Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024.
Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente cerca di e limite minimo di e ARA, a pesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
E CMM a considera e siguiente informacion y analisis den su deliberacion.
Reservanan internacional y oficial
E reservanan internacional, cu ta consisti di reservanan oficial di BCA y reservanan di divisa na e banconan comercial, a subi cu Afl. 83,8 miyon te cu 9 di februari 2024, compara cu december 29, 2023 (Grafico 1). E reservanan oficial a expande cu Afl. 132,0 miyon, mientras cu e reservanan na banconan comercial a baha cu Afl. 48,2 miyon. Consecuentemente, te cu 9 di februari 2024, e reservanan oficial y internacional a suma Afl. 2.777,7 miyon y Afl. 3.145,8 miyon, respectivamente.
Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, reservanan internacional a keda ampliamente riba e rekisito di tres luna di pago riba e cuenta coriente di e balansa di pago te cu 9 di februari 2024. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1).
Inflacion
Inflacion, midi na final di luna contra e mesun luna di e aña anterior, a yega 2,3 porciento na december 2023 (Grafico 2). E contribuyentenan principal na e inflacion, midi na final di luna contra e mesun luna di e aña anterior, na december 2023, tabata ‘comunicacion’ (contribuyendo cu 1,6 punto di porcentahe), ‘diferente producto y servicio’ (contribuyendo cu 0,4 punto di porcentahe), y ‘vivienda’ (contribuyendo cu 0,4 punto di porcentahe). Di otro banda, e componente ‘transporte’ (contribuyendo cu -1,0 punto di porcentahe) a mitiga e inflacion den december 2023.
E inflacion midi riba promedio di 12 luna a baha pa 3,1 porciento na december 2023; un caida compara cu 3,7 porciento na november 2023. E presion inflacionario tabata mas tanto debi na e subida den e tarifa di awa y coriente desde augustus 2022 y e aumento den prijs di cuminda y bebida no alcoholico. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.
Mientrastanto, na december 2023, inflacion basico (cu ta exclui cuminda y energia) a alcansa 3,1 porciento si midi e final di respectivo luna contra e mes un luna di e aña anterior (november 2023: 2,6 porciento). Basa riba un promedio di e ultimo 12 lunanan, inflacion basico a yega na 2,1 porciento (november 2023: 1,9 porciento).
Likides excesivo di e banconan comercial
Likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 519,4 miyon na december 2023, esta, Afl. 78,7 miyon mas compara cu november 2023 (Grafico 3). Ora cu compara cu fin di december 2022, likides excesivo ta refleha un contraccion di Afl. 300,4 miyon. E caida aki tabata principalmente debi na refinanciamento di fiansanan internacional riba mercado local y compra di bono di gobierno pa inversionistanan institucional.
