ORANJESTAD – Fundacion Famia Plania tin e servicio pa entrega condom of preservativo na domicilio. Aunke un sorto di iniciativa asina tabata genera den pasado cierto reaccion di e sector conservador y tradicional di nos comunidad, aworaki e mentalidad ta mas habri. E servicio aki no solamente a wordo bon tuma, te awor ainda e ta bon acepta tambe.

E servicio innovativo aki –segun Jonnathan Trinidad di Famia Plania– a haya su acogida. E por bisa cu e servicio aki a wordo lansa na augustus di aña pasa, y te aworaki nan por wak cu acogida di e servicio aki ta grandi. E acogida aki no ta bin di nos poblacion jong so, sino cerca personanan adulto cu ta haci uzo di e servicio aki. E tin un gasto extra di Afl 2.50.- pa deliver e preservativo.

Actualmente nan tin un oficina situa na Oranjestad, pero e no ta suficientemente cerca pa hopi hende cu lo desea di haci uzo di nan servicio. P’esey a dicidi di trece un cambio dilanti, pa asina yega na e personanan cu tin mester di nan. Un motibo tambe tin di haber cu fundacion Famia Plania su orario di servicio ta entre 8am pa 4 pm; y tin biaha e hendenan no por yega cerca nan pa busca e productonan.
Encuanto e campaña di departamento di Salud Publico (DVG) riba uzo di condom den cuadro di carnaval 65, caminda e hende muhe y no e hende homber ta esun cu ta carga e preservativo aki, ta uno innovativo tambe. Trinidad a bisa cu tanto hende homber como hende muhe ta consciente tocante importancia di uzo di condom pa preveni malesa transmiti sexualmente y evita embaraso no desea.

Pa añanan largo, organisacionnan internacional a pone atencion pa hende homber ta esun cu mester carg’e semper; nan a dicidi di bin cu un cambio. E cambio aki tin di haber pa e hende muhe tambe por hunga un rol di responsabilidad pa tuma e decision aki. E ta haya cu antes, e hende muhe su mentalidad tabata cu e condom ta pa uzo di hende homber, y e ta esun cu mester percura p’e.

Pero e mentalidad aki a cambia, ya cu si e momento yega cu e hende homber a lubida carga cu e preservativo, pa asina ey tin e dobel proteccion contra malesa of embaraso no plania. P’esey den e temporada di carnaval aki nan a haci pa e hende muhe trece e mensahe, pa no laga e asunto aki ‘den man di hende homber so.’

E ta haya cu e cultura ‘machista Caribense’, cu hende muhe ta esun cu ta carga e bariga, y cu ta hende muhe esun cu mester cuida su mes, ya cu hende homber ta liber di cualkier responsabilidad, esaki ta cambiando. E organisacionnan cu ta trahando riba e tereno aki ta purba semper di motiva y conscientisa pa e responsabilidad di un relacion sexual ta algo den dos, y no den un persona so.