Pago di gasto medico ta keda controversial
Cada tanto tempo nos ta haya nos den e debate fuerte tocante casonan dificil y doloroso, unda esnan responsable pa huzga si cierto gastonan medico ta hustifica, mirando e situacion medico den cual e pacient ta, a dicidi cu tratamento no tin sentido mas, o cu en todo caso e organo responsable pa cubri gasto, AZV, no ta haci esaki mas. Naturalmente no tur caso ta mescos, loke ta haci cu nos mester ta cuidadoso den scoge nos palabranan, pa no ofende ningun hende. Y si nos mes ta sinti caba cu como prensa ta dificil, nos por imagina cu pa esnan cu ta tuma decision, esaki ta conta mas ainda, ya cu ta nan ta haya e critica directo riba nan, sigur den un comunidad chikito, y ademas e acceso na rednan social, unda tur hende por opina, bon informa of no.
E otro banda di e medaya no ta mustra facil ni agradable tampoco. E famia di e pacient ta den un situacion unda di un banda nan ta comprende cu e perspectivanan pa nan ser keri no ta mustra bon, pero ta kere, hustifica o no, cu mester tin posibilidad pa tratamento ainda cu por brinda un perspectiva na e pacient. E asunto ta bira mas complica ainda si di banda medico no tin consenso y cierto medico(nan) por opina cu si tin posibilidad pa tratamento.
En todo caso masha rapido e discusion ta bay den direccion di acusacion cu ta trata di hende sin curason, cu ta tuma decision sin ningun consideracion humano pa loke e famia ta pasando aden. Y manera bisa caba, naturalmente e rednan social ta hunga un papel importante pa divulga informacion, tanto esun adecua como e observacion cu despues, ora bo pens’e bon, miho bo a tene pa bo mes. Pero ya, cada ken tin e posibilidad y e derecho di bisa loke nan ta haya ta bon, cu of sin argumento valido.
Tur esaki ta haci masha dificil pa logra un discusion sano, sin exceso di emocion, cu realmente ta duna mas claridad riba e asunto. Ban purba trece un tiki claridad den esaki. Ban bolbe na e responsabilidad di cuida e caha di placa for di cual ta paga gasto medico. Ta logico cu pa por haci esaki na un manera ordena, lo mester tin criterio pa loke ta paga y pa loke no ta paga. Esey ta zona facil pero e no ta. Manera bisa caba, no semper tin consenso entre medico cu un cierto tratamento no tin sentido mas, loke pa e pacient den hopi caso lo significa cu ta keda solamente e acompañamento di su persona den direccion di su fayecimento.
Ta bon pa realisa cu cada aña tin varios caso unda e famia tambe ta mira y ta reconoce cu no tin nada mas pa haci pa nan ser keri, y cu nan ta duna permiso pa desconecta tur aparato, y laga e persona bay pa sosiego eterno. Esaki naturalmente no ta kita nada di e derecho di un famia den un caso unda nan ta opina diferente, pa busca e posibilidadnan cu nan ta mira ainda. Por ta cu den esaki tin algo otro cu tambe ta influencia, y esey ta e manera ‘cientifico’ basa riba cifra cu ta domina ciencia medico na Europa, y e idiosincracia Latino cu ta mas cerca e manera mas ‘spiritual’ di nos region, loke ta expresa den manera di trata pacient.
Ta facil pa bisa cu mester mustra mas flexibilidad, pero ta ken ta dicidi finalmente kico ta sucede? Hopi biaha e famia ta termina cerca e mandatario cu ta responsable pa e cartera di salubridad, pero lo nos desea pa e ta tuma e tipo di decision aki? Esey hamas, ademas cu e ley mes lo defini, manera hopi otro ley, cu ta e funcionario mester dicidi.
Pero esaki ta implica cu semper esun cu ta dicidi ta tuma e decision, cu ley den man, al pie de la letra manera e ta stipula? Probablemente no, pasobra manera ta e caso den otro ley tambe, tin un cierto margen – chikito – discrecional, unda e responsable ta interpreta e ley un tiki diferente. Esey por? Esey mag? Nos ta kere cu si, pero e no por ta asina cu e persona aki ta haci esey regularmente, birando sumamente popular den comunidad pa ta ‘bon hende’ pero hincando e organisacion den un problema financiero grandi. E ora tambe nos ta bay keha pasobra nos mester bay paga mas, na prima o na BAZV. E ora nos ta bay keha pa kita e persona ey, pa pone un otro cu ta maneha nos placa miho… Y lo ta bon pa nos realisa cu e gastonan medico ta aumentando, aña tras aña, sin cu prijs di medicamento, o di salario di personal medico mester subi.
Den un comunidad chikito manera Aruba ta dificil pa sconde, tambe pa funcionario halto cu mester tuma y carga responsabilidad pa decisionnan dificil. Esey no mester tampoco, basta nos ta hiba un debate sano, cu respet pa opinion di otro. No ta pasobra nos por subi internet y expresa opinion, informa of no, mester haci esey sin pensa.
