Entrepeneur Arubano ta purba amplia aprecio pa koffie pa medio di su negoshi

Siman pasa a tuma luga e coffee tasting di Hunt Brothers Coffee na Craft, cual a mira un interes pa personanan cu tabata curioso riba e diferente tiponan di koffie cu ta existi. Prome cu el a subi un avion bay bek Alemania, nos a papia cu e doño di Hunt Brothers Coffee Phil Hunt pa asina e amplia mas riba e tema di koffie y su experiencia como negoshante Arubano den exterior.

Durante e coffee tasting sr. Hunt a splica con e proceso di traha koffie ta bay, mientras tabata mula e bonchinan di koffie y tabata urgi e bishitantenan pa hole e aroma di e bonchinan mula. Pa sr. Hunt, koffie ta mas cu un bebida cu bo por uza pa haya cafeina den bo sistema. E experiencia cu su persona kier trece dilanti ta un apreciacion mas profundo pa e bonchi special aki cu ta crea e bebida popular. E manera con sr. Hunt a bin ta maneha un empresa cu ta bende koffie tabata masha simpel, segun e. “Mi a cuminsa cu koffie como un hobby. Pues mi mester a cuminsa un dieta di koffie preto so y eynan el a cuminsa. Poco poco mi a haya mas interes den e producto te cu un amigo di mi a mustra mi un koffie special cual a cambia mi pensamento di e bebida aki completamente.”

Sr. Hunt ta describi e experiencia aki di manera cu e no por a kere locual e la hole tabata koffie. Generalmente e empresario ta haya cu koffie tin un reputacion pa ta bitter, ‘pero e koffie aki tabata hole mane caramel’. Despues di bay den mas detaye con koffie ta wordo traha y apreciando e manera con cunukeronan ta traha duro pa crea e miho producto, sr. Hunt a dicidi di cuminsa un negoshi basa riba koffie. Esaki den comienso tabata enfoca riba bende mashinnan pa mula koffie. Sr. Hunt a enfatisa cu p’e su hobby a bira e manera con e ta gana su pan.

Variedad di bonchi y procesamento
Durante e koffiemorgen pa saboria e koffie di e rumannan Hunt, a wordo splica con koffie a bin ta existi y con a bin na variedadnan diferente den e bonchi. Segun sr. Hunt, koffie a cuminsa na Africa, specificamente na Ethiopia. Djey el a wordo exporta durante tempo di colonialismo pa Merca y Europa. Na Latinoamerica en particular koffie a bira algo casi indispensabel pa industrianan di por ehempel Colombia. Esaki tabata debido na e manera con e bonchi ta ahusta su mes na e condicionnan di su medio ambiente. “Si bo lo tin un bonchi di Africa y bo lo hiba un Merca y un na Venezuela, ambos lo crece di manera diferente y tin sabor diferente tambe.” E bonchinan aki den cierto caso ta duna fruta di colo completamente diferente, segun sr. Hunt.

Pero loke ta crea un diferencia grandi den e sabor cu e koffie ta haya ora e bebida wordo consumi segun sr. Hunt ta e manera con e koffie ta wordo cultiva y procesa. “Cada pais tin su mesun manera di cultiva koffie. Den e dos variedadnan Arabica y Robusta tin diferencia tambe. Den Arabica por ehempel, mescos cu appel, bo tin appel berde, appel geel, appel cora, etc.” Tin 3 variedad den e manera con ta cultiva e koffie: natural, honing y laba. Koffie cu ta wordo cultiva den estilo natural ta keda cu e fruta pega na e bonchi, cual hopi biaha ta crea sabornan mas compleho. Sinembargo segun sr. Hunt e koffie aki ta masha dificil pa cultiva y ta exigi un proceso di labor intensivo ‘pasobra bo tin cu check constantemente pa e fruta no a daña’. E estilo laba ta esun cu ta wordo procesa mas, cual kiermen cu e bonchinan ta wordo laba pa asina kita e fruta. Koffie laba ta e proceso cu ta percura pa mas koffie sali bon di tur e otro procesonan. Estilo honing ta cay memey di e otro dos procesonan.

Pa sr. Hunt e ta importante pa tin un conexion directo cu e cunukeronan cu ta cultiva e koffie cu e ta uza den su productonan. Pues p’esey e empresario a bishita Colombia recien unda el a bay saboria e miho koffienan pa dicidi cua Hunt Brothers lo uza den nan productonan. “Actualmente nos tin lasonan cu Colombia, El Salvador y Brazil. Nos a establece relacionnan bon aki na Latinoamerica. Mi ta spera den futuro mi lo por acerca e cunukeronan na Africa pasobra mi stima koffie Africano.”

Un di e personanan cu a bishita e koffiemorgen a haya e sabor di e variedad di Burundi ‘tabata smaak mane te’. Esaki segun sr. Hunt ta loke e experiencia cu koffie lo mester ta.

Desaroyo actual: bonchi di koffie GMO y cunucu organico
Segun sr. Hunt cientificonan ta elaborando geneticamente diferente variedadnan di koffie uzando tecnologia avansa. Esaki ta pa haci un bon cultivacion mas probabel pa cunukeronan pa medio di haci bonchinan mas resistente na cierto malesanan, insecto y en general contra efectonan medio ambiental cu e mata por enfrenta. “Asina bo ta salvaguardia e bida di e cunukeronan”. Un efecto secundario di elabora bonchinan GMO ta cu ‘hopi di e koffienan GMO ta esunnan mas dushi na mundo’.

Sinembargo e empresario ta haya cu tin e koffienan cu ta wordo elabora di e manera aki cu no ta smaak mucho dushi ‘pa via di hacie mucho bitter’. Pero claro e ta depende riba smaak individual. Pues sr. Hunt ta kere cu si ta bay cu e proceso aki mester tene cuenta pa genera algo cu ta smaak bon toch ‘pasobra e ora ey bo no ta drecha e situacion di e cunukeronan si nan no por bende’.

Mas aleu despues di su bishita na Colombia desaroyonan actual na nivel mundial den area di koffie ta encera cu mas y mas cunukeronan ta purbando pa cultiva di manera organico. Pues sin uzo di kimico manera insecticida. Segun e empresario, e productonan kimico aki ta crea daño permanente na e tera y e region den cual e cunukeronan ta cultiva nan producto. “Nos ta purbando di traha mas y mas cu cunukeronan organico, pero e reto ta pa nan haya e hermentnan necesario pa por cuminsa cultiva di e manera aki. Mirando cu e no ta mescos cu cultiva no-organicamente.” Segun sr. Hunt, di punto di bista di sostenibilidad, ‘cunukeronan cu no ta cultiva organicamente por haya problema den 10 aña’. Nos lo elabora mas riba e negoshante su experiencia como entrepeneur Arubano na Alemania den un proximo edicion.

Akinan por mira un corto video di un di e entrevistanan cu Bon Dia a yega di haci cu Phill Hunt den 2016 riba un charla relaciona cu Online Business cu el a organisa.