Entre opcionnan cu IMF a presenta gobierno: Disminucion di overtime y indexering por yuda baha gasto di personal

Fondo Monetario Internacional (IMF) no solamente a traha un rapport preliminar, dunando un panorama den su investigacion riba e gasto cu gobierno ta destina pa nan personal den sector publico. Den dje, e organo internacional ta duna gobierno algun recomendacion pa baha e gasto aki, cu ta representa 12% di nos GDP.

Segun minister di Finansa y Economia, Xiomara Maduro, gobierno a haya algun opcion di IMF. Un di nan tin di haci cu e parti overtime. Si gobierno por reduci e gasto di overtime den 5 aña cu un 25%, kico esaki ta nifica den e rebaho. E no a trece den cifra e proyeccion aki di IMF riba e opcion aki.

Tambe e parti di indexering, cu ta un discusion cu actualmente ta tumando luga cu e bloke sindical di e 5 sindicato cu ta representa ambtenaar. Si gobierno ta suspende e pago aki pa un of mas aña, kico lo ta e efecto den dje. Y tambe otro beneficionan cu empleadonan publico ta gosa.

Den su rapport IMF ta presenta diferente opcion pa gobierno evalua ora di tuma decision riba su maneho pa baha gasto di personal, y cual lo bira su efecto riba GPD di pais Aruba. Den dje, e institucion aki a presenta modelonan, caminda e mandatario a aclaria cu no ta trata cu IMF ta impone nan.

“Ningun organismo ta tuma decision pa pais Aruba,” el a bisa.

Den e caso aki, IMF a bini Aruba pa haci su trabou pa duna gobierno instrumentonan ora di tuma decision. Pero na final di dia segun Maduro ta pueblo esun cu ta tuma e decision pa medio di nan representante den parlamento y tambe den gobierno di Aruba.

Pa logra esaki, entre otro mester e comprondemento di henter comunidad, riba kico gobierno ta referi na dje, na momento cu nan lo cuminsa implementa algun di e recomendacionnan aki. Tambe e organo di supervision financiero CAft a yega di bin cu algun recomendacion den nan ultimo rapport pa baha gasto di personal.

Gobierno a institui un comision pa sigui investiga dicon e gasto di overtime ta manera e ta actualmente. Maduro no ta descarta cu eventualmente e mesun condicion di trabou ta esun cu ta pone cu tin overtime. Of kisas tambe e manera con e roosternan ta wordo traha, y muy specialmente den e departamentonan cu tin di haci cu siguridad di nos pais.

E componente di overtime den gasto di personal ta 5%. Pa yega na esaki, e expertonan di IMF a uza e cifranan di aña 2018. Por ehempel e presupuesto den departamento di Husticia ta esun cu tin mas overtime. Un 17% di e presupuesto aki ta bay pa paga overtime.