Chief of staff di Cuerpo Policial di Aruba Inspector Rocco Tjon lo bira director di KIA entrante prome di juni. 3 persona a solicita pa e funciona aki, for di cual Sr. Tjon a wordo selecta. Segun Minister encarga cu Husticia Arthur Dowers e ta un persona experiencia cu hopi conocemento y no ta solamente ‘un polis’, cual ta cualidadnan importante pa nota.
“Den ministerraad siman pasa diabierna a pasa e peticion pa nombra Sr. Tjon como director di KIA. Tabatin un procedura di solicitacion, y su persona a sali como esun mas miho for di e procedura aki. Aworaki lo cuminsa cu e proceso di introduccion di Sr. Tjon na KIA y ta depende di Cuerpo Policial ki momento e lo por cuminsa cu su trabou. E punto di salida ta cu esey ta prome di juni, pero claro e ta keda na Korpschef si e lo por laga Sr. Tjon bay pa prome di juni. Si esey ta e cas,o e proceso di introduccion ta cuminsa y e lo por bay ocupa e posicion na KIA, Sr.Dowers a splica.
Trankilidad den e institucion
Na e momentonan aki e cos mas principal ta pa garantisa trankilidad den e institucion pa por garantisa cierto procesonan cu mester termina. Nos ta bezig cu e proceso di reorganisacion di KIA ya pa 20 aña caba cual ta den su fase fina aworaki. Mi ta kere esey ta un di e cosnan mas principal cu lo mester ‘pick up’ aworaki, pero tin hopi otro aspecto pa loke ta e cuido diario di prizon, manera condicion fisico di e prizon tambecu mester haya atencion. “Pero principalmente, na momento cu introduci e ‘inrichtingsplan’ nobo, bo ta haya cu mester adkeri personal nobo y manager nobo, cual mi ta kere cu lo ta e prome tarea cu e director lo haya su mes ocupa cun’e, banda di mantene siguridad den prizon y e continuidad di e organisacion,” Sr. Dowers a bisa.
Organisacion ‘dificil’
KIA ta un organisacion cu a mustra di ta masha dificil pa atende cun’e y den pasado a experiencia cu directornan no por a caba di haci e trabou. A puntra Sr. Dowers con e director nobo lo bay haci cu esaki pasobra e ta bay haya un tarea basta dificil.
Segun e mandatario ta splica: “Sr. Tjon banda di ta Inspector di polis, e ta un persona cu hopi experiencia den duna diferente entrenamento, e tin hopi conocemento y e no ta solamente polis, cual ta cualidadnan importante pa nota.”
Banda di esey Sr. Dowers a splica cu kIA berdad ta un di e organisacionnan mas dificil cu nos tin pa diferente rason. Banda di e hecho cu e ta un luga cera, cu ta trece su retonan cun’e, e ta un organisacion cu hopi cos a bay robes den pasado. “Mi ta kere cu e ta un di e organisacionnan cu hasta por bisa cu pa falta di inversionnan corecto den hende, e parti di formacion a haci cu e ta un organisacion dificil awe. Sinembargo e no ta imposibel pa cambia esaki. Tambe ta asina cu ora cu tene cuenta cu e ta un organisacion cera, pues no por mira hopi facil kico ta pasa tras di e murayanan, por tin falta di transparencia cu ta pone cu situacionnan no desea ta keda scondi pa un temporada hopi largo, el a splica.
Reto
“Mi ta kere un di e retonan di mas grandi lo ta pa kibra cu e tradicionnan cu tin, caminda cu cosnan ta keda tapa. Y mi ta kere cu mester bin hopi mas discusion di maneho den prizon, kico ta bon y kico ta malo, con ta sanciona cosnan cu ta malo y con ta stimula cosnan bon. Mi ta kere cu Sr. Tjon mirando e experiencia cu e tin y mirando e forma cu ami mes a mire traha den practica y e estudionan cu e tin, mi ta kere cu e por duna un contribucion grandi na esaki, Sr. Dowers a finalisa bisando.
