Minister di Husticia, Andin Bikker a informa cu entrante diahuebs madruga e medida di toque de queda (TDQ) no ta vigente mas.

Ademas e mandatario a anuncia algun cambio riba un di e medidanan considera mas pisa y cu a wordo introduci pa contraresta e contagio di Covid-19 na Aruba. El a bisa cu poco poco nan ta bin suavisando e decretonan cu a wordo introduci entre nan TDQ. pa loke ta e TDQ e orario a cambia, enbes di 11 anochi e ta cuminsa 12’or mey anochi te cu 5’or di madruga. Minister Bikker a bisa cu e cambio riba TDQ ta drenta na vigor entrante dialuna 25 di mei 2020.

Tambe e TDQ lo keda vigente durante 72 ora. “Esey kiermen cu madruga diahuebs no ta bay tin toque de queda mas,” el a bisa. E orario di establecimento cu aworaki nan mag di permanece habri te cu 9’or anochi a wordo extende pa 10’or anochi.

Igualmente a introduci un excepcion durante e TDQ. E tin di haci cu e personanan cu mester sali mas tempran cu 5’or di madruga pa nan bay prepara nan establecimento pa habri tempran, nan ta permiti pa sali prome cu 5’or di madruga.

Tambe Bikker a informa cu e restriccion pa e cantidad di persona pa bay atende entiero no ta existi mas. Mescos cu pa otro tipo di establecimento of actividad no esencial cu mag di ta habri den e fase 2 di flexibilidad cu nos ta aden actualmente.

Bikker a laga sa cu finalmente por habri terasa. E ta defini e palabra como e establecimento of restaurant cu tin nan terasa habri pa atende nan clientenan pafo.

E mandatario a bisa cu gradualmente nan ta bin suavisando e medida aki. Entre otro e tabatin un efecto den hogar caminda por ehempel e ciudadano tabata prohibi pa ta dilanti di su cas den su propio cura unda caminda publico ta core, ya cu e por bay cera y haya boet. Awor esaki a wordo limita cu ta prohibi pa transito riba caminda publico so denter di cierto orario.

Pero semper nan ta haci evaluacion si nan ta mantene of no un instrumento cu a wordo introduci pa atende cu e virus. Y esaki ta e caso di TDQ cu lo wordo mantene te diahuebs madruga awor. Mientras cu na Corsou a wordo emiti un decreto caminda nan TDQ ta sigui te cu 4 di juni. P’esey Bikker ta bisa cu mester para keto un rato pa analisa bon tur e retonan cu nos ta pasando actualmente. “Prome cu ta yega na conclusion mucho lihe.”