Algun di e puntonan cu a wordo trata den e “Heads of Agreement” ta riba e acuerdonan mas principal di kico lo ta e areglonan entre pais Aruba y Citgo, segun gobierno. Ta papia di kico ta bay ta e impuesto, kico ta bay ta e fee pa “lease” e refineria como lo tin un momento cu e refineria lo wordo traspasa pa un compania 100% di pais Aruba, segun prome minister Mike Eman a splica. A yega na palabracionnan cu e compania aki tin un responsabilidad hunto cu gobierno di Aruba pa opera un refineria hopi mas consciente di e medio ambiente.
Pa loke ta medio ambiente dos punto hopi importante pa gobierno a wordo trata den e negociacionnan cual ta, e punto di converti e refineria pa e bay over riba gas cu ta reduci emision drasticamente. Y e di dos punto ta un proyecto di algen cu un cierto momento lo capta e emision di carbon y traduci esaki den un cultivo di algen cu por ta hopi significativo pa Aruba y tambe pa mundo cu e tipo di refinerianan lo por wordo haci den otro forma y Aruba lo tin e prome industrial “skill poject” unda cu esaki lo tuma luga, e mandatario a bisa.
Lease
E idea ta cu pais Aruba lo bira e doño di e refineria, pero ta algo cu mester negocia ainda cu e doño actual, esta Valero. Despues Aruba lo lease (fia) e refineria pa Citgo pa un periodo di 15 pa 25 aña, cu un opcion di por extende e periodo cu 10 aña mas. Despues mester negocia riba e demantelacion y limpiesa di e tereno, asina minister De Meza ta bisa.
Trabou
E minister ta ripiti tambe cu cuponan di trabou mas tanto mester yena cu Arubano. Solamente pa cierto experticio ta posibel pa trahadonan di afo yene e posicionnan.
Detencion
Minister De Meza a bisa Caribisch Netwerk tambe cu durante e negociacionnan tabatin contacto cu entre otro Roberto Rincon. E empresario Venezolano aki a keda deteni recientemente na Merca y ta sospecha di cumpra empleadonan di PDVSA, doño di Citgo, y asina yega na contractnan lucrativo.
Hugo Carjaval
Rincon tin propiedad na Aruba y ta amigo di Hugo Carvajal, cu Merca ta sospecha di traficacion di droga. Carvajal a keda deteni na Aruba pero despues Hulanda a dicidi cu mester lag’e liber pa motibo di su status diplomatico. Minister De Meza a bisa awor cu e tabatin contacto mas biaha cu Rincon pero e tempo ey no a haya indicacion cu Rincon tabata envolvi den actividadnan criminal.
