Ayera e representante di e compania Freman, Haime Winterdaal a haci entrega di e trabou cu nan a realisa riba e tereno di Aruba Carnival & Entertaiment Village na DOW.

Entrega.
Director di DOW, Marlon Croes a bisa cu e proyecto aki tabatin su reto cune, pero finalmente a bin cla, y despues di casi un aña a wordo entrega e trabou aki oficialmente na gobierno. Croes a laga sa cu e proyecto aki tabatin un inversion di 1.2 miyon florin.

Den e mesun acto aki Director di DIP, Haime Croes, kende ta encarga cu e maneho di e seis kiosconan nobo cu a wordo construi, a entrega oficialmente e prome di nan na e huurdo, Patricia Baptist. Un acto cu a conta cu presencia di Minister Otmar Oduber y Minister Chris Romero.

Ademas tabata presente Parlamentario Alan Howell (POR), y demas invitadonan, entre nan directiva di San Nicolas Business Association. Den e facilidad aki a wordo traha bañonan publico teniendo cuenta cu e peticion di e chauffeurnan di e autobusnan y nan usuarionan tambe.

Winterdaal a bisa cu e proyecto aki a wordo construi den dos fase, e prome na inicio di aña y previo na celebracion di Carvanal 65. E trabou inicial aki a inclui e facilidad pa e autobus y e muraya di fama pa e ganadonan di Calipso y Roadmarch. E di dos fase despues cu e periodo di Carnaval 65 a culmina, a inclui e kiosconan y e bañonan.

El a declara cu pueblo carnavalesco y esun cu ta haci ehercicio ta bay disfruta di e facilidad aki. E ta spera cu nos tur por haci uzo di dje. Winterdaal a probecha e oportunidad aki pa tur hende duna su contribucion na Anthony Thompson kende lo ta encarga pa controla e facilidad aki. Winterdaal a pidi pa tur hende cuida e proyecto aki pa e por dura nos hopi. “E ta un bunita proyecto pero nos tin cu cuid’e,” el a bisa.

Ministernan.
Tanto Oduber como Romero a expresa nan satisfaccion cu e culminacion di e proyecto aki. Igualmente nan ta spera cu denter di poco lo wordo anuncia e ponemento di e prome piedra di e proyecto hotelero na Sero Colorado, y tambe proyectonan cu ta biniendo na Baby Beach.

Minister di Infrastructura a menciona cu un biaha mas San Nicolas a wordo reconoci internacionalmente pa su herencia cultural, unda te hasta nos a gana Hulanda, pa loke ta trata aspecto di musica y cultura pariba di nos isla. Segun e mandatario, nan a compromete pa Aruba Carnival & Entertaiment Village por bira un sitio mas accesibel, y mas entretenimento pa pariba di nos isla.

Pero tambe crea atraccion y experiencia unico cu e turistanan cu tin intencion por ehempel di bay Baby Beach, pa nan por para y disfruta di loke ta wordo ofrece pa e hendenan nativo di San Nicolas mes. Tur esaki ta crea un apertura pa un destinacion turistico y diversifica actividad economico na San Nicolas.

El a felicita Baptist, kende a bira e prome huurdo di e kiosconan cu a wordo construi. Segun e mandatario tin diferente personanan a aplica pa huur un di e seis kiosconan aki. “Nos ta haciendo di un forma hopi habri y transparente,” el a bisa. Ainda esun interesa por introduci nan solicitud na DIP pa por bin na remarca, caminda un comision ta determina kendenan ta esun cu lo haya un kiosco pa huur, segun e mandatario.

Romero a bisa cu esaki ta parti di e prome paso pa e desaroyo cu gobierno ta treciendo pa basta tempo caba pariba di brug, y specialmente na San Nicolas.

“Esaki ta e compromiso cu nos tin cu pueblo di San Nicolas,” el a bisa.

El a declara cu Minister di Economia nobo na Corsou a informa cu pa 2020, nan lo pone den nan presupuesto pa asina nan por sigui cu e Fast Ferry. Tur esaki -segun Romero- lo contribui mucho mas cu e desaroyo positivo cu nan ta spera di e pueblo di San Nicolas. E mandatario a referi na e potencial turistico cu San Nicolas tin, unda e bishitantenan ta sinti cu ta ariba un isla Caribe, particularmente pa su musica y cuminda dushi.