Entrante otro siman dos ley importante cu tin corelacion cu otro lo drenta Parlamento. Ta trata di e asina yama Ley di Citgo y di otro banda Ley di presupuesto 2017.
Despues di e acuerdo final cu Valero, caminda e refineria a bira propiedad di pais Aruba, tabata pendiente pa e acuerdo cu Citgo y e marco huridico cu e compania aki lo compromete su mes pa opera e refineria lo wordo trata debidamente den Parlamento.
Tin indicacion cu e ley aki lo wordo trata den reunion publico diaranson awor. Considerando cu otro siman lo falta practicamente 10 dia so pa e trabou den e refineria cuminsa, e ley aki lo wordo trata cu cierto prioridad.
Otro ley cu lo wordo trata pronto ta esun di Presupuesto 2017. Mirando e impacto cu e reapertura di e refineria tin pa cu entrada cu lo genera den caha di gobierno, awor tur fraccion den Parlamento lo por tin un miho bista si esaki ta suficiente pa atende cu e deficit presupuestario.
