Entrante otro aña, interes riba prestamo di estudio otorga via Arubalening ta bira cero (0) porciento.

E decision aki a wordo tuma siman pasa den Conseho di Minister, y ayera minister di Enseñansa, Innovacion y Desaroyo Sostenibel, Rudy Lampe a anuci’e oficialmente como un ‘bon noticia,’ durante e conferencia di prensa di gobierno na Bestuurskantoor.

Lampe a bisa cu tur esunnan cu tin un Arubalening of cu ta bay aplica pa un Arubalening den futuro, e interes riba e prestamo di estudio aki di pais Aruba ta bay baha te cu cero porciento.

A base di pregunta formula pa Bon Dia Aruba, e mandatario a aclaria cu e decision aki lo drenta na vigor for di 1 di januari 2020. Kiermen tur esunnan cu ya a cera un acuerdo cu Arubalening caba den pasado y ta bezig ta pagando, for di 1 di januari no ta bay paga niun interes mas riba nan prestamo.

Pa esunnan cu ya caba a paga na Arubalening cu e porcentahe cu tabata na vigor e tempo ey, un interes bastante halto, ya esey a cumpli cu nan obligacion. El a declara cu cualkier decision di e indole aki tin un fecha di inicio. Y e fecha di inicio ta 1 di januari 2020. Esunnan cu ta pagando aworaki logicamente -segun e mandatario- ta bay conta pa nan tambe entrante otro aña. Nan ta sigui paga Arubalening sin interes.

Mesun linea cu Hulanda.
E ta haya cu esaki ta un bon noticia pa hopi hende cu ta luchando pa añanan cu henter e problematica di interes riba e prestamo otorga pa Arubalening. Ya cu interes tabata core y subi, y e suma pa loke ta paga Arubalening ta haci mas complica pa cumpli cune. P’esey gobierno a dicidi pa baha te cero e interes riba pago di prestamo di estudio otorga pa Arubalening.

Den e forma aki, gobierno a sigui e ehempel di Hulanda, caminda e DUO lening a wordo reduci na cero porciento. E decision aki ta pas cu dentro di maneho di ministerio di Enseñansa, esta di stimula pa nos profesionalnan bin bek y aporta na nos comunidad. Pero cu e decision aki, pais Aruba tambe ta den linea cu e desaroyonan cu ta tumando luga na Hulanda.

“E ta un forma pa nos inverti den nos enseñansa. E ta sumamente necesario pa nos pais sigui inverti den nos enseñansa,” el a bisa.

Lampe ta sigur cu pa medio di e decision aki nos profesionalnan y hopi di nos ciudadanonan lo sinti un alivio. E interes aki ta bay conta pa tur esunnan cu tabatin un acuerdo firma caba pa logra un prestamo di estudio via Arubalening.