(AP) – Un entrepeneur di media ta trata di conecta cu hobennan perturba pa e impacto di red social ariba nan salud mental cu personanan mas grandi pa lucha pa cambia e forma con companianan di tecnologia ta haci nan negoshi.

E Centro di Media Sostenibel recien forma tin e intencion di stop e companianan di usa algoritmonan pa pusha informacion dañino na hobennan vulnerabel, cosnan scur manera metodonan di suicidio. Capitalista di riesgo y administrador Bradley Tusk a mira esaki personalmente; e ta kere cu e desorden di alimento di su yiu muhe a bira pio pa motibo di loke el a wak online.

E ta hopi leu for di e speransa inicial cu internet lo conecta mundo pa un uso mas positivo, segun e fundador Steven Rosenbaum, anteriormente productor di “MTV News: Unfiltered,” di varios documental y ex-lider di NYC Media Lab.

“Ora bo encontra cu loke bo a yuda traha ta causa mas daño cu bienestar, no tin manera cu bo por lanta mainta y no haci nada tocante esaki,” Rosenbaum a bisa.

Ciruhano General di Merca, Vivek Murthy, na luna di mei a lanta pa accion inmediato pa proteha e hobennan, notando cu e uso di rednan social ta casi universal pero su impacto riba salud mental no ta wordo comprendi completamente.

E Centro di Media Sostenibel no ta su so den e esfuerso aki. E organisacion Fairplay ta boga pa stop tacticanan cu ta manipula muchanan pa pasa hopi tempo ariba internet. Waituntil8th.org ta urgi mayornan pa no duna muchanan telefon inteligente te ora nan yega e di ocho grado (zesde klas), y pa mantene nan leu di rednan social te ora nan por lo menos 16 aña di edad.

Josh Golin, director ehecutivo di Fairplay, a bisa cu tin espacio pa e enfoke di Centro di Media Sostenibel, specialmente pa duna hobennan mas poder pa comparti nan propio experiencianan.

“Segun mi perspectiva, cuanto mas tin, miho,” Golin a bisa. “Nos ta enfrentando un di e industrianan mas poderoso y bon financia na mundo.”

Ademas di Tusk, sostenedornan prominente di e Centro di Media Sostenibel ta inclui e ehecutivo veterano di media y fundador di YES network, Leo Hindery Jr.; Roger McNamee, inversionista y autor di “Zucked: Waking up to the Facebook Catastrophe”; Eric Gertler, presidente ehecutivo di U.S. News and World Report; y David Hornik, un capitalista di riesgo biba na Silicon Valley.

Rosenbaum tambe a logra involucra hobennan cu un gran cantidad di siguidonan online, manera Emma Lembke, fundador di Log Off, un organisacion funda pa hobennan pa trata uso di rednan social; Zamaan Qureshi, co-presidente di Design it For Us, otro grupo di activista ariba nan social; y Aidan Kohn-Murphy, fundador di e grupo di activistanan progresista Gen-Z For Change.

Den e ultimo luna, e Senador di Merca, Cory Booker, un democrata di New Jersey, a tene un reunion via Zoom pa hobennan activista y a expresa nan sosten pa nan meta.

“Si mi tabatin un yiu y nan tabatin 14 of 15 aña, mi lo haci tur cos pa tene nan leu for di e plataformanan aki,” Booker a bisa durante e sesion. “Nos tur probablemente lo bisa cu esey ta mas malo cu huma sigaria.”

Tusk, den un entrevista, a bisa cu e ta envolvi cu e Centro di Media Sostenibel den parti pasobra e kier mobilisa hobennan pa sostene un otro meta cu e tambe ta apoya, votacion via telefon celular.

El a bisa cu e ta spera cu e grupo por tuma algun accion dramatico pa duna e problema di rednan social mas visibilidad.