For di dia 2 di september te cu 16 di december comunidad ta bay tin e oportunidad di hiba su desperdicionan na “Baki di Bario” cu tur diasabra ta bay ta ubica na diferente districto di Aruba den conexion cu e campaña nacional “Limpi Limpi” cu minister di Naturalesa y Medio Ambiente Ursell Arends a anuncia diamars ultimo.

E programa di fechanan ta lo siguiente:

2 di september: Watertoren (ex-Dimas) San Nicolas

16 di september: dilanti Macuarima Scol Santa Cruz

07 october: Compleho Frans Figaroa Noord

21 october: Marlboro Ball Park Dakota

04 november: pabou Veld La Fama Savaneta

11 november: Veld di Universal Pos Chiquito

18 november: Veld di Rooi Afo Paradera

25 november: Centro di Bario Playa Pabou Oranjestad

02 december: Compleho Frans Figaroa Noord

09 december: dilanti Macuarima Scol Santa Cruz

16 december: Watertoren (ex-Dimas) San Nicolas.

Tur e dianan aki e bakinan ta bay ta disponibel for di 8or di mainta te cu 12or di merdia.

Den e dianan aki, un parke pa separacion di desperdicio lo ta den rotacion di districto pa districto di manera temporal Esaki lo ta posibel cu e ayudo di tur partners cu ta colaborando cu e campaña.

Durante e dianan Baki di Bario lo acepta green waste, metal, e-waste, desperdicio di construccion reciclabel y bulk waste. Tambe tin cu remarca cu Baki den Bario ta solamente pa desperdicio residencial cu por ser hiba cu trailernan chikito y no ta habri pa desperdicio comercial cu ser hiba cu trucknan grandi manera a anuncia.

Poniendo como ehemplo, si un famia den su cura di cas tin un frigidaire of un stof cu no ta funciona mas, por hiba esakinan te Baki di Bario den e dianan ey sin ni un costo.

Cu e meta di tin un maneho di desperdicio responsabel, cu tin e obhetivo di cumpli cu e Algemene Politie Verordening cu ta esencial pa e prevencion di sushamento y e creacion di dumpnan ilegal, ademas pa tene un Aruba limpi cu un calidad di bida halto y un economia prospero ta necesario pa educa e comunidad en general riba separacion di desperdicio cu ta reduci e contaminacion ambiental y ta yuda pa e procesamento responsabel di materialnan.

Aruba tin un cantidad di sushi rond di e isla crea pa dumpnan ilegal na unda comunidad awor tin e oportunidad di hiba nan desperdicio di nan mesun cas di manera responsabel y separa na e bakinan di e campaña Limpi Limpi pa asina cuminsa tene un Aruba sin hopi desperdicio riba caya.

Ademas di e actividad aki cu e bakinan den districtonan, minister Arends a anuncia cu den proximo dianan ta bay tin otro actividadnan cu nan ta bay anuncia bao di e obhetivonan menciona pa loke ta trata maneho di desperdicio.

Den esaki, Aruba Tourism Authority (ATA) tambe tin un rol importante na unda cu Ronella Croes ken ta fungi como CEO di e instancia aki a señala cu e campaña aki ta importante tanto pa nan como pa e turismo na unda un cos cu nan ta pone accento riba dje ta pa por provee un experiencia inolvidabel na e bishitantenan sin lubida cu ATA tambe ta pa para pa salvaguardia un calidad di bida respectivo pa e mesun comunidad “y parti di biba den un Aruba limpi ta importante pa nos bishitantenan pero tambe pa nos comunidad,” el a bisa.

Pa e motibo aki, ATA pa varios aña caba tin diferente accion cu ta enfoca riba limpiesa di e pais, esaki nan ta haciel’e a traves di coloca diferente bari di sushi rond di e isla, cu esaki nan no ta permiti solamente na e usuario pa nan haci uso di esakinan sino cu tambe nan ta stimula e separacion di sushi “cu esaki nos ta pidi na e usuarionan pa separa plastic, aluminium y e restante di e otro sushi, por lo general e usuario ta respeta esaki pero nos ta mira cu mester di mas conscientisacion riba e area aki p’esey nos ta uni nos mes na e campaña aki no solamente pa explora con nos ta bay coloca mas bari di sushi cu ta un di e peticionnan cu a bin tambe pero tambe pa nos stimula e separacion di desperdicio,” Croes a menciona.

E sushi cu nan ta colecta na e momentonan aki ta colecta door di Metabolic Foundation ken ta recicla e plastic y ta entrega e restante di e material na otro instancianan cu por haci algo cu e sushi ey.

Ademas, nan ta evaluando con nan por amplia e conscientisacion den comunidad y pa esey, nan lo brinda nan plataforma pa informa e comunidad pero tambe e bishitante di tur lo cual ta Aruba su maneho y stimulando pa tene y haci un Aruba limpi.

Aparte di esey, e programa di certificacion cu ATA ta provee por medio di Aruba Excellence Foundation tambe nan ta bay wak pa hinca un componente pa loke ta trata limpiesa di Aruba y su importancia pa sigui conscientisa di e manera aki tambe.

Den e conferencia di prensa diferente organisacionnan tabata presente pa asina ey informa comunidad tocante nan rol den e campaña aki como por ehemplo Bureau City Inspector ken a traves di nan PR Robby Rosel a informa cu nan ta e instancia cu ta bay handle e actividad di Baki den Bario caminda nan inspectornan ta bay ta controlando kico ta lo cual ta e sushedad cu ta bay ta yegando na e sitionan cu barinan ta bay ta ubica, den esaki e tambe a enfatisa cu cada desperdicio mester ta separa.

Ademas, el a splica cu nan ta bay organisa esaki di manera cu ta bay tin un entrada y un salida pa e fluho por cana mas lihe y asina evita estancamento.

Serlimar cu pick up service pa esnan cu no por hiba na sushi na e bakinan e dianan ey

Di su parti, Natalie Wolf representando Serlimar a splica cu esaki ta un concepto nobo teniendo na cuenta cu e maneho di Blue Print di minister Arends cu por conta cu e participacion di varios partners, Serlimar su participacion riba e fechanan menciona caba ta pa facilita bakinan di green waste so y den caso cu comunidad e dianan aki no por transporta nan desperdicionan for di nan cas na unda e bakinan ta bay ta ubica, nan por brinda un pick up service cu por transporta e sushi ey na un prijs accesibel.

Pa haci un peticion na tempo e diabierna prome cu diasabra di cada fecha menciona tin e number disponibel unda por manda un Whatsapp e cual ta: 597.4268, pa clientenan di Serlimar cu tin nan pagonan al dia e servicio ta keda gratis, pa otro persona tin un costo di 50 florin.

Entre otro partnernan tambe tin Ecotech Free Zone ken a informa cu nan lo habri e prome diasabra di cada luna pa asina ricibi e desperdicionan cu nan ta procesa di casnan y di negoshinan, na e momentonan aki nan ta separa y recicla varios material como carton, hero, aluminium, papel di oficina, green waste y palet.

Otro instancianan como Daltra Recycling tambe ta bay ta presente den campaña aki di Baki den Bario y asina contribui na un maneho di desperdicio mas eficiente y sostenibel.