Prome Minister Evelyn Wever-Croes a elabora durante Conferencia di Prensa di Gobierno di Aruba diahuebs 16 di juli, riba varios aumento di entrada cu a wordo duna na luna di juli recien. Un di e aumentonan tabata esun di e reparatietoeslag pa e pensionadonan di SVB.
Prome Minister ta remarca cu e grupo di pensionado cu ta hayando e aumento di e reparatie toeslag ta un grupo hopi grandi di 20.884 persona cu a haya un aumento di 360 florin extra pa aña. Como cu e aña aki e aumento a wordo paga desde juli 2024, e gastonan ta di 3.2 miyon florin y pa aña 2025, cu lo ta un aña completo y tambe ta inclui e bonus di fin di aña, e gastonan lo ta 12.9 miyon florin extra.
“Tin critica den comunidad cu ta bisa cu 360 florin no ta yega pa nada. Pero pa Gobierno por a paga e 360 florin aki mester a aloca pa e aña aki so, mas di 3 miyon florin y pa aña 2025 esaki lo ta casi 13 miyon florin. Gobierno semper lo sigui traha na bienestar di e pensionadonan di Aruba. Nos no por haci tur cos hunto pero si mi lo sigui bringa pa trece alivio pa cada un di nan”, Prome Minister a indica.
Nota di redaccion:
Bon Dia Aruba a tuma contacto cu premier Wever-Croes pa aclaria cuanto placa precies e pensionadonan ta bay ricibi. Wever-Croes a informa cu e aumento di 360 florin ta pa henter un aña; kiermen cu cada pensionado lo ricibi 30 florin adicional pa luna. Cuminsando e luna aki, e reparatietoeslag ta subi di 170 florin pa 200 florin pa luna. Te cu luna pasa, e reparatietoeslag pa pensionado tabata 170 florin.
