Ana Maria Hernandez ta un fiel defensor di arte contemporaneo. Despues di biba 10 aña na Hulanda unda el a studia Historia di Arte na Radboud University y tambe unda el a traha na Manifesta Biennial, Hernandez a dicidi bin Aruba bek, y lanta su fundacion Plataforma Aruba, aña pasa.

El a logra un Master den Historia di Arte Contemporaneo na University of Amsterdam (UvA. Aunke e tin un specialisacion den arte contemporaneo, e mes a pone mas atencion y dedicacion riba arte di Caribe y Latino America.

Plataforma Aruba

Hernandez a dicidi di funda Plataforma Aruba, danki na su estudio y experiencia, pa contribui na fabor di arte plastico na Aruba. E prome situacion tin di haci cu infrastructura di arte na Aruba tin hopi desaroyo cu mester tuma luga.

Apesar di e falta di infrastructura di arte na Aruba, e ta considera cu e nivel di arte contemporaneo localmente ta hopi halto. E ta haci enfasis riba e falta di infrastructura ariba tereno di arte, pasobra tabatin un scol, y e no t’ey mas. El a elogia e trabao cu e artista Elvis Lopez ta bin realisando na Atelier’s 89. Pero no tin luga pa artistanan bin hunto of facilidad pa artistanan presenta nan obranan. Na Aruba mayoria di biaha ta wordo cobra pa un espacio, y esaki ta resulta hopi dificil pa un artista.

Aruba no tin consolida un mercado pa arte. E mercado cu lo por existi ta mas tanto un sorto of practica di un hobby cu bo ta pone den e mesun nivel di un practica artistico. “Esey ta trece hopi confusion,” el a bisa.

Otro aspecto tin di haber cu e relacion entre e publico local y actividad di arte ta hopi debil, practicamente no existente. Den e caso aki por ehempel ta hopi dificil pa nan traha un exposicion of exhibicion cu un gran expectativa cu nan lo bay haya un publico grandi, pero ta resulta cu no ta asina. Semper esunnan cu generalmente ta asisti ta e miembronan di e mesun comunidad artistico.

E ta haya e gesto di solidaridad entre artista positivo, pero mester bin cu mas proyectonan pa trece un publico nobo. “Esaki ta algo cu nos ta purba haci via Plataforma Aruba.” Esaki ta un di e motivacion cu Hernandez tin cu e fundacion aki, ya cu e ta considera lamentabel cu no tin un plataforma, sea gubernamental of tambe di e comunidad mes, unda e artistanan por dedica na arte como un profesion y no manera un hobby, debi cu nan no ta haya e sosten ey.

 

Educacion di arte

Un di e areanan cu el a ripara cu ainda mester di hopi trabao riba dje ta educacion di arte.

El a splica cu esaki no ta relaciona solamente con bo ta traha un pintura of escultura. Sino mas bien con bo ta relaciona bo mes cu arte, y con bo por papia riba arte tambe.

Igualmente pa e hendenan por compronde e rol di arte den un sociedad cu e “ta bay mas haya cu gewoon un obheto cu bo por pone na bo cas.” For di e panorama aki e idea di crea fundacion Plataforma Aruba a bin. “Nos vision ta pa haci e distancia entre audiencia local y arte hopi mas chikito,” el a bisa durante e entrevista aki.

Plataforma Aruba a bira un escenario ideal pa duna comunidad di Aruba mas elemento di base pa nan por haci mas uzo di arte den tur area di bida. Pa ehecuta e obhetivo aki, nan kier bin cu proyectonan cu ta involucra mas nos comunidad. Entre nan traha eventonan of encuentronan importante, unda un audiencia por reacciona na arte.

E ta haya cu na Aruba e relacion entre comunidad y arte ta hopi mas pasivo. “Gewoon wak y djis pensa e ta bunita, mi ta gust’e of no.” Pero e ta haya cu arte ta bay mas leu, pasobra e ta un vehiculo pa comunica idea y concepto. Pero tambe pa reflexiona y trece discusion riba temanan. Esaki ta e base esencial di cada proyecto cu Plataforma Aruba ta percura di realisa.

Inicialmente nan a cuminsa cu proyectonan na escala hopi chikito debi cu e publico ainda ta basta limita na Aruba. Tambe como fundacion nan ta colabora cu e netwerk cu Hernandez a yega di crea internacionalmente durante su experiencia na Manifesta Biennial, pero tambe cu e netwerk local.

Semper nan tin atencion pa inclui artistanan estableci na Aruba. “Nan ta esunnan cu mester wordo poni como central riba cada proyecto cu Plataforma Aruba ta ehecuta.” E biaha aki el a logra structura un tiki mas diferente, nan actividadnan. E prome tabata proyectonan los, y aworaki el a yega traha un structura di cuater programa caminda cada un di nan tin nan mesun meta, y tur informacion ta ariba nan website(www.plataformaruba.org)

Ana Maria Hernandez di fundacion Plataforma Aruba ta haya fundamental cu mester habri e canal di comunicacion entre publico y practica di arte na Aruba.

E ta kere cu esaki por sosode dor di intermediacion mas activo, caminda nan mester bay cerca e publico, y no warda cu e publico por bay cerca nan. Ya cu tin hopi potencial riba produccion artistico na Aruba. Te hasta tin basta iniciativa di parti di e artista mes y tambe di e comunidad artistico, caminda nan ta purbando di lucha pa trece esey dilanti.

Na final e ta hopi positivo cu den e proximo añanan nos lo bay mira un crecemento hopi fuerte den e interes y nivel di produccion artistico na Aruba.