Awe anochi durante conferencia diario di 7or a anuncia cu entrante diasabra ta bin na vigor un update riba e reglamento pa combati e calamidad causa pa Covid-19. Entrante diadomingo mainta, niun persona cu no ta traha den un sector vital mester keda na cas. Solamente ta haya chens pa bay haci compras, busca cuminda of bay botica.
Mañan lo publica tur excepcion cu lo bin na vigor pa e ‘shelter in place’ aki, cual no ta un shutdown completo, mirando cu servicionan vital manera supermercado, pompstation, botica, sector di comunicacion y sector bancario/financiero si lo sigui opera.
Prome Minister, Evelyn Wever-Croes a anuncia esaki mirando cu Departamento di Salud Publico ta haciendo test mas agresivo y esey naturalmente lo conduci na mas resultado positivo. Pero Wever-Croes ta spera cu comunidad no bay den panico, sino mantene su mes na e reglanan cu lo bin na vigor diadomingo.
Alto Comisario di Polis, Vanessa Tjon-Kock a indica cu durante e ‘shelter in place’ lo bay intensiva control policial aun mas compara cu con ta actuando riba caya durante Toque de Queda actualmente.
