Entrepeneur Arubano Phil Hunt ta conta Bon Dia Aruba con e tabata pa cuminsa su propio negoshi y basa esaki na Alemania. Sr. Hunt den pasado a yega di duna tayer na Aruba riba con pa maneha un online business mirando e desaroyonan cu tin actualmente den mundo di comercio. Ora bo ta den un pais stranhero, como comerciante sigur bo tin cu traha mas duro cu e personanan di e pais mes, segun sr. Hunt.

E entrepeneur su motivacion pa cuminsa su propio negoshi a cuminsa ora cu e tabata studiando den direccion di hospitalidad y turismo, pero no tabata mucho feliz unda esaki tabata bayendo. “Mi no tabata kier a traha den algo cu mi no gusta. P’esey mi a cuminsa wak den mi mes kico lo mi kier haci.” Sr. Hunt ta di e opinion cu si bo ta den un rango di trabou cu bo no gusta y simplemente ta haci esaki pa e placa cu e ta ofrece ‘bo lo keda den algo asina te cu bo realisa cu e no ta bo pasion’.

Sinembargo segun sr. Hunt, esaki no kiermen cu e no ta un gran esfuerso pa tin un propio negoshi. Pero pa su persona te hasta ora mester traha oranan largo ‘e no ta sinti asina pasobra mi ta disfruta di loke mi ta haci’.

‘Como stranhero bo tin di traha dobel duro’
Pa loke ta trata su decision di bay lanta un negoshi na Hamburg, cu actualmente ta un coffee shop, esaki tabata envolvi diferente elemento. Primeramente pasobra sr. Hunt mester a pensa unda pa basa operacionnan mientras e tabata den cuminsa un famia. Anteriormente basa den Amsterdam, Hamburg a bira un opcion mas atractivo pasobra ta poco mas barata cu Hulanda y tambe lo tin mas famia cerca. E entrepeneur a dicidi di cuminsa cu su mesun negoshi den un pais stranhero pasobra ‘ora bo no ta compronde e idioma mucho bon, e trabounan cu bo por haya no ta asina bon’. Pues sr. Hunt mester a pensa outside of the box’ pa bin na un trabou cu lo por yuda sostene su famia y gana pan.

Aunke como comerciante e no ta necesario pa bo conoce e idioma pa opera, mirando cu tin personanan cu ta yuda cu e’sey, sr. Hunt a realisa cu e lo mester traha mucho mas duro cu su coleganan Aleman. “Mi no por a descarta cu mi ta un inmigrante den Alemania. Pero esaki a pusha mi tambe pa traha mas duro pasobra e realidad ta cu ora bo ta un stranhero bo tin cu traha cu dobel esfuerso cu un nativo tin cu traha.” E diferencia aki ta encera cu como stranhero bo mester ta mas dispuesto pa competi duro contra Alemannan y pa siña cosnan masha lihe mes, segun sr. Hunt.

Tayer di comercio online
Pa sr. Hunt e importancia ta keda na tur hende pa por haya nan pasion. P’esey algun luna pasa sr. Hunt a duna un tayer pa personanan local lanta nan mesun negoshi. “E ta motiva mi pa wak cu hende ta bay dilanti. Asina mi ta wak bida: si bo por yuda hende y stima loke bo ta haci bo semper lo ta bon para.”

Segun sr. Hunt, hopi biaha ora un persona haya su pasion no mester haci mucho stap extra pa haya un manera pa crea ganashi cu esaki. E tayer cu sr. Hunt a duna a enfoca riba curasha Rubianonan pa pensa di manera creativo y uza e mercado online como un herment pa por sigui nan pasion. Aunke e no sa exactamente unda e personanan cu a tuma e tayer ta den nan proceso actualmente, e ta haya cu e tayer a bay bon.

Segun sr. Hunt, e mentalidad mester por amplia den e mundo moderno cu nos ta biba den dje. “Mi conoce hende cu ta gana nan pan completamente di bende producto online. Nan ta bay rond mundo y ta  sobrevivi a base di loke nan ta gana cu online.” E estilo di bida di ‘nomado digital’ aki a bira hopi popular ultimo tempo. Aunke pa sr. Hunt esaki no ta un estilo di bida cu e mes lo kier tin, e ta admira e pasion y mentalidad tras di e movemento aki. Actualmente e comerciante Arubano tin su online shop ainda como extra inkomen.

Hunt Brothers Kaffeerösterei
Pa loke ta trata sr. Hunt su coffee shop den Alemania, e ta haya cu e ta bayendo den bon direccion. Pero e ta subraya cu mester tin pasenshi ora bo tin un propio negoshi. “A tuma nos un tempo pa haya un bon imagen akinan na Hamburg, pero cada dia nos ta crece poco poco. Recien un amigo a conta mi cu nos tin un bon nomber den Hamburg y hende ta papia bon di nos. Esaki tabata algo cu mi a aprecia hopi pa tende.”

Mirando e direccion positivo unda nan ta bayendo cu e Kaffeerösterei, sr. Hunt tin plania pa habri un di dos coffee shop den Alemania. “Nos no kier bira asina grandi manera algo manera Starbucks, pero si e plan ta pa por ofrece nos productonan na un audiencia mucho mas grandi di loke e ta awo. Nos kier tin un bon nomber den Europa henter.”

Pa yega na un bon nomber sr. Hunt di cu nan lo participa den e Barista Championships, unda baristanan ta competi pa mira ken ta e persona cu por presenta y prepara e miho koffie. Sr. Hunt lo bay competi den e World Brewer’s Cup. Esaki segun su persona ta encera cu ta traha koffie pa un hurado di 3 persona cu despues di wordo splica dicon e koffie cu ta wordo presenta ta e miho koffie ta purba esaki y dicidi riba un ganado. “Mi ta bay competi proximo aña den maart y mi tin plania di gana.” Segun sr. Hunt, e lo ta e prome persona Arubano cu lo ta competiendo den e World Brewer’s Cup.