester lab’e debidamente cu habon pa evita cualkier contagio cu e virus Covid-19.

Mask yamativo

Te aworaki Benita su mask tin un gran acogida y mayoria di su clientenan ta bin di sector salud, y polis tambe. Nan ta haci nan pedido mirando cu nan ta den e prome linea pa atende cu e crisis aki.

E ta haya cu su mask ta uno yamativo, ya cu e no ta e mask tradicional blanco, cu e tambe tin’e na benta. Sino cu e ta trahe cu tela di diferente color, y awor e ta pendiente di traha nan den berde, cora kima y gel tambe. Pero esun preto ta mas gusta cerca su clientenan.

Ora el a dicidi traha e mask made in Aruba, Benita cu ta gusta tecnologia, a bay check via YouTube diferente patronchi, y el a kies esun cu por cuadra cu tur tipo di cara. “No tur patronchi ta fit na gusto di persona,” el a bisa.

Ademas el a bisa cu su model di mask ta pa tur edad y nan ta bayendo manera pan cayente. Aworaki e ta bezig trahando mas mask pa asina brinda comunidad e proteccion cu nan mester. Pero e ta pendiente di por haya mas tela di diferente color, y e ta spera cu durante e weekend aki e por produci mas pa tin mas mask den stock.

Amor pa cosemento

Benita tabata un hobencita di apenas 18 aña, ora cu el a gradua como cosedo. Esaki a sosode 45 aña pasa, ora cu el a ricibi su diploma na Master Dei. Mas cu cuater decada a pasa caba, y e ta sigui te awe den su profesion di cosemento, pero mayoria dunando les tambe.

El a yega di duna les na Enseñansa pa Empleo pa mas cu 6 aña. Despues el a bay pa UAA, unda el a duna les durante 12 aña largo. Cu su mashin di cose, Benita por haci tur sorto di trabao di cosemento ya sea paña, uniform y cortina. Cu e trabou aki el a lanta su dos yiu, y awor e tin un nieta chikito. Na tur ta orguyoso di Benita su trabou.

Benita ta un Rubiano cu ta refleha e cara amabel y trahado di nos pueblo. Na final e ta conseha pa tur hende bisti e mask aki cu e ta produci of esun normal tambe, pues importante ta pa bo ta bon protegi contra coronavirus. Esun interesa por tuma contacto cu Benita mes via su cel: 593-0528.