Aruparking ta keda un topico vigente den comunidad cu tin hopi incertidumbre rond di kico lo bay pasa cune. Ayera durante conferencia di prensa, minister encarga cu transport, Ursell Arends, a anuncia cu entrante luna di mei, Aruparking ta bay ta activo atrobe.
Den luna di october di aña pasa, den un entrevista cu Telearuba, director di Aruparking, Sr. Edwin Mohamed, a sigura cu Aruparking ta bay bin back pero cu un maneho nobo. Den luna di maart, Bon Dia Aruba a combersa cu Minister Arends tocante e topico aki tambe—e reintroduccion di Aruparking—y a puntra si por splica tocante e proceso of maneho nobo cu esaki ta bay tin y si ta bay tin cambio den ley.
Minister Arends a contesta cu “Aruparking ta bay tin un herstart di 2 fase: den e prome fase no lo tin un cambio di ley, pero den e segunda fase probablemente si lo bin un cambio di ley y lo anuncia esaki despues.”
Durante e conferencia di ayera, Minister Arends a confirma cu Aruparking ta wordo reintroduci den luna di mei. “E meta ta pa reinicia Aruparking den luna di mei. Ainda falta pa finalisa tur e detayenan di con ta bay reactiva esaki, pero e meta ta cu den luna di mei ta reactiva Aruparking,” Minister Arends a indica contestando pregunta di un miembro di prensa.
Fuera di esaki, el a agrega, ta bay bin mas espacio pa parkeer den centro di ciudad y na mesun momento, el a anuncia cu tur e luganan di para auto (vaknan) cu ta geel y cu normalmente no mag di para aden si no ta paga pa e permiso, ta bay bira blanco. “Esey tambe lo trece un alivio grandi pa nos comunidad,” el a remarca.
Ariba nan pagina di Facebook oficial, Aruparking a publica un video ayera merdia tambe den cual nan a indica cu berdaderamente entrante 2 di mei Aruparking lo ta activo atrobe. E concepto, segun e video ta señala, ta cu mester paga dos florin pa por para na cualkier di e luganan di para auto. E dos florin por wordo paga cash na e mashin of por paga esaki via pay.aw tambe.
