ORANJESTAD – E tarifa residencial por paga pa luna Awg.25.00, pa cuartal Awg.75.00, mita aña Awg.150.00 of un aña completo Awg.300.00. Pa e aña 2019 lo cobra solamente e 10 luna nan restante di e aña cu ta cuminsa entrante luna di maart te cu december di 2019 cu ta un suma di Awg.250.00. Por haci pago na oficina di Serlimar na Tanki Flip of San Nicolas y pronto na Pos Chiquito. Tambe por haci pago na tur oficina di MFA, via online banking of standing-order na bo banco preferi.
E tarifa residencial ta un cobransa cu ta valido pa cada cas of punto di coleccion cu ta ricibi e servicio optimal di coleccion residencial y cu tin un mini-container di Serlimar. Cada cas of punto di coleccion por tin maximo 2 mini-container residencial. Si ta desea mas cu 2 mini-container lo stap over pa un tarifa comercial y lo ricibi container comercial.
Cliente nan di Ecotech N.V. of otro compania lo bin na vigor pa un dispensacion di e tarifa residencial conforme cu ley nan existente. Pa bin na remarca pa e dispensacion aki mester bin cu un comprobante cu ta cliente di otro compania y no di Serlimar.
Pa cliente nan di Serlimar cu a paga aña 2015 te cu 2017 y 2018 por tuma contacto directo cu Serlimar na 5245080 pa haya mas informacion di nan incentiva. Pensionado nan y persona nan cu tin onderstand of bijstand por tuma contacto of pasa personalmente na Serlimar na Tanki Flip of San Nicolas pa mas informacion di e suma cu nan mester bai paga di e tarifa residencial.
Ki beneficio abo tin como cliente di Serlimar pagando e tarifa residencial?
E tarifa residencial ta mas un contribucion na e desaroyo di nos maneho di desperdicio en general. Como cliente di Serlimar bo ta ricibi hopi benificio y servicio adicional pagando e tarifa residencial di solamente Awg.25.00. Como cliente di Serlimar bo lo sigui ricibi e servicio optimal di coleccion di desperdicio residencial, bo tin acceso gratis na e PTS-area na Parkietenbos y tambe bo lo contribui na entre otro;
- Mantene nos Aruba limpi, cu servicionan di limpieza y mantencion di bario ful rond di nos isla;
- Engrandece e proyecto “Milieustraat” cu ta dedica na nos comunidad di Aruba;
- Aporta y sostene proyecto nan cultural y educativo cu ta na bienestar di nos medio ambiente cu e producto y servicionan di limpieza cu Serlimar ta ofrece.
- Desaroyo di nos servicio di coleccion y maneho structura di animal morto cu ta cubri ful nos isla;
- Desaroyo di tur servicionan adicional cu Serlimar ta ofrece entre otro limpieza y mantencion di mini-container, limpieza di tereno priva, coleccion di desperdicio di cura etc.
Serlimar ta para tras di e pensamento cu a yega tempo pa nos tur, como un comunidad, forma parti di e desaroyo di maneho di desperdicio cu ta na bienestar di Aruba. Cu bo contribucion di e tarifa residencial, hunto nos por logra yega na nos meta pa sigui cuida y proteha nos medio ambiente.
Pa mas informacion of cualkier pregunta di e tarifa residencial por tuma contacto cu Serlimar na 5245080 of por manda un email na marketing@serlimar.com of Facebook messenger.
