Ya pa algun dia caba tin varios polemica riba entregamento di lista politico cu mester tuma luga dia 4 di augustus proximo. Entre otro a start un discusion riba e localidad cu Conseho Supremo Electoral (CSE) a scoge pa entrega di lista (Censo). Tambe ta wordo hopi comenta riba e hecho cu partido AVP ta e unico partido cu no kier mantene su mes na e programacion stipula pa CSE, na unda cu AVP lo mester entrega su lista pa 10.30am.
Orario
CSE ta e organo encarga cu supervision y maneho di henter e proceso electoral. Pa e motibo aki CSE a pone secuencia di orario entre 9.00am te cu 4.00pm pa partidonan por haya nan amplio espacio di haci e entrega oficial di nan lista. Den e Kiesverordening ta stipula cu riba dia di entrega di lista, partidonan tin te cu 4or di atardi pa haci esaki, pues nan no ta mara legalmente na un schema. No obstante esaki, CSE ta pidi semper cooperacion di partidonan pa wanta na e schema cu nan ta traha. E problemanan a cuminsa na momento cu den un comunicado, partido AVP a duna di conoce cu nan lo a switch di orario cu partido RAIZ. Esaki despues a keda desmenti pa lider di RAIZ, kende a bisa cu nan lo entrega nan lista na e orario cu a wordo duna na nan for di CSE. No obstante e intento di CSE pa pidi rasonamento di partido AVP, tur indicacion ta mustra cu nan lo keda para riba nan punto di lo entrega e lista na un orario diferente.
Localidad
Desde cu a anuncia cu lo uza Censo di Aruba manera localidad pa entregamento di lista, a bin un ola di reaccion den comunidad. Varios persona ta comenta cu e espacio ta hopi chikito y cu esaki por trece confrontacion entre partidonan. Alto Comisario Dolfi Richardson tambe a expresa su preocupacion pa medio di un carta na CSE. Segun e comisario, e no ta haya cu Censo ta un luga cu por ricibi hopi hende y di experencia e sa cu partidonan no ta mantene nan mes na regla di horario etc. Den un entrevista cu e medio di comunicacion NoticiaCla, sr. Richardson ta splica cu e no ta haya e decision aki uno responsabel. E comisario ta sugeri pa uza otro localidad manera Cas di Cultura cu si ta duna mas espacio pa mas persona. Como tal, e Alto Comisario ta bisa cu si mantene e mesun localidad, no por garantisa siguridad di esunnan cu lo ta presente.
Faltando 3 dia pa entregamento di lista, por tuma nota cu mas y mas persona ta atento na esaki. Riba entre otro Facebook y programanan radial por scucha y lesa di diferente campo politico ta bisa cu e combinacion di orario y localidad ta bay provoca un confrontacion serio.
CSE a manda un carta pa Minister President Mike Eman, Minister di Husticia Arthur Dowers y Alto Comisario Dolfi Richardson kende ta esunnan responsabel pa orden publico pa percura cu cada partido ta mantene nan mes na regla y tambe na e schema di entrega di lista cu CSE a traha.
