(AP) — Lider di grupo militante Libanes, Hezbollah a bisa diabierna cu e kier pa e proximo presidente Libanes ta un politico cu no ta bay “traiciona” e fraccion sosteni pa Iran, y a critica Merca pa loke a describi como un “acoso” contra su pais.
Papiando mediante un video-link cu su sostenedornan reuni pa marca di e Dia di Martir di Hezbollah, un conmemoracion di e luchadornan fayecido di e grupo, Hassan Nasrallah no a nombra ken ta faborito di Hezbolla pa ta presidente. Pero su comentarionan a indica cu e lider militante tin plan pa eherce influencia riba cualkier cu keda eligi.
Parlamento Libanes no a logra eligi un presidente nobo den cinco intento despues cu e termino di presidente MIchel Aoun, un aliado fuerte di Hezbollah, a termina dia 31 di october. Esey a laga Libanon den un “vacuum” politico cu un gobierno encarga cu no tin podernan completo mientras e pais ta hundi den e pio crisis economico y financiero den su historia moderno.
E percepcion publico ta cu Hezbollah di Nasrallah ampliamente ta sostene politico Sleiman Frangieh, un aliado cercano, pa e funcion di presidente.
E coalicion Libanes cu sosten occidental ta sostene Michel Moawad, un critico fuerte di Hezbollah y e gran cantidad di arma den su posesion. Den ultimo ronda den parlamento, Moawad a ricibi 44 voto na fabor, hopi menos di e dos tercer parti necesario den e legislatura di 128 miembro.
Bao sistema Libanes di poder comparti cu ta na vigor desde despues di e independencia di e pais for di mandato Frances na 1943, un presidente mester bin for di e secta Catolico Maronite; e prome minister ta un Sunni y e presidente di parlamento ta un Shiita.
Hezbollah tabata e unico grupo permiti pa keda cu su armanan despues di e guera civil brutal na Libanon na 1975-90, pasobra e tabata bringando contra forsanan Israeli ocupando algun parti di sur di Libanon. Despues cu Israel a retira di Libanon na aña 2000, Hezbollah a keda cu su armanan bisando cu nan ta un defensa necesario pa disuadi cualkier atake futuro for di Israel.
Hezbollan a bringa contra Israel sin resolucion den un guera di 34 dia den berano di 2006. Awendia, Israel ta considera Hezbollah – designa como un grupo terorista pa Merca y Israel – su menasa inmediato di mas serio, calculando cu e grupo militante tin alrededor di 150mil raket y misil enfoca riba e pais.
Nasrallah tambe a culpa e “maldicion Mericano” pa e escasez di electricidad di Libanon, bisando cu sancionnan di Washington ta preveni Libanon di ricibi combustible Irani gratis pa su stacionnan di electricidad.
Su discurso a bin despues di e bishita diaranson na Libanon di hefe di USAID, Samantha Power, kende a anuncia cu Merca ta dunando $80.5 miyon den ayudo pa asistencia di cuminda y stacionnan pa pomp awa cu energia solar den e Libanon destrui pa crisis.
Power tambe a reuni cu lidernan politico Libanes pa pusha pa un resolucion pa e vacuum politico y pa un cantidad di reforma politico y economico rekeri pa Fondo Monetario Internacional pa aproba un pakete di ayudo di $3 biyon pa Libanon.
