Recientemente autoridad Mericano a detene e homber Dominicano Jesus Arias De La Cruz di 35 di edad, cu ta acusa di a viola un dama Mericano di 20 aña di edad. E sospechoso ta residencia na Aruba pa mas di 20 aña, unda e tin añanan ta fungi como entrenador y ta envolvi cu Comite Paralimpico di Aruba.
Segun e portal NoticiaCla.com e sospechoso a ser identifica como un Mericano acusa di viola un dama hoben na Mercer County. Nan a detene e homber ora e tabata purba scapa pa bin Aruba, despues cu e violacion a tuma luga.
E autoridadnan ta acusa e homber fam Arias De La Cruz di asalto sexual indecente. Segun Polis, e incidente a tuma luga durante un fiesta na Jefferson Township dia 20 di juli ultimo. E victima a declara na Polis cu su persona tabata drumi den camber di un cas, ora cu e sospechoso a drenta paden y a viol’e. Nan a detene e sospechoso e mesun dia cu e incidente a tuma luga na aeropuerto di Pittsburg ora cu e sospechoso tabata di bin bek Aruba.
E sospechoso ta residencia mas di 20 aña na Aruba y ta un entrenador conoci cu un caracter suave. Ta ser bisa cu e sospechoso ta un persona trankil y ta contra di violacion specialmente contra ser femenino. E ta envolvi cu Comite Paralimpico di Aruba.
Nota di redaccion: Un persona a yama nos redaccion pa kita un potret unda e sospechoso ta aparece banda di coachnan di landamento. E persona a pidi esaki pa no duna impresion cu e sospechoso lo tin algo di ber cu e coachnan di landamento cu a aparece riba e potret. Intencion tabata pa ilustra e sospechoso su envolvemento den e comite Paralimpico, no pa duna impresion cu cualkier otro persona den potret lo ta envolvi cune. Nos a reemplasa e potret en cuestion.
