Den rueda di prensa di ayeranochi Prome Minister Evelyn Wever-Croes a anuncia cu ta pasa pa e medida di imposicion di un ‘toque de queda’ (curfew, avondklok) cu ta bin na vigor entrante diasabra awor, dia 21 di maart, por lo pronto te cu dia 31 di maart. Un toque de queda ta encera un prohibicion total pa cualkier persona pa ta riba caya durante e orario indica, cu lo ta di 9or di anochi te 6or di mainta.
E motibo pa haci esaki, segun e mandatario, ta cu ta observa demasiado movimento di hende den oranan laat di anochi, cu ademas ta aglomera na cierto lugarnan, aumentando asina e riesgo di yuda plama e coronavirus mas ainda. Esaki no lo ta cuadra cu e esfuerzonan cu ta haci actualmente pa para propagacion di e virus riba nos isla. Durante e rueda di prensa Alto Comisario Andrew Hoo a duna un splicacion tocante e castigo cu por duna segun nos Codigo Penal, cu ta un multa cu ta bay te na un maximo di 10.000 florin.
Tur persona cu lo ta drentando ainda na Aruba, residente cu ta bolbe, lo ta someti na regimen di cuarentena di 14 dia. Pa loke ta esnan cu a haya un aviso di cuarentena, y a firma cu nan a haya esaki y no ta tene nan mes na e regimen aki, es decir keda cas na tur momento, cu debido distancia di e demas famia cu ta biba ey, por haya un multa cu ta bay te na 10.000 florin.
Tambe el a anuncia cu entrante diasabra awor lo bin un paro completo di entrada di persona di exterior; esey ta conta tambe pa residentenan di Aruba cu ta desea di regresa. Esaki tambe ta un medida te cu 31 di maart, suheto na evaluacion despues, segun cu e situacion aki desaroya.
Nota di redaccion: E medida aki ta toca e corantnan na Aruba di mal manera, si nan hendenan cu ta traha anochi y marduga (imprenta), y e distribuidornan no por pasa busca e corantnan manera di custumber den marduga. Si mester cumpli cu e orario di toque de queda anto mester cera redaccion pa 6or, pa por sali di trabao na tempo pa yega cas pa mas tarda 9or. Y lo ta fair anto si gobierno tene su ultimo rueda di prensa 4or di atardi, pa nos por informa nos lectornan debidamente pa su mañan mainta. Nos ta spera cu por bin un solucion pa e situacion aki, sino ta pone parti importante di prensa di Aruba ‘fuera di combate’. Esey no por ta e intencion.
