Ministerio Publico (OM) y polis ta hibando un maneho di zero tolerancia awe na Stadhuis, unda for di 9or di mainta e 10 partido politico ta entrega oficialmente nan lista cu candidatonan pa eleccion 2017. AVP, MEP y POR ta e unico tres partido cu polis a duna permiso pa organisa actividad awe. Mas cu 80 polis ta riba pia pa zorg pa orden publico.

Manera ta conoci, AVP ta desvia (en bes di 10.30 nan ta bay 3.30 pm) for e orarionan cu Conseho Electoral a stipula pa e evento bay den un ‘manera ordena’. UPP tambe a dicidi di cambia nan orario di entrega pa motibo cu nan a dicidi diaranson pa combina nan lista cu esun di PPA. Asina nan a dicidi di entrega e lista hunto cu PPA 1’or di merdia.

E tres partido menciona tin nan actividad planea riba diferente luga. AVP ta informa cu nan a dicidi di busca un otro luga di salida en bes di Green Square como cu un otro partido grandi (MEP) lo sali den mesun area di Adriaan Laclé Blvd. Nan ta bisa cu pa motibo di siguridad nan a hala pa Veld di Cricket na Vondellaan unda nan intencion ta pa keda celebra te 5.30 atardi. Segun draaiboek di polis, simpatisantenan di Arthur Dowers lo sali riba nan mes for di nan sede na Dakota direccion Veld di Cricket. Mobilidad di KPA lo tin bista riba nan. Pero polis lo no guia e parada despues di AVP pa Stadhuis. Esaki tampoco ta e caso pa e paradanan di e otro dos partido.

MEP lo sali cu su parada for di Klip, crusada Adriaan Laclé Blvd./Wilhelminastraat POR ta sali for di Juliana Plein locual ta e plasa dilanti Juliana School y despues e parada ta bay direccion di nan sede na Noord.

Acuerdo riba candidato cu mas voto
E listanan di POR y di RED ya ta conoci caba. Ambos partido a firma un acuerdo den nan seno cu e candidato cu ta haya mas voto, lo drenta parlamento. Aunke cu e ley (Kiesverordening) no ta cambia ainda. Parlamentario di MEP Dangui Oduber a purba di cambia e ley, entre otro riba e punto menciona. Pero e no a logra pa su proposicion bay parlamento pa tratamento na tempo. Te awor presidente di parlamento a keda sin agenda esaki. Tin mas partido manera UPP y PPA cu a priminti cu tambe lo sigui e principio di esun cu mas voto lo drenta parlamento. Bon Dia Aruba kier remarca cu e ley actual ainda ta prescribi cu e secuencia ta determina ken ta bay sinta den parlamento. Y asina candidatonan cu mas voto no a obtene e derecho ainda.

Bebemento
Manera menciona, polis y OM ta hiba un maneho di zero tolerancia, miho conoci como Faya-Bo-Haya. Esaki ta encera cu OM lo ofrece un boet na personanan cu keda deteni relaciona cu delitonan relativamente simpel manera violencia leve, destruccionnan, buracheria y otro comportacion inaceptabel. “Si hende dicidi pa paga mes ora, anto e caso ta cla. Si un hende dicidi pa no paga, anto e lo wordo persigui. E exigencia den Corte ta cay semper bastante mas halto cu e boet na Warda di Polis, y p’esey ta recomendabel pa paga na Warda di Polis mes”, asina OM ta splica. Nan tambe ta haci un ‘yamada urgente na publico pa paga tino cu bebemento di alcohol’.

Bandera of borchi na palo di luz
Un aviso cu a sali for di Elmar concerni pegamento di bandera y of borchi cu propaganda politico na palonan di luz of palonan di sosten di waya di coriente. E compania ta bisa cu nan no ta permiti esaki: “No ta duna permiso na ningun partido pa haci tal acto, e ta un acto masha peligroso. Algun aña pasa tabatin hasta consecuencia fatal, pues ta haci un apelacion serio pa no haci esaki.” Den e caso cu nan ta haya propaganda pega, nan ta kita esaki pero ta duna e doñonan si e chens pa busca esaki bek ‘si ta desea’.